ދުނިޔޭގެ ހަނދާނީ ބިނާތައް ނުވަތަ ވޯލްޑް މޮނިއުމަންޓް ފަންޑުގެ ވޮޗް ލިސްޓުގައި އައްޑޫ ސިޓީ ކޯގަންނު ގަބުރުސްތާނު ހިމެނިއްޖެ އެވެ.
ދުނިޔޭގެ ހަނދާނީ ބިނާތަކުގެ ލިސްޓަކީ ދުނިޔޭގެ ގަދީމީ އާސާރުތައް ހިމާޔަތްކުރުމަށް ބޭނުންވާ މާލީ އަދި ފަންނީ އެހީ ފޯރުކޮށްދިނުމަށް ބައިނަލްއަގުވާމީ ފެންވަރުގައި ހަރަކާތްތެރިވާ ޖަމާއަތެކެވެ.
އައްޑޫ ސިޓީ، މީދޫގައި ހުންނަ ކޯގަންނަ ގަބުރުސްތާނަކީ އެ ރަށުގައި ފުރަތަމަ އިސްލާމްދީން ގަބޫލުކޮށްގެން ތިބި މުސްލިމުން މަރުވުމުން އެމީހުން ވަޅުލާފައިވާ ތަނެކެވެ. އެއީ މީގެ 900 އަހަރު ކުރިން ކަމަށް ބުނެވެ އެވެ. ބުނެވޭ ގޮތުގައި ކޯގަންނު ބުރުސްތާނަކީ ދިވެހިރާއްޖޭގައި މިހާރު ފެންނަން އޮތް އެންމެ ބޮޑު، އެންމެ ތާރީހީ، އަދި އެންމެ ގަދީމީ ގަބުރުސްތާނެވެ.
ނޭޝަނަލް ސެންޓާ ފޯ ކަލްޗަރަލް ހެރިޓޭޖުން މައުލޫމާތު ދެެއްވަމުން ހެރިޓޭޖް މިނިސްޓްރީގެ ޑިރެކްޓާ ކޮމިއުނިކޭޝަންސް އިސްމާއީލް ނާއިލް ނަޝީދު "އަދަދު"އަށް ވިދާޅުވީ އެ ލިސްޓުގައި ކޯގަންނު މިސްކިތް ހިމެނިފައިވާކަން އިއުލާން ކޮށްފައި ވަނީ ރޭ ކަމަށެވެ.
ކޮންމެ ދެ އަހަރަކުން ނެރެމުންދާ އެ ލިސްޓުގައި މި އަހަރު 250 އަށްވުރެގިނަ ތަން ވާދަކުރި އެވެ. އޭގެ ތެރެއިން ހޮވުނު 25 ތަނުގެ ތެރޭގައި އައްޑޫގެ މި ތަން ހިމެނިފައިވާ ކަމަށް ނާއިލް ވިދާޅުވި އެވެ.
ކޯގަންނު މިސްކިތުގެ މަހާނަގަލެއް-- ފޮޓޯ: ވޯލްޑްމޮނިއުމަންޓް ލިސްޓް
އެ ތަން ލިސްޓުގައި ހިމެނުމާއެކު ކޯގަންނު އިތުރަށް ރައްކާކޮށް ހިމާޔަތް ކުރުމަށްޓަކައި ދުނިޔޭގެ ސަމާލުކަން އަދި ދުނިޔޭގެ އެހީ ހޯދުމަށް ވަރަށް ބޮޑަށް ފަސޭހަވެގެންދާނެ ކަމަށް ނާއިލް ވިދާޅުވި އެވެ. ނާއިލް ވިދާޅުވީ އެގޮތުުން ބޭރުގެ ފަންޑިން އާއި ޓެކްނިކަލް އެހީ ހޯދުމަށް ވަރަށް ބޮޑު އެހީއަކަށް ވެގެންދާނެ ކަމަށެވެ.
އެ ޒަމާނުގައި އެ ގަބުރުސްތާނުގައި ހަތް މިސްކިތް ހުރި ކަމަށް ބުނެވެ އެވެ. އެއީ ކޯގަންނު މިސްކިތާއި ބޯދާ މިސްކިތާއި ރާވެރީން މިސްކިތާއި އަތަރާ މިސްކިތާއި ކިލެގެ މިސްކިތާއި ދެށިނާ މިސްކިތާއި ފަނޑިޔާރު މިސްކިތެވެ.
ނާއިލް ވިދާޅުވީ މިހާރު ކުރެވެމުންދާ މަސައްކަތަކީ އެ ތަނުގައި ހުންނަ ފަނޑިޔާރު މިސްކިތް ދުނިޔޭގެ ތަރިކައިގެ ލިސްޓުގައި ހިމެނުމަށް ކަމަށެވެ. އަދި މިހާރު މި ހިމެނުނު ވޯލްޑް މޮނިއުމަންޓް ފަންޑުގެ ލިސްޓާއެކު ދުނިޔޭގެ ތަރިކައިގެ ލިސްޓުގައި ހިމެނުމަށް ފަސޭހަވެގެންދާނެ ކަމަށް ވެސް އޭނާ ވިދާޅުވި އެވެ.
އެ ގަބުރުސްތާނުގައި ހުރި މިސްކިތެއް-- ފޮޓޯ: ވޯލްޑް މޮނިއުމަންޓް ލިސްޓް
ހިރިގަލުން ބިނާކޮށްފައިވާ ފަނޑިޔާރު މިސްކިތަކީ ޔުނެސްކޯ ވޯލްޑް ހެރިޓޭޖް ލިސްޓުގައި ރާއްޖޭން ހިމެނުމަށް ހުށައަޅާފައިވާ މިސްކިތްތަކުގެ ތެރޭގައި ވެސް ހިމެނޭ މިސްކިތެކެވެ. މިއީ، އަސްލު ގޮތުގައި މިސްކިތުގެ ހާލަތު ރަގަނޅަށް ހުރި ރާއްޖޭގެ އެންމެ ދުވަސްވީ އެންމެ ކުޑަ ހިރިގަލު ވަޑާމުގެ މިސްކިތެވެ.
ކޯގަންނު ގަބުރުސްތާނަކީ އިހުޒަމާނުގެ މަހާނަގާތައް އެއްތާކުން އެންމެ ގިނައިން ރާއްޖޭގައި ފެންނަން ވެސް ހުރި ގަބުރުސްތާނެވެ. އެގޮތުން 1500 އަށްވުރެ ގިނަ މަހާނަގާ މި ގަބުރުސްތާނުގައި ހުރިއިރު، އޭގެ ތެރޭގައި ހާފިޒުންގެ މަހާނަގާ ކަމަށް ބަލައި އުޅޭ މަހާނަގައުތައް އެބަހުއްޓެވެ. އަދި އިހުގެ ދަންނަބޭކަލުންގެ މަހާނަގާތައް ވެސް އެބަހުއްޓެވެ.
ކޯގަންނުއަކީ ހިމާޔަތްކުރެވިފައިވާ ގައުމީ އާސާރެކެވެ. އެތަން އާސާރަކަށްވަނީ ކޮންމެހެން ގަބުރުސްތާނަކަށް ވެގެނެއް ނޫނެވެ. ހިރިގަލުގެ މަސައްކަތާއި ބިސްތާނުތަކުގެ ޑިޒައިނާއި މިސްކިތްތަކުގެ އަދަދާއި އެތަންތަނުގެ ތާރީހު އަދި އައްޑުއެތައްދެކުނުގެ ރަށްތައް އިސްލާމްދީނަށް އެނބުރުމުގެ ސަބަބުކަމަށް މެދުވެރިވި ބޭކަލެއްގެ ޒިޔާރަތް އެތަނުގައި ހުރުމަކީ އެތަނުގެ މުހިންމުކަން ބޮޑުވެގެންދާ ސަބަބުތަކެއް ކަމަށް ތާރީހީ ލިޔުންތަކުގައިވެ އެވެ.
