މެޑްރިޑް (މާޗް 21) - ސްޕެނިޝް ލީގުގައި މިރޭ ރެއާލް މެޑްރިޑް ދަނޑުގައި ކުޅުނު އެލްކްލަސިކޯ މެޗުގައި ބާސެލޯނާ އިން 4-0 އިން މޮޅުވެ، އެ ޓީމުގެ ފެންވަރު ދައްކާލައިފި އެވެ.
މިރޭގެ މެޗުގެ ކުރިން އެންމެ ފަހުން ބާސެލޯނާއާ ދެކޮޅަށް ކުޅުނު ހަ މެޗުން ވެސް މޮޅުވީ ރެއާލް އެވެ. އޭގެ ތެރޭގައި މިދިޔަ ޖެނުއަރީ މަހު ސްޕެނިޝް ސުޕަ ކަޕްގައި ޒަވީ ހަވާލުވި ފަހުން ބާސެލޯނާ އަތުން ރެއާލް ވަނީ 3-2 އިން މޮޅުވި މެޗު ހިމެނެ އެވެ. އެކަމަކު، ޖެނުއަރީ މަހުގެ ޓްރާންސްފާ މާކެޓްގައި ބާސެލޯނާ އިން ގަތް ޕިއޭ އެމެރިކް އޮބާމަޔަން އާއި ފެރާން ޓޮރޭޒް ދެއްކި ތަފާތާ އެކު މިރޭ ބާސެލޯނާ ވަނީ ރެއާލް ކައިރިން ފުރިހަަމަ މޮޅެއް ހޯދައިފަ އެވެ. މިއީ ބާސެލޯނާ އިން ދަމަހައްޓަމުން އައި ރަނގަޅު ފޯމަށް އިތުރުވި ބޮޅެކެވެ.
ދެ އަހަރު ތެރޭ ފުރަތަމަ ފަހަރަށް ރެއާލްގެ ސަންޓިއާގޯ ބާނަބެއުގައި ކުޅުނު ފުރަތަމަ ކްލަސިކޯ މެޗު ފަށައިގެން ބާސެލޯނާގެ އަަވަސް އެޓޭކްތަކާ އެކު ރެއާލް ހާސްކޮށްލި އެވެ. މެޗުގެ ކުރީކޮޅުގައި ބާސެލޯނާގެ އޮބާމަޔަން އާއި ޓޮރޭޒް އަދި އޮސްމާން ޑެމްބެލޭގެ އެޓޭކްތައް ހުއްޓުވީ ރެއާލްގެ ކީޕަރު ތިބައު ކޯޓުއާ އެެވެ.
އެކަަމަކު، މެޗުގެ 29 ވަނަ މިނިޓްގައި ޑެމްބެލޭ ނެގި ހުރަހަކުން އޮބާމަޔަން ބޮލުން ގޯލު ޖަހައި، ބާސެލޯނާ އަށް ލީޑުނަގައިދިނެވެ. އެ ގޯލަށް ފަހު ރެއާލް ކުރިއަށް ޖެހި މެޗުގައި ހަމަޖެހިނުލެވެނިސް ބާސެލޯނާ އިން ދެ ވަނަ ގޯލެއް ޖެހި އެވެ. މިއީ މެޗުގެ 38 ވަނަ މިނިޓްގައި ޑެމްބެލޭ ނެގި ކޯނަރަކުން އުރުގުއޭގެ ޑިފެންޑަރު ރޮނާލްޑް އަަރައުހޯ ބޮލުން ޖެހި ގޯލެކެވެ.
ރެއާލްގެ ވިނީޝިއުސް (ކ) އާއި ޖެރާޑް ޕީކޭ ޕެނަލްޓީއެއްގެ މައްސަލައެއްގައި ޒުވާބު ކުރަނީ.-- ފޮޓޯ: އޭއެފްޕީ
ރެއާލްގެ އެއް ވަނަ ފޯވާޑް، އަދި ކެޕްޓަން ކަރިމް ބެންޒެމާ ކުޑަކަޅުވާ އަށް ލިބިފައިވާ އަނިޔާއެއްގެ ސަބަބުން މިރޭގެ މެޗުގައި ނުކުޅެ އެވެ.
ރެއާލްގެ އެޓޭކް ލީޑުކުރަމުން ދިޔަ ވިނީޝިއުސް ޖޫނިއާ ވަނީ އަމިއްލަ ހުނަރު ބޭނުންކޮށް، އެހެން ކުޅުންތެރިންނާ ގުޅިގެން އެޓޭކްތަކެއް ކުރެވޭތޯ ބަލައިފަ އެވެ. އޭގެ ތެެރެއިން ފުރުސަތެއްގައި ވިނީޝިއުސް އަށް ބާސެލޯނާ އޭރިއާތެރެއިން ފައުލެއް ކުރި ކަމަށް ބުނެ، ޕެނަލްޓީ ހޯދަން އެޕީލްކުރި ނަމަވެސް ރެފްރީ އެގޮތަށް އެއްބަހެއްނުވި އެވެ.
ދެ ވަނަ ހާފްގެ ކުޅުން ފެށިގެން ވެސް ރެއާލަށް ހިންދެމިލެވޭވަރު ނުވެ، ކުޅެން ޖެހުނީ ޕްރެޝަރުގަ އެވެ. މި ހާފް ފެށިގެން ދެ ވަނަ މިނިޓްގައި އޮބާމަޔަން ދިން ބޯޅައަކުން ޓޮރޭޒް ގޯލު ޖެހި އެވެ. އޭގެ ތިން މިނިޓް ފަހުން ޓޮރޭޒް ދިން ބޯޅައަކުން އޮބާމަޔަން ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ. އެންމެ ފުރަތަމަ ނިންމީ އޮބާމަޔަންގެ ގޯލު އޮފްސައިޑް ކަމަށެވެ. އެކަމަކު އެ ގޮތަށް ގޮތް ނިންމައިގެން ހުއްޓައި ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ގޯލެއް ކަމަށެވެ. އެ ނިންމުމާ މެދު ރެއާލުން ވަރަށް ބޮޑަށް ނުރުހުނެވެ.
ބާސެލޯނާގެ އޮބާމަޔަން އަށް ފަހުން ވެސް ގޯލު ޖަހާނެ ފުރުސަތު ލިބުނެވެ. އެކަމަކު، ހެޓްރިކެއް ހެދުމުގައި ކާމިޔާބެއް ނުލިބުނެވެ. އޮބާމަޔަންގެ ބަދަލުގައި ކުޅެން އެރި މެމްފިސް ޑިޕާއި ޖެހި ބޯޅަ ކޯޓުއާ ވަނީ މަތަކޮށްފަ އެވެ. އަދި ރެއާލުން ގޯލެއް ޖެހޭތޯ ކުރަމުންދިޔަ މަސައްކަތުގައި އެ ޓީމުގެ ކުޅުންތެރިންގެ ހަމަލާތައް ހުއްޓުވީ ބާސެލޯނާގެ ޖަރުމަނު ކީޕަރު މާކް އަންދްރޭ ޓާ ސްޓެގެން އެވެ.
މި ނަތީޖާއާ އެކު ބާސެލޯނާ އިން ވަނީ ބަލިނުވެ، 11 މެޗު ހަމަކޮށްފަ އެވެ.
ސްޕެނިޝް ލީގު ތާވަލުގެ އެއް ވަނައިގައި ރެއާލް އޮތީ 29 މެޗުން 66 ޕޮއިންޓާ އެކު އެވެ. ދެ ވަނައިގައި އޮތީ 29 މެޗުން 57 ޕޮއިންޓް ހޯދައިގެން ސެވިއްޔާ އެވެ. ސެވިއްޔާ މިރޭ ވަނީ ރެއާލް ސޮސިއެޑާޑާ ލަނޑެއް ނުޖެހި 0-0 އިން އެއްވަރުވެފަ އެވެ. ތިން ވަނައިގައި އޮތް ބާސެލޯނާ އަށް 28 މެޗުން ވަނީ 54 ޕޮއިންޓް ލިބިފަ އެވެ. އެތުލެޓިކޯ ހަތަރު ވަނައިގައި އޮތީ 29 މެޗުން 54 ޕޮއިންޓް ހޯދައިގެންނެވެ.
