މާލޭގެ ރައްޔިތުންނަށް ގޯތި ދޭން ސަރުކާރުން ކަނޑައަޅާފައި އޮތީ މައިގަނޑު ހަތަރު ޝަރުތެއް ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ގަލޮޅު އުތުރު ދާއިރާގެ މެމްބަރު މީކާއީލް އަހުމަދު ނަސީމް ކުރެއްވި ސުވާލަކަށް ޖަވާބުދެއްވަމުން އަސްލަމް ވިދާޅުވީ މާލޭގެ ރައްޔިތުންނަށް ގޯތި ދޭނެ ކްރައިޓީރިއާ އެކުލަވައިލުމުގެ މަސައްކަތް މިހާރު ކުރަމުން އަންނަ ކަމަށެވެ. އެހެން ނަމަވެސް އެކަމުގައި މާބޮޑެތި ކްރައިޓީރިއާތަކެއް ނެތް ކަމަށް ވެސް އޭނާ ވިދާޅުވި އެވެ.
"މާބޮޑެތި ކްރައިޓީރިއާތަކެއް ހުރި ކަމެއް ނޫން ކަމަކީއެއް. އޮތީ ހަތަރު ކަމެއް މިހައިތަނަށް އަޅުގަނޑުމެންނަށް ފާހަގަކުރެވިފައި،" އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި ގޯތި ދިނުމުގެ ކްރައިޓީރިއާ އެކުލަވައިލާ ނިންމާނީ ރައްޔިތުންގެ މަޖިލީހުގެ މާލޭގެ ދާއިރާތަކުގެ މެމްބަރުންނާއި ރައީސް އޮފީހުގެ ޕޮލިސީ ޓީމާ ވެސް މަޝްވަރާކޮށްގެން ކަމަށް އޭނާ ވިދާޅުވި އެވެ.
ގޯއްޗަށް ކުރިމަތިލުމުގެ ޝަރުތުތައް
- މާލެއަށް އުފަން މާލޭގެ ރައްޔިތަކަށްވުން
- މާލޭގައި 600 އަކަފޫޓަށް ވުރެ ބޮޑު ބިމެއް އެ މީހެއްގެ ނަމުގައި ރަޖިސްޓްރީކޮށްފައި ނެތުމާއި ވާރުތަވާން ވެސް ނެތުން
- މާލޭގެ ދަފްތަރުގައި ޖެހިގެން މާލޭގައި ދިރިއުޅޭ މީހުންނަށް ލިބުނު ދަރިންގެ ތެރެއިން ދަފްތަރުގައި ނުވަތަ މާލޭގެ ގެއެއްގައި ރަޖިސްޓްރީ ވެފައިވާ މީހަކަށްވުން.
- އުުމުރާއި ދިރިއުޅުމުގެ ހާލަތު.
އަސްލަމް ވިދާޅުވީ ޕޮއިންޓް ދޭ އުސޫލެއްގެ ތެރޭގައި އުމުރާއި ދިރިއުޅުމުގެ ހާލަތު ހިމަނަނީ ވަކިވަރަކަށްވުރެ އުމުރުން ދުވަސްވެފައިވާ ފަރާތްތަކަށް ގޯތި ދިނަސް، އެތަނުގައި ގެއެއް އިމާރާތްކުރުމަށް ބޭނުންވާ ފައިސާ ހޯދުން ފަދަ ކަންތައްތަކުގައި ދަތިތަކެއް ހުންނާނެތީ ކަމަށެވެ.
"އެކި އުމުރުތަކަށް ސްކޯކުރުން ތަފާތުވޭ. 18 އަހަރާއި 25 އަހަރާއި އަދި އަނެއްކޮޅުން ޓެއިލް އިންޑްގައި 65 އަހަރަށް ދިޔައިމާ އަދި ގޯއްޗެއް ލިބުނަސް އެކަން ކުރުމަށް ބޭނުންވާ ފައިނޭންސް ރެއިޒްކުރުމުގައި އިޝޫތަކެއް އުޅޭނެެ. އެހެންވީމާ މި ދެންނެވި އުމުރު ފުރާތަކަށް މާކްސް ދިނުމުގައި[ ބަލާނެ]،" އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި މީހަކާ އިނދެގެން އުޅުމާއި ނޫޅުމަކީ މާކްސްދިނުމުގައި ބަލާނެކަމެއް ނޫނެވެ. އެހެން ނަމަވެސް ބަލަހައްޓަން ޖެހޭ މީހުންގެ އަދަދަކީ މާކްސް ދިނުމުގައި ބަލާނެ ކަމެކެވެ. އެކަމަކު އެކަމުގައި ވެސް އޮތީ އަސްލަމް ވިދާޅުވި ގޮތުގައި އެންމެ ދެ ކެޓަގަރީ އެވެ. އެއީ ބަލަން ޖެހޭ ދަރިންގެ އަދަދު ދެއަކަަށް ވުރެ މަދުވުމާއި ގިނަވުމެވެ.
ކްރައިޓީރިއާ އެކުލަވައިލުމުގައި މިހާރު ނުނިމި އޮތީ މިނިސްޓަރު ވިދާޅުވި ގޮތުގައި ދިރިއުޅުމުގެ ފެންވަރު ބަލާނެ ގޮތް ކަނޑައެޅުން އެކަންޏެވެ.
