ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ޗެއާޕާސަން ކަމަށް ވާދަކުރައްވަން ނިންމެވީ ރައްޔިތުންގެ މަޖިލީހުގެ ރައީސް އަދި ޕާޓީގެ ރައީސް މުހައްމަދު ނަޝީދުގެ ވެސް އެހީތެރިކަމާ އެކުގައި ކަމަށާއި، ނަމަވެސް ފަހުން އެމަނިކުފާނުގެ ހިޔާލު ބަދަލުވީ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެ އެވެ.
އެމްޑީޕީގެ ޗެއާޕާސަންގެ އިންތިހާބުގެ ކެމްޕޭނަށް ރަށްރަށަށް ކުރައްވާ ދަތުރުތަކުގެ ތެރެއިން ގދ. ފަރެސްމާތޮޑާ އަށް ވަޑައިގެން ފައްޔާޒް ވިދާޅުވީ އޭނާ ޗެއާޕާސަންކަމަށް ވާދަކުރަނީ ނަޝީދު އެޕާޓީގެ ހަރަކާތްތަކުން އެކަހެރިކުރަން ނުވަތަ، ބޭރުކުރަން ވެސް ނޫން ކަމަށެވެ. އަދި އެފަދަ ވިސްނުމެއް، އެ މަގާމަށް ވާދަކުރުމުގެ ކުރިންވެސް އަދި މިހާރުވެސް ނުގެންގުޅުއްވާ ކަމަަށް އޭނާ ވިދާޅުވި އެވެ.
ފައްޔާޒް މިފަދައިން ވިދާޅުވީ ނަޝީދު އެ ޕާޓީން ވަކިކުރަން މަސައްކަތް ކުރައްވާ ކަމަށް އެމަނިކުފާނުގެ ސަޕޯޓަރުން ކުރާ ތުހުމަތުތައް ދޮގުކުރައްވަމުންނެވެ.
"ރައީސް ނަޝީދު ބާކީ ކުރާކަށްވެސް، އެކަހެރި ކުރާކަށްވެސް، ޕާޓީއިން ބޭރުކުރާކަށްވެސް، އެއްވެސް ކަހަލަ ނިޔަތެއް އޮވެގެން ނޫން އަޅުގަނޑު މިކަން ފެށީ، އަޅުގަނޑު މިކަން ފެށީ ރައީސް ނަޝީދުގެވެސް އެހީތެރިކަމާ އެކު، ދެން ހިޔާލު ފަހުން ބަދަލުވީ،" ފައްޔާޒް ވިދާޅުވި އެވެ.
"އަޅުގަނޑަކީ ސިޔާސީ މީހެއް، އަޅުގަނޑު އިލެކްޝަނަކުން ބަލިވުމަކީ އަޅުގަނޑަށް މައްސަލައެއް ނޫން، ފަހަތަށް ޖެހުމަކީ އަޅުގަނޑަށް މައްސަލައެއް، އެހެންވީމަ އަޅުގަނޑަށް [ޗެއާޕާސަންކަމަށް] ނުކުތުމުގައި ފަހަތަށް ޖެހެވޭކަށް ނެތް."
ފައްޔާޒް ވިދާޅުވާ ގޮތުގައި ނަޝީދު އެމްޑީޕީއިން ވަކިކުރެވޭނެ މީހެއް މި ރާއްޖެއަކުވެސް ނެތެވެ. އޭނާ އެ އިންތިހާބު ކާމިޔާބުކޮށް، އެމްޑީޕީގެ ޗެއާޕާސަން ކަމަށް އާދެވުމަކީވެސް ނަޝީދު އެޕާޓީއިން ވަކިކުރެވޭނެ ކަމެއް ނޫން ކަމަށް ފައްޔާޒު ވިދާޅުވި އެވެ.
ޗެެއާޕާސަންގެ އިންތިހާބާއެކު ނަޝީދަށް ތާއީދު ކުރައްވާ ބޭފުޅުންނާއި އެމްޑީޕީގެ އެންމެ އިސް ލީޑަރު ރައީސް އިބްރާހިމް މުހައްމަދު ސޯލިހަށް ތާއިދު ކުރައްވާ ބޭފުޅުންގެ މެދުގައި ފެކްޝަން އުފެދި ދެ ފެކްޝަންގެ ކޯޅުން ވެސް ވަނީ ބޮޑުވެފަ އެވެ.
ފައްޔާޒު އަންނަނީ ރާއްޖޭގެ އެކި ރަށްތަކަށް ދަތުރުކޮށް އެ ރަށްތަކުގައި ދިރިއުޅޭ އެމްޑީޕީ މެމްބަރުންގެ ތާއީދު ހޯދުމަށް ކެމްޕޭން ދަތުރުތައް ކުރައްވަމުންނެވެ. އަދި، އޭނާގެ އިދިކޮޅަށް ނުކުންނަވާ އިމްތިޔާޒު ފަހުމީ ވެސް ގެންދަވަނީ ބުރަކޮށް ކެމްޕޭން ކުރައްވަމުންނެވެ.
