ރަޝިޔާއިން ޔޫކްރެއިން ހިފުމަށް ކުރާ ހަނގުރާމައިގެ ސަބަބުން ދުނިޔެ އަދި ރާއްޖޭގެ ބާޒާރުގައި ތެލުގެ އަގު އުފުލިފައިވާތީ، އަންނަ ހަފްތާއިން ފެށިގެން މާލެ ސަރަހައްދުގައި ދުއްވާ ޓެކްސީ ދަތުރުތަކުގެ އަގު ބޮޑު ކުރުމަށް ޓެކްސީ ޑްރައިވަރުން މަސައްކަތް ފަށައިފި އެވެ.
ޓެކްސީ ސެންޓަރެއްގެ އިސްވެރިޔަކު މި ނޫހަށް ވިދާޅުވީ މިހާރު ރާއްޖޭގައި މިހާރު އުފުލިފައިވާ ތެލުގެ އަގުތަކާއި ޓެކްސީ ޑްރައިވަރުންނަށް ދެކޮޅު ނުޖެހޭ ގޮތެއްގައި މަސައްކަތްކުރަން ޖެހިފައިވާތީ ދަތުރުތަކުގެ އަގުބޮޑުކުރަން މަޝްވަރާކުރަމުން އަންނަ ކަމަށެވެ.
އަދި އެ މަޝްވަރާތަކުން ނިމޭ ގޮތަކަށް އަގުތަކަށް ބަދަލުގެނައުމަށް ޓްރާންސްޕޯޓު މިނިސްޓްރީއަށް ހުށަހަޅާނެ ކަމަށް އޭނާ ވިދާޅުވި އެވެ.
"މިހާތަނަށް އެއްވެސް ކަމެއް ނުނިމޭ މުޅިއަކުން. އަންނަ ހަފްތާއިން ފެށިގެން އަގު ބޮޑު ކުރަން ހުށަހަޅަން މަސައްކަތްކުރަނީ،" ޓެކްސީ ސެންޓަރުގެ އިސްވެރިޔާ ވިދާޅުވި އެވެ.
އެގޮތުން މާލެ ތެރޭގެ ދަތުރުތައް 25ރ. 30ރ. އިތުރުކުރަން އަދި ބްރިޖު މެދުވެރިކޮށް ހުޅުމާލެއަށް މިހާރު ކުރާ ދަތުރުތަކަށް ނަގާ 75ރ. ބަދަލުގަައި 100ރ. ނަގަން ހުށަހަޅާނެ ކަމަށް އޭނާ ވިދާޅުވި އެވެ.
އެގޮތަށް އަގުތަކަށް ބަދަލު ގެންނަން ހުށަހަޅާއިރު، މާލެ އާއި ހުޅުމާލެ ފޭސް 2 އާ ދެމެދު ކުރާ ދަތުރުތަކަށް ވެސް އިތުރަށް ފައިސާ ނަގަން ހުށަހަޅާނެކަމަށް އޭނާ ވިދާޅުވި އެވެ.
"މާލޭގެ ދަތުރުތަކަށް ވެސް ފަސް ރުފިޔާ އިތުރުކުރަން ދެން ބްރިޖު ހުރަސްކޮށް ފޭސް 1 އަށް ކުރާ ދަތުރުތަކަށް 100 ރުފިޔާ ނަގަން ހުށަހަޅަނީ،" އޭނާ ވިދާޅުވި އެވެ.
މާލެ ސަރަހައްދުގައި ކުރާ ޓެކްސީ ދަތުރުތަކުގެ އަގުތަކާއި ދޭތެރޭ ޑްރައިވަރުންގެ ހިތްހަމަނުޖެހުން އަބަދުވެސް އޮންނަ ކަން ފާހަގަކުރެވެ އެވެ. އަދި މިނިސްޓްރީން އެންމެ ފަހުން ކަނޑައެޅި އަގުތަކަށް ޑްރައިވަރުން ވަނީ އޭރު ވެސް އިންތިހާއަށް ހިތްހަމަނުޖެހުން ފާޅުކޮށްފަ އެވެ.
އެގޮތުން އެ އަގުތަކުގައި ތެލުގެ ހަރަދަށާއި ކާރުގެ މާރާމާތްތައް ފަދަ ކަންކަމަށް ލިބޭ އާމްދަނީ ކެނޑުމަށްފަހު ޑްރައިވަރުންނަށް ފައިދާ ނުވާކަމަށް ގިނަ ޑްރައިވަރުން ބުނެ އެވެ. އަދި މިހާރު ރާއްޖޭގައި ތެލުގެ އަގު ބޮޑުވެފައިވާތީވެ ޑްރައިވަރުންގެ ހުރި ކަންބޮޑުވުންތައް ވަނީ އިތުރުވެފަ އެވެ.
