ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ދަ ގްރާންޑޭ ސްޕޯޓްސް ކްލަބް 4-0 އިން ބަލިކޮށް ޓީސީ ސްޕޯޓްސް ކްލަބް ލީގުގެ ހަތަރު ވަނަ އަށް ޖެހިލައިފި އެވެ.
ޖެހިޖެހިގެން ލީގުގައި ހޯދި ދެ ވަަނަ މޮޅާ އެކު ޓީސީ ހަތަރު ވަނަ އަށް އެރީ ހަ މެޗުން ނުވަ ޕޮއިންޓް ހޯދައިގެންނެވެ. ފަސް ވަނައިގައި އޮތް ޔުނައިޓެޑް ވިކްޓްރީ (ޔޫވީ) މިރޭ ކުޅޭ މެޗުން ސުޕަ ޔުނައިޓެޑް ސްޕޯޓްސް (ސަސް) އަތުން މޮޅުވެއްޖެނަމަ އެ ޓީމު އަލުން ހަތަރަކަށް އަރާނެ އެވެ. ޔުނައިޓެޑް ވިކްޓްރީ، މި ވަގުތު ފަސް ވަނައިގައި އޮތީ ފަސް މެޗުން ހަތް ޕޮއިންޓާ އެކު އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ޓީސީން ކުރިއަށް ޖެހިގެން ކުޅެމުންދިޔައިރު، އެ ޓީމުން ވަނީ 12 ވަަނަ މިނިޓްގައި ލީޑުނަގައިފަ އެވެ. މިއީ ދަ ގްރާންޑޭގެ ކީޕަރު އިސްމާއިލް ޝިހާމް ހެދި ބޮޑު ގޯހެއްގެ ފައިދާނަގައި ޓީސީން ޖެހި ގޯލެކެވެ. ކީޕަރު ޝިހާމް އެ ޓީމުގެ އެހެން ކުޅުންތެރިއަކަށް ދޭން އެއްލި ބޯޅަ ޓީސީގެ މިސްރު ފޯވާޑް މުހައްމަދު ސަލާހަށް ލިބުމުން އޭނާ ވަނީ ތިރިތިރިން ގޯލަށް ފޮނުވާލައިފަ އެވެ.
ފުރަތަމަ ހާފުގައި ދަ ގްރާންޑޭ އަށް އެއްވަރުކޮށްދޭން އެ ޓީމަށް ކުޅޭ ސްރީ ލަންކާ ގައުމީ ޓީމުގެ ދެ ކުޅުންތެރިން ކަމަށްވާ ޗަމޯދު ދިލްޝާން އާއި މުހައްމަދު އާކިބް ވަނީ ރަނގަޅު ހަމަލާތަކެއް ފޮނުވާލައިފަ އެވެ. އޭރިއާބޭރުން ޗަމޯދު ތިރިތިރިން ޖެހި ބޯޅަ ޓީސީ ގޯލުގައި ހުރި ލަންކާ ގައުމީ ޓީމުގެ ކީޕަރު ސުޖަން ޕެރޭރާ ވަނީ މަތަކޮށްފަ އެވެ. އޭގެ ފަހުން ހިލޭޖެހުމަކުން އާކިބް ޖެހި ބޯޅަ ވެސް ކީޕަރު ސުޖަން ވަނީ ހުއްޓުވައިފަ އެެވެ.
ޓީސީން ލީޑުފުޅާކުރި ގޯލު ޖެހީ މެޗުގެ 65 ވަނަ މިނިޓްގަ އެވެ. މި ގޯލު ޖެހީ ބަދަލެއްގެ ގޮތުގައި ކުޅެން އެރި މުހައްމަދު މުސްލިހު (މުއްޓި) އެވެ. ހިލޭޖެހުމަކުން މުއްޓި ފޮނުވާލި ބޯޅަ ގޯލަށް ވަނީ ކީޕަރު ޝިހާމް އަތުގައި ޖެހިފަ އެވެ. އޭގެ ފަސް މިނިޓް ފަހުން ދަ ގްރާންޑޭ އަށް ގޯލެއް ޖަހައިދޭން އެ ޓީމުގެ ޖަޕާން މިޑްފީލްޑަރު ޔޫގޯ ކަވަބާޓާ ޖެހި ބޯޅަ ކީޕަރު ސުޖަން ވަނީ މަތަކޮށްފަ އެވެ.
ދަ ގްރާންޑޭ އިން ފުރުސަތު ނަގާލިތާ މާގިނައިރެއްނުވެ، ޓީސީން ވަނީ ލިބުނު ފުރުސަތެއްގެ ބޭނުންހިފައި ތިން ވަނަ ގޯލެއް ޖަހައިފަ އެވެ. މި ގޯލު ވެސް ޖެހީ މުއްޓި އެވެ. މެޗުގެ 74 ވަނަ މިނިޓްގައި ދަ ގްރާންޑޭގެ ދެ ޑިފެންޑަރުން ކައިރިން ދެމިގަތުމަށް ފަހު މުއްޓި ޖެހި ބޯޅަ ވަނީ ގޯލުގެ ކަނަށެވެ. އޭގެ ފަސް މިނިޓް ފަހުން ޓީސީގެ ހަތަރު ވަަނަ ގޯލު ޖެހީ މުހައްމަދު އަޖުފާން އެވެ. މުއްޓި ކޮންޓްރޯލް ކޮށްލި ބޯޅަ އަޖުފާން ވަނީ ތިރިިތިރިން ގޯލުގެ ތެރެއަށް ފޮނުވާލައިފަ އެވެ.
މެޗުގެ ފަހު މިނިޓްގައި ވެސް ދަ ގްރާންޑޭގެ ޔޫގޯ އަށް ރަނގަޅު ފުރުސަތެއް ލިބުނެވެ. އޭރިއާތެރެއިން ޔޫގޯ ޖެހި ބޯޅަ ބާރެއްނެތްއިރު، ކީޕަރު ސުޖަން ވަނީ ފަސޭހައިން އަތަށް ނަގައިފަ އެވެ. މެޗުގެ އިތުރު ވަގުތުގައި ހެޓްރިކެއް ހަދަން މުއްޓި އަށް ލިބުނު ހުސް ފުރުސަތުގައި އޭނާ ޖެހި ބޯޅަ ދިޔައީ އަރިމަތިން ބޭރުންނެެވެ.
ޔުނައިޓެޑް ވިކްޓްރީ އާއި ސަސް ކުޅޭ މެޗު ފަށާނީ މިރޭ ނުވައެއް ޖަހާއިރު އެވެ.
