ކޮވިޑް-19 ގެ ބަލިމަޑުކަމާއެކު އިއުލާނު ކުރި ސިއްހީ ނުރައްކަލުގެ ކުއްލި ހާލަތު މިރޭ އުވާލައި، މޫނު މަތީ މާސްކު އެޅުން އިހްތިޔާރީ ކަމަކަށް ހަދައި، އެ ނޫންވެސް ބޮޑެތި ލުއިތަކެއް ހެލްތު އިމަޖެންސީ އޮޕަރޭޝަންސް ސެންޓަރުން އިއުލާނުކޮށްފި އެވެ.
މީގެ ދެ އަހަރާއި ދެ ދުވަސް ކުރިން އިއުލާންކުރި އާއްމު ސިއްހަތުގެ ކުއްލި ނުރައްކަލުގެ ހާލަތު މިރޭ އުވާލެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
އެ އިއުލާނަށްފަހު ބޭއްވި ނޫސްވެރިންގެ ބައްދަލުވުމެއްގައި އެޗްއީއޯސީގެ އެތަނުގެ ކޮމިއުނިކެބަލް ޑިޒީޒް ޑިވިޝަންގެ ޑރ. ނަޒްލާ ރަފީގު ވިދާޅުވީ މިރެއަށްފަހު ރާއްޖޭގައި އެއްވެސް ރަށެއްގައި މާސްކު އެޅުން މަޖުބޫރެއްނުވާނެ ކަމަށެވެ.
ނަމަވެސް ކޮވިޑް-19 ފެތުރޭ ރަށްރަށުގައި އަދިވެސް އުޅެވޭނީ މާސްކު އަޅައިގެން ކަމަށް އޭނާ ވިދާޅުވި އެވެ. މާސްކު އަޅަންޖެހޭނީ ޓެސްޓު ކުރާ މީހުންގެ ތެރެއިން 20 ޕަސަންޓަށްވުރެ ގިނައިން މީހުންނަށް ބަލިޖެހޭނެ ނަމަ ކަމަށް ނަޒްލާ ވިދާޅުވި އެވެ.
މާސްކު އެޅުން މަޖުބޫރު ނޫން ނަމަވެސް، އެއީ ކޮވިޑުން ރައްކާތެރިކޮށްދޭނެ ވަސީލަތަކަށްވާތީ އަދިވެސް މާސްކު އަޅައިގެން އުޅުން އެދެވިގެންވާ ކަމަށް ނަޒްލާ ވިދާޅުވި އެވެ.
ބޭރު ގައުމުތަކުން ރާއްޖެއަށް އެތެރެވާ މީހުންނަށް މީގެ ފަހުން ޕީސީއާރް ޓެސްޓު ހަދަން ނުޖެހޭނެ ކަމަށް ވެސް މިރޭ އިއުލާން ކުރި އެވެ. އަދި ރާއްޖޭގެ އެތެރޭގައި ދަތުރު ކުރާއިރު ވެސް ޕީސީއާރް ޓެސްޓު ބޭނުންނުވާނެ ކަމަށް ވެސް އިއުލާން ކުރި އެވެ.
ޑރ. ނަޒްލާ ވިދާޅުވީ ރާއްޖެއިން ބޭރުން އަންނަ ރާއްޖޭގައި ދިރިއުޅޭ މީހުންހެ ހަށިގަނޑުން ބަލީގެ އަލާމާތްތައް ފެންނަ ނަމަ އެންޓިޖެން ޓެސްޓު ހެދުން އެދެވިގެންވާ ކަމަށެވެ.
އޭގެ އިތުރުުން، ވެކްސިން ފުރިހަމަނުކޮށް ރާއްޖެއިން ބޭރުން އަންނަ މީހުން ވެސް އަދި ރާއްޖޭގެ އެއް ރަށުން އަނެއް ރަށަށް ދާ މީހުން ވެސް ކަރަންޓީނުވާން ނުޖެހޭނެކަމަށް ޑރ. ނަޒްލާ ވިދާޅުވި އެވެ.
މިރޭ އިއުލާންކުރި ލުއިތަކާއެކުގައި ވެސް ކޮވިޑަށް ޕޮޒިޓިވްވާ މީހުން އަދިވެސް އައިސޮލޭޓްވާން ޖެހޭނެކަމަށް ޑރ. ނަޒްލާ ވިދާޅުވި އެވެ. އަދި ބަލި ޖެހިފައިވާ މީހުންގެ ކޮންޓެކްޓުން ވެސް ކަރަންޓީނުވާން ޖެހޭ ނެކަމަށް އޭނާ ވިދާޅުވި އެވެ. އަދި މިހާރު ދުވާލަކު އެއް ފަހަރު އާންމުކުރާ ކޮވިޑުގެ މައުލޫމާތު މީގެ ފަހުން ހަފްތާއަކު އެއް ފަހަރު އިއުލާން ކުރާނެ ކަމަށް ވެސް ޑރ. ނަޒްލާ ވިދާޅުވި އެވެ.
