އައްޑޫ ސިޓީގައި އުމުރުން ހަ އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައިގައި އިތުރު މީހެއްގެ ބައިވެރިވުން އޮތްތޯ ބަލަމުން އަންނަ ކަމަށް ފުލުހުން މިއަދު ބުނެފި އެވެ.
ހިތަދޫގައި ދިރިއުޅޭ އެ ކުޑަކުއްޖާއަށް ޖިންސީ އަނިޔާ ކުރި މައްސަލައިގައި މިދިޔަ ހަފްތާގެ ބުރާސްފަތި ދުވަހު ފުލުހުން ވަނީ އެ ރަށު ސްކޫލެއްގައި މަސައްކަތް ކުރާ އުމުރުން 59 އަހަރުގެ އަންހެނަކު ހައްޔަރުކޮށްފަ އެވެ.
އެކަމަކު، ފުލުހުން ހައްޔަރުކުރީ ހަގީގަތުގައި ކުށް ކުރި މީހާ ނޫން ކަމަށް ބުނެ އައްޑޫގައި ބަޔަކު އަންނަނީ އިހްތިޖާޖު ކުރަމުންނެވެ. އިޖްތިޖާޖް ކުރުމުގެ ތެރޭގައި ހިނގައިދިޔަ ކަންތައްގަނޑެއްގެ ތެރޭގައި އިތުރު ބަޔަކު ހައްޔަރުކޮށްފައި އޮއްވާ މިއަދު ފުލުހުން ނެރުނު ބަޔާނެއްގައި ބުނީ، އިތުރު މީހަކު އެ ކުށުގައި ހިމެނޭތޯ ބަލަންޖެހޭ ކަންކަން ބަލަމުންދާ ކަމަށެވެ.
"... [މައްސަލައިގައި] އިތުރަށް ބަލަންޖެހޭ ކަންކަން ބަލައި އެ މައުލޫމާތުތަކުގެ ސައްހަކަން ކަށަވަކުރުމާއި މައްސަލައާ ގުޅިގެން ހޯދަންޖެހޭ ހެއްކާއި ގަރީނާ ހޯދައި، އިތުރު ފަރާތެއް މި މައްސަލާގައި ޝާމިލުވޭތޯ ބެލުމަށް ކުރަންޖެހޭ މަސައްކަތްތައް މި ޚިދުމަތުގެ ފަރާތުން ކުރަމުންގެންދާ ވާހަކަ ދަންނަވަން،" އެ ބަޔާނުގައި ބުނެފައިވެ އެވެ.
އެ މައްސަލަ ފުލުހުންނަށް ހުށަހެޅުމާ ގުޅިގެން ކުއްޖާ އަށް އެއްވެސް އަނިޔާއެއް ލިބިފައިވޭތޯ ބެލުމަށް ޑޮކްޓަރަށް ދައްކައި މެޑިކަލް އެސެސްމަންޓެއް ހަދާފައިވާ ކަމަށް ފުލުހުން ބުންޏެވެ. އެ މައްސަލައިގެ ތަހުގީގަށް ބޭނުންވާ ކުއްޖާގެ ނަފްސާނީ ހާލަތާ ގުޅޭ އެސެސްމަންޓްތައް ހެދުމަށާއި ކުއްޖާ އަށް ބޭނުންވާ ރައްކާތެރިކަން ފޯރުކޮށްދިނުމަށްޓަކައި ކުރަން ޖެހޭ މަސައްކަތް ކަމާ ގުޅުން ހުރި އިދާރާތައް ގުޅިގެން ކުރަމުން ގެންދާ ކަމަށް ވެސް ފުލުހުން ބުންޏެވެ.
"އޭގެ އިތުރުން، މައްސަލައިގެ ތަހުގީގާ ގުޅޭގޮތުން، މައްސަލައާ ގުޅުންހުރި ފަރާތްތަކާ ތަހުގީގު ޓީމުގެ ފަރާތުން ހިއްސާކުރަންޖެހޭ މައުލޫމާތު ދުވަހުން ދުވަހަށް މި ގެންދަނީ ހިއްސާ ކުރަމުން،" އެ ބަޔާނުގައިވެ އެވެ.
ފުލުހުން އެ މައްސަލަ އިތުރަށް ބަލަމުން ދާއިރު، ޖިންސީ ގޯނާ ކުރި ކަމަށް ތުހުމަތު ކުރާ މައްސަލަ އަވަސްކޮށްދިނުމަށް އައްޑޫ ސިޓީ ކައުންސިލުން ވަނީ ގޮވާލައިފަ އެވެ.
އެ މައްސަލައިގައި އައްޑޫގައި މުޒާހަރާ ކުރަން ފެށީ އިއްޔެ މެންދުރުގެ ވަގުތެއްގަ، އާންމުން އެ މައްސަލައިގައި ތުހުމަތު ކުރާ މީހާ ދިރިއުޅޭ ގެ ކައިރީގަ އެވެ. މުޒާހަރާގެ ބައިވެރިން ފުލުހުން އެތަނުން ދުރަށް ފޮނުވާލީ ބާރުގެ ބޭނުންކޮށްގެނެވެ. މުޒާހަރާގެ ބައެއް ބައިވެރިން ހައްޔަރު ކުރީ އޭގެ ފަހުން، ރޭގެ ދަންވަރުގެ ވަގުތެއްގައިކަން އެނގިފައިވެ އެވެ.
