ދުނިޔޭގެ އެންމެ ބާރުގަދަ އެއް ގައުމު ކަމަށް ރަޝިޔާއިން ޔޫކްރެއިނު ހިފުމަށް އެގައުމަށް އަރައި، ހަނގުރާމަ ކުރަމުންދާތީ ރަޝިޔާގެ ދައުލަތާއި އެ ގައުމުގެ މަހުޖަނުންނަށް އަމާޒުކޮށްގެން އެމެރިކާ އަދި ހުޅަނގުގެ ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކާއެކު ދިވެހިރާއްޖޭގެ ޓުއަރިޒަމަށް އެތައް ސަތޭކަ މިލިއަން ޑޮލަރުން ގެއްލުންވާން ފަށާފައިވާކަން "އަދަދު" އިން ރިޕޯޓްކުރީ އިއްޔެ އެވެ.
މިދިޔަ ފަސް އަހަރުގެ ތަފާސްހިސާބުތަކަށް ބަލާއިރު ރާއްޖެއަށް އަންނަ ފަތުރުވެރިންގެ ތެރެއިން ރަޝިޔާ ފަތުރުވެރިންގެ މިންވަރު 50 ޕަސެންޓާ ގާތް ކުރެ އެވެ. އަދި މި އަހަރުގެ މިހާތަނަށް ވެސް އެންމެ ގިނައިން ރާއްޖެ އައީ ރަޝިޔާ ފަތުރުވެރިންނެވެ.
"ހަނގުރާމަ ފެށުނު ފަހުން މިހާތަނަށް ވެސް 200 މިލިއަން ޑޮލަރު ގެއްލުންވެދާނެ. މަދުވެގެން އެ ވަރުގެ ގެއްލުންވެފައި ހުންނާނީ،" ރާއްޖެއަށް އެންމެ ގިނަ ރަޝިޔާ ފަތުރުވެރިން ގެންނަ އެއް ފަރާތް ކަމަށްވާ ރިސޯޓް ލައިފް މޯލްޑިވްސްގެ ސީއީއޯ މުހައްމަދު ޝާޒް ވަލީދު އިއްޔެ ވިދާޅުވި އެވެ.
ވަލީދު ވިދާޅުވީ، މިހާރު އެންމެ ބޮޑު ގެއްލުމެއްވަމުންދާނީ، ޕްރީ ބުކިންސް ނުވަތަ ކުރިން ހައްދާފައި ހުރި ބުކިންތައް ކެންސަލް ކުރަން ފެށުމުން ކަމަށެވެ. އަދި ފަތުރުވެރިންނަށް، ފައިސާ ދެއްކެން އޮތް މަގުތައް ބަންދު ކުރުމުން ވެސް ބޮޑެތި ގެއްލުންތަކެއްވަމުންދާނެ ކަމަށް އޭނާ ލަފާ ކުރެއްވި އެވެ. އޭގެ އިތުރުން ރަޝިޔާގެ ފައިސާގެ އަގު ދަށްވުމުގެ އަސަރު ރާއްޖެއަށް ކުރާނެ ކަމަށް އޭނާ ގަބޫލުކުރައްވަ އެވެ.
"ދިވެހިރާއްޖެ އިގްތިސާދަށް ވަރަށް ބޮޑަށް ގެއްލުންވާނެ. ލަގްޒަރީ ރިސޯޓުތަކަށް އަންނަ ގިނަ މީހުންނަކީ ވެސް ރަޝިޔާ މީހުން. ފަތުރުވެރިންގެ މާކެޓުގެ ގާތްގަނޑަކަށް 40 ޕަސެންޓަކީ ރަޝިޔާ މީހުން. އެހެންވީމަ ވަރަށް ބޮޑު އަސަރެއް ކުރާނެ އަޅުގަނޑުމެންނަށް،" އޭނާ ވިދާޅުވި އެވެ.
ރަޝިޔާ/ޔޫކްރެއިން ހަނގުރާމައިގެ ސަބަބުން ދިވެހިރާއްޖޭގެ ފަތުރުވެރިކަމަށް ގެއްލުންވާނެ ކަމަަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވެސް ފެބްރުއަރީ 24، ގައި ވިދާޅުވި އެވެ.
ހިސާބުތަކުން ދައްކާ ގޮތުގައި ނިމިދިޔަ ފެބްރުއަރީ މަހުގެ ނިޔަލަށް ރަޝިޔާގެ 43،519 ފަތުރުވެރިން ރާއްޖެ އައިސްފައިވެ އެވެ.
ބައެއް މުހިންމު ހަބަރުތައް
- ރަޝިޔާއިން ޔޫކްރެއިނަށް ހަމަލާދޭން ފެށިއިރު އެ ގައުމުގައި ތިބި 24 ދިވެހިންގެ ތެރެއިން ބާކީ ތިބި ނުވަ މީހުން ވެސް އެގައުމުން ނެރެ ސަލާމަތްކުރީ އިއްޔެ އެވެ.
- ޓުއަރިޒަމް މިނިސްޓްރީގެ ގިނަ އަދަދެއްގެ އަންހެން މުވައްޒަފުންނަށް ޖިންސީ ގޯނާ ކުރިކަމުގެ ތުހުމަތުގައި ދައުވާ އުފުލާފައިވާ އެ އޮފީހުގެ ކުރީގެ މިނިސްޓަރު އަލީ ވަހީދު ހައްޔަރު ކުރުމަށް އިންޓަޕޯލުން ރެޑް ނޯޓިސް ނެރެފައިވާކަން ހާމަކުރީ އިއްޔެ އެވެ.
- ހައިކޯޓުގެ އަމުރެއް ސަސްޕެންޑް ކުރުމަށްފަހު، ރާއްޖެއަށް ޑްރަގް އެތެރެކުރުމުގައި ބައިވެރިވި ކަމަށް ތުހުމަތު ކުރެވޭ މީހަކު އައްޑޫ ސިޓީ ހިތަދޫ މެޖިސްޓްރޭޓް ދޫކޮށްލި މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަން ފެށީ އިއްޔެ އެވެ.
ދުވަހުގެ ކޯޓޭޝަން
ވެރިކަން ކުރާ ކޯލިޝަނުގެ މައި ޕާޓީ، އެމްޑީޕީގެ އެތެރޭގެ އިންތިހާބުގައި އެޕާޓީގެ ޗެއާޕާސަންގެ މަަގާމަށް ކުރިމަތިލައްވާފައިވާ އިކޮނޮމިކް މިނިސްޓަރު ފައްޔާޒް އިސްމާއީލަށް ތާއީދު ކުރައްވާ ވޯޓު ދެއްވުމަށް ނިންމާފައިވާ ކަމަށް ހާމަކުރައްވަމުން އެމްޑީޕީގެ ޕާލިމަންޓްރީ ގްރޫޕްގެ ލީޑަރު އަދި އައްޑޫ ހިތަދޫ ދާއިރާގެ މެމްބަރު މުހައްމަދު އަސްލަމް ވިދާޅުވީ:
"ފައްޔާޒަކީ ވަރުގަދަ ލީޑަރެއްކަން ވަނީ ސާބިތުކޮށް ދެއްވާފައި. އަދި ފައްޔާޒުގެ ލީޑާޝިޕްގެ ދަށުން އެމްޑީޕީ އަށް އިތުރު ކާމިޔާބީ އާއި ކުރިއެރުން ލިބިގެންދާނެ،"
ދުވަހުގެ ފޮޓޯ
ތިލަމާލެ ބްރިޖުގެ މަސައްކަތް ފެށުމުގެ ކުރިން ފުރިހަމަކުރަން ޖެހޭ ޖިއޯޓެކްނިކަލް ސާވޭގެ އަމަލީ މަސައްކަތް ކުރަމުންދަނީ. މި ސާވޭ ކުރަނީ ބްރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނިން. ގާތްގަނޑަކަށް 7.7 ބިލިއަން ރުފިޔާ ހޭދަވާނެ ކަމަށް ލަފާކުރެވޭ މި ބްރިޖު މަޝްރޫއަކީ މިހާތަނަށް ރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއު -- ފޮޓޯ: އަބްދުﷲ އިޔާން/އަދަދު
ދިރާސާތަކުން ކިޔާލުމަށް
މި ދިރާސާއަކީ ދިވެހިރާއްޖޭގެ ރަށެއް ކަމުގައިވާ ތ. ކިނބިދޫގައި ކައިވެނި ކުރުމުގެ ސަގާފަތަށް ވޭތުވެދިޔަ 50 އަހަރުގެ ތެރޭގައި ބަދަލެއް އައިސްފައިވޭތޯ ބެލުމަށް ގައުމީ ޔުނިވާސިޓީގެ ދިވެހިބަހުގެ ޑިގްރީ ކޯހުގައި ކިޔެވި ދަރިވަރަކު 2015 ވަނަ އަހަރު ތައްޔާރުކޮށްފައިވާ ދިރާސާއެކެވެ. މި ދިރާސާ ހަދާފައިވަނީ ތ. ކިނބިދޫ މީހުންނާ ސުވާލުކޮށްގެން، އެ ރަށު މީހުން ކައިވެނި ކުރި އިރަކު ކައިވެނި ކުރީ ކިހިނެތްތޯ އަހައި ސުވާލުކޮށްގެންނެވެ.
