އަމްސްޓެޑަމް، ނެދަލެންޑްސް (މާޗް 29) - މެންޗެސްޓާ ޔުނައިޓެޑަކީ ފުޓްބޯޅަ ކްލަބަކަށް ވުރެ ބޮޑަށް ވިޔަފާރި އުސޫލުން ހިންގާ ކްލަބެއް ކަމަށް އެ ޓީމަށް ކުރިން ކޯޗުކޮށްދިން އަދި މިހާރު ނެދަލެންޑްސް ގައުމީ ޓީމުގެ ކޯޗު ލުއީ ވެން ހާލް ބުނެފި އެވެ.
ވެން ހާލް މިހެން ބުނީ އަޔަކްސް ކޯޗަކަށް ހުރި އެރިކް ޓެން ހާގް ގެންދަން ޔުނައިޓެޑުން މަސައްކަތް ކުރަމުން އަންނަ ވާހަކަ މީޑިއާގައި ދެކެވޭތީ އެކަމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެމުންނެވެ.
މިިދިޔަ އަހަރު ނެދަލެންޑްސް ގައުމީ ޓީމާ ހަވާލުވި ވެން ހާލް ވަނީ 2014 އިން 2016 އަށް ޔުނައިޓެޑަށް ކޯޗުކޮށްދީފަ އެވެ. އަޔަކްސްގެ ކޯޗު ޓެން ހާގް ޔުނައިޓެޑަށް ދިއުމަކީ ރަނގަޅު ގޮތެއްތޯ އެހުމުން ވެން ހާލް ބުނީ އޭނާ ދެކޭ ގޮތުގައި އެއީ ރަނގަޅު ނިންމުމަކަށް ނުވާނެ ކަމަށެވެ.
"އެރިކް ޓެން ހާގް އަކީ މޮޅު ކޯޗެއް. އޭނަ މެންޗެސްޓާ ޔުނައިޓެޑަށް ގޮސްފިނަމަ އެއީ އެ ކްލަބަށް ރަނގަޅެއް. އެކަމަކު، މެންޗެސްޓާ ޔުނައިޓެޑަކީ ވިޔަފާރި ކްލަބެއް. އެހެންވީމަ ޔުނައިޓެޑަށް ދާން ކޯޗުން ނިންމަން މި ޖެހެނީ އުނދަގޫ ނިންމުމެއް. އޭނަ (ޓެން ހާގް) އަށް ބޮޑަށް ރަނގަޅުވާނީ ފުޓްބޯޅަ ކްލަބެއް ގޮތަށް ހިންގާ ޓީމަކަށް ދިއުން،" ވެން ހާލް ބުންޏެވެ.
ކުރިން ބާސެލޯނާ އާއި ބަޔާން މިއުނިކަށް ވެސް ކޯޗުކޮށްދިން ވެން ހާލް ބުނީ ޓެން ހާގް ގާތުގައި ވަކި ގޮތަކަށް ކަންކަން ކުރަން ލަފާނުދޭނެ ކަމަށާއި މީގެ ވިސްނަން ޖެހޭނީ ފުޓްބޯޅަ ކްލަބަކާ ގުޅުމަށް ކަން ވިސްނެން ޖެހޭނެ ކަމަށެވެ.
މި ސީޒަނުގައި ޔުނައިޓެޑުން ވަނީ އޮލެ ގުނަ ސޯލްޝެއާ ވަކިކޮށް ވަގުތީ ގޮތުން ރަލްފް ރަންގްނިކް ކޯޗަކަށް ގެނެސްފަ އެވެ. މި ސީޒަން ނިމުމުން ރަންގްނިކް ބަދަލުވާނީ ޔުނައިޓެޑްގެ އެޑްވައިޒަރީ ރޯލަކަށެވެ.
ޔުނައިޓެޑާ ހަވާލުވާނެ ކޯޗެއް ހޯދުމުގެ މަސައްކަތް ކުރަމުންދާއިރު، ޓެން ހާގްގެ ނަން ޔުނައިޓެޑުން ބޭނުންވާ ކޯޗުންގެ ލިސްޓުގައި ހިމެނެ އެެވެ. ދެން، އެ ލިސްޓުގައި އޮތް ނަންތަކަށް ބަލާއިރު، ޕީއެސްޖީގައި ހުރި ކޯޗު މައުރީސިއޯ ޕޮޗެޓީނޯ، ސްޕެއިންގެ ކޯޗު ލުއިސް އެންރީކޭ އަދި ސެވިއްޔާއާ ހަވާލުވެހުރި ސްޕެއިންގެ ކުރީގެ ކޯޗު ހުލެން ލޮޕެޓެގީ ހިމެނެ އެވެ.
ޔުނައިޓެޑްގެ ކޯޗުކަމަށް އެ ޓީމުގެ ކުރީގެ ތަރި ވޭން ރޫނީ ވެސް ޝައުުގުވެރިވެ އެވެ. ޑާބީ ކައުންޓީގެ ކޯޗަކަށް ހުރި ރޫނީ ބުނީ މިއީ އޭނާ ޔުނައިޓެޑާ ހަވާލުވާން އެންމެ ރަނގަޅު ވަގުތަށް ނުވެދާނެ ކަމަށާއި އެކަަމަކު، މުސްތަގުބަލުގައި އެ ފަދަ ފުރުސަތަކަށް އެދިއެދި ހުރި ކަމަށެވެ.
