މޮންޓެވީޑޯ، އުރުގުއޭ (މާޗް 30) - ދެކުނު އެމެރިކާގެ ވޯލްޑް ކަޕް ކޮލިފައިން ބުރުގައި ރޭ ކުޅުނު މެޗުތަކަށް ފަހު ކޮލަމްބިއާ އާއި ޗިލީ ފަހަަތަށް ޖައްސާލުމަށް ފަހު ޕެރޫ އިން ވޯލްޑް ކަޕް ކޮލިފައިން ޕްލޭއޮފް ޖާގައެއް ހޯދައިފި އެވެ. ޕެރޫ ވަނީ ރޭ ކުޅުނު މެޗުން ޕެރަގުއޭ އަތުން 2-0 އިން މޮޅުވެފަ އެވެ.
ދެކުނު އެމެރިކާގެ ވޯލްޑް ކަޕް ކޮލިފައިންގައި 10 ޓީމު ވާދަކުރާއިރު، ވޯލްޑް ކަޕްގެ ސީދާ ޖާގަ ލިބޭނީ ގަދަ ހަތަރު ޓީމަށެވެ. އެ ޖާގަތައް ހޯދީ ބްރެޒިލް، އާޖެންޓީނާ، އުރުގުއޭ އަދި އެކުއެޑޯ އެވެ.
އެއް ވަނައިގައި އޮތް ބްރެޒިލުން ރޭ 4-0 އިން ބޮލިވިއާ ބަލިކުރި އެވެ. ބްރެޒިލަށް 17 މެޗުން 45 ޕޮއިންޓް ލިބިފައިވާއިރު، އާޖެންޓީނާ ރޭ ވަނީ 1-1 އިން އެކުއެޑޯއާ އެއްވަރުވެފަ އެވެ. އާޖެންޓީނާ އަށް ވަނީ 17 މެޗުން 39 ޕޮއިންޓް ހޯދައިފަ އެވެ. ބްރެޒިލުން 45 ޕޮއިންޓް ހަމަކުރުމާ އެކު އެ ޓީމުން ވަނީ ވޯލްޑް ކަޕް ކޮލިފައިންގައި ދެކުނު އެމެރިކާގައި އެންމެ ރެކޯޑް ރަނގަޅު ޓީމުގެ ޝަރަފް ހޯދައިފަ އެވެ. މީގެ ކުރިން އެންމެ ރަނގަޅު ރެކޯޑެއް އޮތީ 2002 ގެ ވޯލްޑް ކަޕް ކޮލިފައިންގައި މާސެލޯ ބިއެލްސާ އާޖެންޓީނާ ގޮވައިގެން ވާދަކުރިއިރު އެވެ. އެ ފަހަރު ބިއެލްސާ އަށް ހޯދުނީ 43 ޕޮއިންޓެވެ. ކޮލިފައިންގައި އާޖެންޓީނާ އާއި ބްރެޒިލް ކުޅެން ޖެހޭ މެޗު އަދި ބާކީ އެބައޮތެވެ.
އުރުގުއޭ ތިން ވަނައިގައި އޮތީ 18 މެޗުން 28 ޕޮއިންޓާ އެކު އެވެ. ހަމަ އެ އަދަަދަށް މެޗު ކުޅެގެން އެކުއެޑޯ ވަނީ 26 ޕޮއިންޓާ އެކު ހަތަރު ވަނަ ހޯދައިފަ އެވެ.
ފަސް ވަނަ އަށް ޖެހޭނީ ޕްލޭއޮފް ކުޅޭށެވެ. ޕްލޭ އޮފްގެ ޖާގަ ޕެރޫ އިން ހޯދީ އަމިއްލަ ބާރުގައި ރޭގެ މޮޅާ އެކު އެވެ. ކޮލަމްބިއާ އިން ރޭ ވެނެޒުއޭލާ އަތުން 1-0 އިން މޮޅުވި އެވެ. އުރުގުއޭ އަތުން ޗިލީ ބަލިވީ 2-0 އިންނެވެ. ޕެރޫ އަށް 18 މެޗުން 24 ޕޮއިންޓް ލިބުނުއިރު، ކޮލަމްބިއާ އަށް ވަނީ 18 މެޗުން 23 ޕޮއިންޓް ލިބިފަ އެވެ. ޗިލީ ނިންމާލީ 18 މެޗުން 19 ޕޮއިންޓާ އެކު އެވެ.
ރޭ ޕެރަގުއޭ ކޮޅަށް ޕެރޫގެ ގޯލުތައް ޖެހީ އިޓަލީ އަށް އުފަން ފޯވާޑް، ޖިއަންލޫކާ ލަޕަޑޫލާ އާއި ޔޮޝިމޯ ޔޯޓުން އެވެ. އިންޓަ ކޮންޓިނެންޝިއަލް ޕްލޭއޮފްގައި ޕެރޫ ކުޅެން ޖެހޭނީ އޮސްޓްރޭލިއާ ނޫނީ ޔޫއޭއާއީ އެވެ. ޕެރޫ އެންމެ ފަހުގެ ވޯލްޑް ކަޕަށް ކޮލިފައިވީ ޕްލޭއޮފް ބުރުގައި ނިއު ޒީލެންޑް ބަލިކޮށްފަ އެވެ.
ބްރެޒިލުން ރޭ ކުޅުނު މެޗުގައި ބޮލިވިއާ ކޮޅަށް ގޯލުތައް ޖެހީ ރިޗާލިސަން ދެ ގޯލާއި ލޫކަސް ޕަކޭޓާ އަދި ބްރޫނޯ ގިމާރޭސް އެވެ. މެންޗެސްޓާ ސިޓީއާ ގުޅެން ނިންމާފައިވާ ހޫލިއަން އަލްވާރޭޒްގެ ގޯލުން އާޖެންޓީނާ ލީޑުނަގާފައިވަނިކޮށް އެކުއެޑޯ އަށް އެއްވަރުކޮށްދިނީ އެނާ ވެލެންސިއާ އެވެ.
ޗިލީ ދަނޑުގައި އުރުގުއޭ މޮޅުވިއިރު، އެ ޓީމުގެ ގޯލުތައް ޖަހައިދިނީ ލުއިސް ސުއަރޭޒާއި ފެޑެރީކޯ ވަލްވޭޑޭ އެވެ. ކޮލަމްބިއާ އިން ރޭ ވެނެޒުއޭލާ ބަލިކުރިއިރު، ގޯލު ޖެހީ ޕެނަލްޓީ އަކުން ހަމޭސް ރޮޑްރިގޭޒް އެވެ.
