ޓޫރިޒަމް ސިނާއަތަށް 50 އަހަރު ފުރޭތީ ފާހަގަކުރާ ޓޫރިޒަމުގެ ރަން އަހަރަށް ހާއްސަ ލަވައެއް ނެރެފި އެވެ.
ޓޫރިޒަމް މިނިސްޓްރީ އާއި މޯލްޑިވްސް މިއުޒިޝަންސް ޔޫނިއަން ގުޅިގެން ނެރުނު "ނަލަ ނަލަ ރާއްޖެ" ލަވައިގައި ދިވެއްސާއި އިނގިރޭސި ބައިތުތައް ހިމަނާފައި ވެ އެވެ. މި ލަވައިގެ ޅެމާއި މިއުޒިކް ހެދީ ޑީ ޓިއުންސް ބޭންޑުންނެވެ. ވީޑިއޯ ހެދީ އޯކޭސް އިންނެވެ.
ސޯޝަލް ސެންޓަރުގައި ރޭ ބޭއްވި ރަސްމިއްޔާތެއްގައި މި ލަވަ ނެރެދިނީ ދިވެހި މިޔުޒިކީ ދާއިރާގެ "ލެޖެންޑުން" ކަމުގައިވާ މުހައްމަދު މާޖިދު (މެޒޯ މޯޑު) އާއި އެމޭޒަން ޖޭޑުގެ އަބްދުއްރަޝީދު (އަބުސީ) ގެ އިތުރުން ޒީރޯ ޑިގްރީ އެޓޯލްސްގެ އަހުމަދު ނާޝީދުގެ ދަރިފުޅު ނިޝް ނާޝިދެވެ.
ކުރިޔަށް އޮތް ތަނުގައި ޓޫރިޒަމުގެ ރަން އަހަރާ ގުޅިގެން ކުރިޔަށް ގެންދާ ހުރިހާ ހަރަކާތެއްގައި ބޭނުންކުރާނީ މި ލަވަ އެވެ. ލަވައިގެ އިތުރުން ރަން އަހަރަށް ސްޓޭމްޕްއަކާއި ލޯގޯއެއް ވެސް ދަނީ ބޭނުންކުރަމުންނެވެ.
ފައިސާގެ އިނާމާ އެކު "ނަލަ ނަލަ ރާއްޖެ" ޓިކްޓޮކް ޗެލެންޖެއް
ޓޫރިޒަމް މިނިސްޓްރީން ވަނީ "ނަލަ ނަލަ ރާއްޖެ" ލަވައަށް ޓިކްޓޮކް ޗެލެންޖެއް ވެސް އިއުލާނުކޮށްފަ އެވެ.
ދިވެހިންނަށާއި ބިދޭސީންނަށް ވެސް ހުޅުވާލައިގެން ކުރިޔަށް ގެންދީ މި ޗެލެންޖު ވަނީ ހުރިހާ އުމުރުފުރާއަކަށް ހުޅުވާލާފަ އެވެ. އެކަމަކު ފޮލޮވަރުންގެ އަދަދަށް ބިނާކޮށް ދެ ކެޓެގަރީއަކަށް ވަނީ ބަހާލާފަ އެވެ. މޮޅުވާ ދިވެހިންނަށް ފައިސާގެ އިނާމު ހުށަހަޅާފައިވާއިރު ބިދޭސީންނަށް ލިބެނީ ހޮލިޑޭ ޕެކޭޖެކެވެ.
ދިވެހިން: 10،000 ފޮލޮވާސްއަށް ވުރެ ގިނަ އަދި 10،000 ފޮލޮވާސްއަށް ވުރެ މަދު
- ގޯލްޑް – 25،000ރ.
- ސިލްވާ – 15،000ރ.
- ބްރޮންޒް – 10،000ރ.
ބިދޭސީން: އެއް މިލިއަން ފޮލޮވާސްއަށް ވުރެ ގިނަ އަދި މިލިއަން ފޮލޮވާޒްއަށް ވުރެ މަދު
- ގޯލްޑް: ދެ މީހަކަށް އަށް ދުވަހުގެ ހޮލިޑޭ ޕެކޭޖެއް
- ސިލްވާ: ދެ މީހަކަށް ފަސް ދުވަހުގެ ހޮލިޑޭ ޕެކޭޖެއް
މިއަދުން ފެށިގެން މޭ 10 ގެ ނިޔަލަށް ކުރިޔަށް މި ޓިކްޓޮކް ޗެލެންޖުގައި ބައިވެރިވާން ޖެހެނީ "ނަލަ ނަލަ ރާއްޖެ" ލަވައަށް ލިޕް ސިންކު ކުރާ ވީޑިއޯއެއް ހުށަހަޅާފަ އެވެ. ވީޑިއޯގައި ޓޫރިޒަމް މިނިސްޓްރީގެ ރަސްމީ ޓިކްޓޮކް ހޭންޑްލް mot.mv އާއި #Maldives އާއި #NalaNalaRaajje އާއި #Maldivestourism50 އާއި #visitmaldives ބޭނުންކުރަން ޖެހެ އެވެ.
ކޮންމެ އެކައުންޓަކުން ގިނަ ވެގެން ބައިވެރިކުރެވޭނީ ތިން ވީޑިއޯ އެވެ. ޖަޖުންގެ ޕެނަލަކުން ވީޑިއޯތަކަށް އިންސާފުކުރުމަށް ފަހު މުބާރާތުން މޮޅުވާ މީހުން އިއުލާނުކުރާނީ މޭ 17 ގަ އެވެ.
