ބީނޯޒް އެރީޒް، އާޖެންޓީނާ (ނޮވެމްބަރު 20) - ފީފާ ވޯލްޑް ކަޕް ކޮލިފައިން ދެކުނު އެމެރިކާ ބުރުގައި ރޭ ޕެރޫ އަތުން 1-0 އިން އާޖެންޓީނާ އިން އުނދަގޫ މޮޅެއް ހޯދިއިރު، އުރުގުއޭ އިން ލީޑުނަގާފައިވަނިކޮށް ބްރެެޒިލުން 1-1 އިން އެއްވަރުކޮށްފި އެވެ.
މި މެޗުތަކަށް ނުކުތްއިރު، އާޖެންޓީނާ ވަނީ އެންމެ ފަހުން ކުޅުނު މެޗުން ޕެރަގުއޭ އަތުން ބަލިވެފަ އެވެ. އަދި ބްރެޒިލުން ވެނެޒުއޭލާއާ ވީ އެއްވަރެވެ.
އަމިއްލަ ދަނޑުގައި ކުޅުނު އާޖެންޓީނާ އަށް ފުރަތަމަ ހާފުގައި މާ ރަނގަޅު އެޓޭކްތަކެއް ނުކުރެވުނު ނަމަވެސް، ދެ ވަނަ ހާފުގައި އެ ޓީމުން ވަނީ ލަސްތަކެއް ނުވެ ލަނޑު ޖަހައިފަ އެވެ. މެޗުގައި ފެނިގެންދިޔަ ހަމައެކަނި ގޯލު ޖެހީ 55 ވަނަ މިނިޓްގަ އެވެ. ލަޓައުރޯ މާޓީނޭޒް، އާޖެންޓީނާ އަށް މި ލަނޑު ޖަހައިދިނީ، އެ ޓީމުގެ ކެޕްޓަން، ލިއޮނަލް މެސީ ދިން ބޯޅައަކުންނެވެ.
އިތުރު ގޯލެއް ޖަހަން އާޖެންޓީނާ އިން ކުރި މަސައްކަތް ކާމިޔާބެއްނުވި އެވެ.
މި މޮޅާ އެކު، އާޖެންޓީނާ އިން ދެކުނު އެމެރިކާގެ ކޮލިފައިން ބުރުގެ އެއް ވަނައިގައި އޮތީ ފަސް ޕޮއިންޓުގެ ލީޑަކާ އެކު އެވެ. އެއީ، އާޖެންޓީނާ އަށް 12 މެޗުން 25 ޕޮއިންޓް ލިބިފައިވާއިރު، ދެ ވަަނައިގައި އޮތް އުރުގުއޭ އަށް 12 މެޗުން 20 ޕޮއިންޓް ލިބިފައިވުމުންނެވެ.
އެކުއެޑޯ އިން ވަނީ ރޭ 1-0 އިން ކޮލަމްބިއާ ބަލިކޮށްފަ އެވެ. މި ނަތީޖާއާ އެކު، ތިން ވަނައިގައި އޮތް އެކުއެޑޯ އާއި ހަތަރެއްގައި އޮތް ކޮލަމްބިއާ އަށް ވަނީ 12 މެޗުން 19 ޕޮއިންޓް ލިބިފަ އެެވެ.
ބްރެޒިލް، ފަސް ވަނައިގައި އޮތީ 12 މެޗުން 18 ޕޮއިންޓާ އެކު އެވެ.
އުރުގުއޭ އިން ބްރެޒިލް ކޮޅަށް ފެޑެރީކޯ ވަލްވޭޑޭގެ ގޯލުން ލީޑުނެގި އެވެ. އެކަމަކު ދެ ވަނަ ހާފުގައި، ޖާސަން ވަނީ މޮޅު ގޯލެއް ޖަހައި ބްރެޒިލަށް އެއްވަރުކޮށްދީފަ އެވެ.
