ދުނިޔެ އަދި ރާއްޖޭގެ ބާޒާރުގައި ތެލުގެ އަގު އުފުލިފައިވާތީ، އަންނަ ހަފްތާއިން ފެށިގެން މާލެ ސަރަހައްދުގައި ދުއްވާ ޓެކްސީ ދަތުރުތަކުގެ އަގު ބޮޑުކުރަން ހުއްދަ ދިނުމުގެ ވިސްނުމެއް ޓްރާންސްޕޯޓު މިނިސްޓްރީގެ ނެތް ކަމަށް އެ މިނިސްޓްރީން ބުނެފި އެވެ.
އެ މިނިސްޓްރީގެ ޑެޕިއުޓި މިނިސްޓަރު ޝިމާޒް އަލީ "އަދަދު"އަށް ވިދާޅުވީ ތެޔޮ ހަރަދުތަކާ ހެދި ޓެކްސީ ޑްރައިވަރުން ދަތުރުތަކުގެ އަގުތައް ބޮޑުކުރަން މަސައްކަތްކުރި ނަމަވެސް، އެކަމަށް ހުއްދަ ދިނުމަށް މިނިސްޓްރީގެ އެއްވެސް ވިސްނުމެއް ނެތް ކަމަށެވެ.
"އަޅުގަނޑުމެންގެ އަދި ހުރި ވިސްނުމަކީ ކުރިން ވެސް އިއުލާންކޮށްފައިވާ އަގުތަކާއެކު ކުރިޔަށް ދިޔުން. އެއީ މާލޭގެ އެތެރޭގައި 25ރ. ދެން ބްރިޖު ހުރަސްކޮށް މާލެއިން ހުޅުމާލެއަށް ދާނަމަ 75ރ.، މާލެއިން ހުޅުލެއަށްދާނަމަ 60ރ. ގެ މަގުން،" ޝިމާޒް ވިދާޅުވި އެވެ.
ޝިމާޒް އިތުރަށް ވިދާޅުވީ މިހާރު އިއުލާންކޮށްފައިވާ އަގުތަކާ އެއްގޮތަށް ދަތުރުނުކުރާ ޑްރައިވަރުންނަށް ގާނޫނާއި ގަވާއިދުތަކުގެ ދަށުން އެ މިނިސްޓްރީން ފިޔަވަޅު އަޅާނެ ކަމަށެވެ.
"ފިޔަވަޅު އަޅާނެ. އެއީ ފުރަތަމަ ފަހަރަށް ނަސޭހަތްތެރިވާނީ، ދެން ޖޫރިމަނާ ކުރާނީ، ދެން އެޔަށް ފަހު ހުއްދަ ބާތިލުކުރާނީ،" ޝިމާޒް ވިދާޅުވި އެވެ.
ޓްރާންސްޕޯޓު މިނިސްޓްރީން މިހެން ބުނީ ރާއްޖޭގައި މިހާރު އުފުލިފައިވާ ތެލުގެ އަގުތަކާ ޓެކްސީ ޑްރައިވަރުންނަށް ދެކޮޅު ނުޖެހޭ ގޮތެއްގައި މަސައްކަތްކުރަން ޖެހިފައިވާތީ ދަތުރުތަކުގެ އަގުބޮޑުކުރަން މަޝްވަރާކުރަމުން އަންނަ ކަމަށް ޓެކްސީ ސެންޓަރެއްގެ އިސްވެރިޔަކު މި ނޫހަށް މައުލޫމާތު ދީފައިވަނިކޮށެވެ.
އެބޭފުޅާ ވިދާޅުވީ އެ މަޝްވަރާތަކުން ނިމޭ ގޮތަކަށް އަގުތަކަށް ބަދަލުގެނައުމަށް ޓްރާންސްޕޯޓު މިނިސްޓްރީއަށް ހުށަހަޅާނެ ކަމަށެވެ.
"މިހާތަނަށް އެއްވެސް ކަމެއް ނުނިމޭ މުޅިއަކުން. އަންނަ ހަފްތާއިން ފެށިގެން އަގު ބޮޑު ކުރަން ހުށަހަޅަން މަސައްކަތްކުރަނީ،" ޓެކްސީ ސެންޓަރުގެ އިސްވެރިޔާ ވިދާޅުވި އެވެ.
އެގޮތުން މާލެ ތެރޭގެ ދަތުރުތައް 25ރ. 30ރ. އިތުރުކުރަން އަދި ބްރިޖު މެދުވެރިކޮށް ހުޅުމާލެއަށް މިހާރު ކުރާ ދަތުރުތަކަށް ނަގާ 75ރ. ބަދަލުގަައި 100ރ. ނަގަން ހުށަހަޅާނެ ކަމަށް އޭނާ ވިދާޅުވި އެވެ.
