ރާއްޖެ އެތެރެކުރާ ތެލުގެ ކޮލިޓީ ޓެސްޓުކުރަން އެސްޓީއޯ އިން ހުޅުވާފައިވާ ޖިއީއޯ ކެމް ފިއުލް ޓެސްޓިން ލެބޯރަޓަރީގައި މިދިޔަ ބުރާސްފަތި ދުވަހު ފުރަތަމަ ފަހަރަށް ތެޔޮ ޓެސްޓުކޮށްފި އެވެ.
މި ލެބުގައި އެންމެ ފުރަތަމަ ކުރި ޓެސްޓަކީ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ޖެޓް ފިއުލް ޓެސްޓެކެވެ.
މިއީ ރާއްޖޭގައި މިގޮތަށް ތެލުގެ ސާމްޕަލެއް ޓެސްޓުކުރި ފުރަތަމަ ފަހަރު ވެސް މެ އެވެ.
ބައިނަލްއަގުވާމީ ވައިގެ ދަތުރުފަތުރުގެ ގަވާއިދުތައް އޮންނަ ގޮތުން، ފްލައިޓަކަށް ތެޔޮ އެޅުމުގެ ކުރިން ޓޭންކުގައި ހުރި ތެޔޮ ޓެސްޓުކުރަން ޖެހެ އެވެ.
ކޮންމެ ދިހަ ދުވަހަކުން އެމްއޭސީއެލަށް ތެޔޮ ޝިޕްމަންޓެއް ލިބޭއިރު، މި ލެބު ގާއިމުކުރުމުގެ ކުރިން މި ޓެސްޓުތައް ކުރަން ފޮނުވަން ޖެހެނީ މުޅީން ވެސް ރާއްޖޭން ބޭރަށެވެ.
އެސްޓީއޯގެ މި ލެބު އޮޕަރޭޓު ކުރަނީ ޕްރޮޑަކްޓު ޓެސްޓިންގައި ބައިނަލްއަގުވާމީ ގޮތުން ފާހަގަކޮށްލެވޭ ޖީއީއޯ ކެމް މިޑްލްއީސްޓު ކުންފުނިންނެވެ.
އެސްޓީއޯ އިން ލެބް ހިންގުމުގެ ބަދަލުގައި ފަންނީ ތަޖުރިބާ ހުރި ބަޔަކާ މިކަން ހަވާލުކުރީ، ބައިނަލްއަގުވާމީ ފެންވަރުގައި ބަލައިގަންނަ ލެބަކަށް މި ލެބް ހެދުމުގެ ބޭނުމުގަ އެވެ.
މި ލެބުން ދޫކުރާ ސެޓިފިކެޓަކީ އައިއެސްއޯ-އައިއެސްއައި ސެޓިފިކޭޝަން ލިބިފައިވާ، ދުނިޔޭގެ ކޮންމެ ގައުމަކުން ވެސް ބަލައިގަންނާނެ ސެޓިފިކެޓެވެ.
ޖެޓް ފިއުލްގެ އިތުރުން މި ލެބުން ޕެޓްރޯލާއި ޑީސަލް ސާމްޕަލްތައް ވެސް ޓެސްޓުކުރެވެ އެވެ.
