މިދިޔަ މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް 1.41 ބިލިއަން ރުފިޔާގެ އާމްދަނީ އެއް ލިބުނުއިރު އެއީ އަންދާޒާކުރި ވަރަށް ވުރެ 17.6 ޕަސެންޓް އިތުރު އަދަދެއް ކަމަށް އެ އިދާރާއިން ބުނެފި އެވެ.
މީރާއިން ބުނީ ފެބްރުއަރީ މަހު ލިބުނު 1.41 ބިލިއަން ރުފިޔާއަކީ މިދިޔަ އަހަރުގެ އެ މުއްދަތުގައި ލިބުނު އާމްދަނީއަށްވުރެ 40.1 ޕަސަންޓު އިތުރު އަދަދެއް ކަމަށެވެ. މި އަހަރު އާމްދަނީ އިތުރުވި މައިގަނޑު ސަބަބަކީ ޖީއެސްޓީ، އިންކަމް ޓެކްސް، ގްރީން ޓެކްސް، ޓޫރިޒަމް ލޭންޑް ރެންޓް އަދި އެއާޕޯޓް ޓެކުހާއި ފީގެ ގޮތުގައި ލިބިފައިވާ ފައިސާ އިތުރުވުން ކަމަށް ވެސް މީރާއިން ބުނެ އެވެ.
އެގޮތުން، މީރާއިން ވަނީ މިދިޔަ އަހަރުގެ ޖެނުއަރީ މަހު ރާއްޖެ ޒިޔާރަތްކުރި ފަތުރުވެރިންގެ އަދަދާއި މި އަހަރުގެ ޖެނުއަރީ މަހު ރާއްޖެ ޒިޔާރަތްކުރި ފަތުރުވެރިންގެ އަދަދު 43 ޕަސަންޓު އިތުރުވެފައިވާކަން ފާހަގަކޮށްފަ އެވެ.
މިދިޔަ މަހު މީރާއަށް ބަލައިގަތް އާމްދަނީގެ އެންމެ ބޮޑު ހިއްސާއެއް އޮތީ އެހެން މަސްތަކެކޭ ވެސް އެއްގޮތަށް ޖީއެސްޓީ ފައިސާ އިންނެވެ. މީރާއިން ބުނީ މިދިޔަ މަހު ޖީއެސްޓީގެ ގޮތުގައި ޖުމްލަ 972.10 މިލިއަން ރުފިޔާ ލިބުނު ކަމަށެވެ. އެއީ އާމްދަނީގެ ޖުމްލަ 69.1 ޕަސަންޓެވެ.
ދެން އެންމެ ބޮޑު އާމްދަނީއެއް ލިބިފައިވަނީ އިންކަމް ޓެކުހުން ކަމަށް މީރާއިން ބުނެ އެވެ. ޖުމްލަ 138.21 މިލިއަން ރުފިޔާ އިންކަމް ޓެކުހުގެ ގޮތުގައި ލިބުނުއިރު އެއީ ޖުމްލަ އާމްދަނީގެ 9.8 ޕަސަންޓެވެ.
ގްރީން ޓެކްސްގެ ގޮތުގައި މީރާއިން ބަލައިގަތީ 91.44 މިލިއަން ރުފިޔާ އެވެ. އެއާޕޯޓް ސާވިސް ޗާޖްގެ ގޮތުގައި 51.99 މިލިއަން ރުފިޔާ މީރާއިން ފެބްރުއަރީ މަސްތެރޭ ބަލައިގަތް އިރު އެއާޕޯޓް ޑިވެލޮޕްމަންޓް ފީގެ ގޮތުގައި ވެސް މީރާއިން ވަނީ 44.85 މިލިއަން ރުފިޔާ ބަލައިގަނެފަ އެވެ.
އެހެނިހެން ޓެކުހާއި ފީގެ ގޮތުގައި ވެސް މީރާއިން 107.98 މިލިއަން ރުފިޔާ ބަލައިގަތްކަމަށް މީރާއިން ބުނެ އެވެ. މިދިޔަ މަސްތެރޭ ބަލައިގަތް އާމްދަނީގެ ތެރޭގައި 63.09 މިލިއަން އެމެރިކާ ޑޮލަރު ހިމެނޭކަމަށް ވެސް މީރާއިން ބުނެ އެވެ.
