ފާއިތުވެ ދިޔަ ދެ އަހަރަށް ބަލާއިރު، ރަނގަޅު މަސައްކަތްތަކެއް ކުރެވިފައިވާ ކަމަށް އދ. އިން ރާއްޖެ އަށް ކަނޑައަޅާފައި ހުންނަވާ ރެސިޑެންޓް ކޯޑިނޭޓާ ކެތަރިން ހެޒްވެލް ވިދާޅުވެއްޖެ އެވެ.
މީގެ ދެ އަހަރެއްހާ ދުވަސް ކުރިން، 2020 ގެ ފެބްރުއަރީ 16 ވަނަ ދުވަހު, މަގާމާ ހަވާލުވެ ވަޑައިގަތް ކެތަރިން ވިދާޅުވީ މިދިޔަ ދެ އަހަރު އދ. ގެ ރާއްޖޭގެ ޓީމުން ހޯދި އެންމެ ބޮޑު ކުރިއެރުމަކީ، ކޮވިޑް-19 އާ ދެކޮޅަށް ކުރެވުނު މަސައްކަތް ކަމަށާއި، ހުރިހާ ފަރާތްތަކަށް ހަމަހަމަ ކަމާއެކު ވެކްސިން ފޯރުކޮށް ދެއްވީތީ ރައީސުލްޖުމްހޫރިއްޔާއަށް ޝުކުރު އަދާކުރައްވާ ކަމަށެވެެ.
ކެތަރިން ދިވެހި ބަހުން ކުރެއްވި ޓްވީޓްގަ ދެ ވަނަ އަށް އެންމެ މުހިންމު ކާމިޔާބެއް ގޮތަށް ފާހަގަ ކުރައްވާފައި ވަނީ ފުޅާ ދާއިރާގައި މަޝްވަރާކުރެވިގެން، ކުރިއަށް އޮތް ފަސް އަހަރު (2022-2026) ސަރުކާރާއި ޕާޓްނަރުންނާއެކު އ.ދ. އިން އިސްކަން ދޭނެ ދާއިރާތައް، މިދިޔަ އަހަރުގެ ތެރޭގައި ކަނޑައެޅެމުވެ. އޭގެ ސަބަބުން އދ. ގެ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލު ކުރުމަށް ފަސޭހަ ވެގެން ދާނެ ކަމަށް އދ. އިން ބުނެ އެވެ.
"ދެމެހެއްޓެނިވި ތަރައްގީގެ ލަނޑުނަޑިތައް ހާސިލުކުރުމަށް ކުރާ މަސައްކަތްތަކުގައި ޕާޓްނަރުންނާ ގުޅިގެން މަސައްކަތްކުރުމުން ރަނގަޅު ނަތީޖާ ފެނޭ،" ކެތަރިން ވިދާޅުވި އެވެ. "ޒުވާނުން، ވިޔަފާރިތައް، މުޖުތަމައު، ނުކުޅެދުންތެރިކަން ހުންނަ ފަރާތްތައް، މަދަނީ ޖަމިއްޔާތައް އަދި އިތުރު ފަރާތްތަކާއެކު ކުރިމަގުގައި ވެސް ޕާޓްނަޝިޕް އުސޫލުން މަސައްކަތް ކުރަން އދ. އިން ތައްޔާރު."
ކެތަރިން ގެ ޓްވީޓުގަ ބުނެފައިވާ ގޮތުގައި ރާއްޖޭގެ އެންމެ އުތުރަށާއި ދެކުނުގެ އިތުރުން މިހާތަނަށް ދެވުނު ކޮންމެ ރަށެއްގައި ވެސް ހިޔާލުތައް ތަފާތު ނަމަވެސްް ރަށުގެ ތަރައްގީގައި ކައުންސިލުތަކުގެ ރޯލު މުހިއްމެވެ. އަދި، މޫސުމަށް އަންނަ ބަދަލުތަކުގެ ސަބަބުން ދިމާވާ ނުރައްކާތަކުގެ އެންމެ ކުރީ ސަފުގައި ރާއްޖެ ވާއިރު، މުސްތަގުބަލާ މެދު ހުރި ކަންބޮޑުވުންތައް ޒުވާނުން ހިއްސާކުރާ ކަމަށް އޭނާ ވިދާޅުވި އެވެ.
ކަނޑާއި ކަނޑުގެ ދިރުންތަކާއި އެއްގަމުގެ ދިރުންތައް ހިމާޔަތް ކުރުމަކީ އަހަރުމެން ދިރިތިބުމަށް އެންމެ މުހިއްމު އެއް ކަންތައް ކަމަށާއި އަދި، ފާގަތި މުސްތަގުބަލަކަށް ވާސިލު ވެވޭނީ، ރަށްރަށް ތަރައްގީ ކުރުމަށާއި، ދަތުރުފަތުރުގެ ނިޒާމު ހަރުދަނާ ކުރުމަށް، އަދި ކާބޯތަކެތީގެ ރައްކާތެރިކަން ކަށަވަރު ކުރަން ދިގު ރާސްތާ އަށް ރާވައިގެން ކަމަށް ކެތަރިންގެ ޓްވީޓްގަ ވިދާޅުވެފައި ވެ އެވެ.
ފަތުރުވެރިކަމުން ލިބޭ މަންފާ މުޖުތަމައަށް ހަމަހަމަކަމާއެކު ލިބޭނެ މަގު ފަހިކޮށްދީ، ރާއްޖޭގެ ތަފާތު ބްރޭންޑް ކުރިއެރުވުމަށް ކުރާ މަސައްކަތްތަކަށް އދ. ގެ އެއްބާރުލުން ލިބޭނެކަން ވެސް އޭނާ ފާހަގަ ކުރައްވާފައިވެ އެވެ.
