ސިނަމާލެ ބްރިޖުން ކައިރިއަށް ވެލައެއް އަރައި ރޭ ދަންވަރު އެޅި 96 ބިސް ވިއްސުމަށް ފޯސީޒަން ކުޑަހުރާ ރިސޯޓަށް ފޮނުވާލައިފި އެވެ.
މަންޒަރު ދުށް މީހުން ބުނާ ގޮތުގައި ބްރިޖުން މާލެ އަށް ފައިބާ ތަނުގައި އޮތް ފަސްގަނޑަށް ރޭ އިރާކޮޅު އެރި ވެލާ ބިސް އެޅީ ދަންވަރު އެވެ. މީގެ ތިން ހަފުތާ އެއްހާ ދުވަސް ކުރިން، ފެބްރުއަރީ 27، ގައި ވެސް އެ ސަރަހައްދަށް ބިސް އަޅަން ވެލައެށް އެރި އެވެ. އެ ވެލައަށް ބިސް ނޭޅިގެން އުޅެނިކޮށް، ފުލުހުން ވަނީ އޭތި "ފައްސާލައިފަ" އެވެ. ނަމަވެސް ރޭ ބިސްއަޅަން އައި ވެލައަށް ފުލުހުން ހިމާޔަތްދިނެވެ.
އެންވަރަމަންޓް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓާ ޖެނަރަލް އިބްރާހީމް ނައީމް ވިދާޅުވި ގޮތުގައި ކުޑަހުރާގައި ހުންނަ މެރިން ސޭވާސް ގެ ސެންޓަރަށް ހުރިހާ ބިހެއް ނަގައި ފޮނުވާލީ، ވެލާ ބިސް އެޅި ތަނަކީ އެ ބިސްތައް ފީކޮށް ވިއްސުމަށް އެކަށީގެންވާ ތަނަކަށް ނުވާތީ އެވެ. އަދި ކުރިއަށް އޮތް ތަނުގައި ވެސް ވެލައެއް އެ ސަރަހައްދަށް ބިސް އަޅައިފި ނަމަ ޖެހޭނީ ބިސްތައް ނަގައި އެހެން ތަނެއްގައި ވިއްސަން ކަމަށް އޭނާ ވިދާޅުވި އެވެ.
"މެރިން ސޭވާސް އިން ބިސްތައް ވިއްސާނެ، އަދި އެ މައުލޫމާތު ހިއްސާ ކުރަމުން ގެންދާނެ، އެ ވެލާ އެޅީ 96 ބިސް، 40-60 ދުވަސް ވަރު ނަގާނެ ބިސްތައް ވިހަން،" ނައީމް ވިދާޅުވި އެވެ.
ވޭތުވެދިޔަ ތިރީހަކަށް އަހަރު ދުވަހުގެ ތެރޭގައި ވެސް މާލެ އަށް ވެލައެއް ބިސް އެޅިކަން އެނގޭކަށް ނެތެވެ. ވެލައާ ބެހޭ ތަޖުރިބާކާރުން ބުނާ ގޮތުން، ވެލާ ބިސް އަޅަން އަރާނީ އެ ވެލައެއް އުފަންވި ތަނަކަށެވެ. އެހެންކަމުން، ރޭގަ ބިސް އެޅި ވެލަ އަކީ ކޮންމެވެސް ގޮތަކުން މާލެ އަށް އުފަންވި ވެލައެއް ކަމަށް ލަފާކުރެވެ އެވެ.
ކުޑަހުރާގެ މެރިން ސޭވާސް ގެ ފަރާތުން، ވެލާ ހިމާޔަތް ކުރުމަށް ގިނަ މަސައްކަތްތަކެއް ކުރިއަށް ގެނދެ އެވެ. ތަފާތު ގެއްލުންތައް ލިބިފައިވަނިކޮށް ފެންނަ ވެލަ އަށް އާންމުކޮށް ފަރުވާ ދެނީ ވެސް މެރިން ސޭވާސް އިންނެވެ. ވެލައާ ބެހޭ ދިރާސާކޮށް ފަރުވާދޭ ސެންޓަރެއްް އެ ރިސޯޓުގައި ގާއިމުކޮށްފައިވެ އެވެ.
