ބިމުން ނަގާ ފެން ބޭނުންކުރުމަށާއި ފެންވައިރުކުރުމާއި ފާހާނާ ހެދުމުގައި ބޭނުންކުރާ އާލާތްތައް ރޭޓްކޮށް، ސަރުކާރުން އިންސެންޓިވްއެއް ދޭނެ އޮނިގަނޑެއް ލާޒިމުކުރުމާއި އެނޫން ވެސް ބޮޑެތި ކަންތައްތައް ހިމަނައި، ފެނުގެ ވަސީލަތް ހިމާޔަތްކޮށް ބެލެހެއްޓުމާއި ބެހޭ ގަވާއިދު ސަރުކާރުން އިސްލާހުކޮށްފި އެވެ.
ސަރުކާރުގެ ގެޒެޓްގައި މިއަދު ޝާއިކުރި އިސްލާހުގައިވާ ގޮތުން، ފެނުގެ ވަސީލަތްތައް ހިމާޔަތްކޮށް ބެލެހެއްޓުމުގެ ގަވައިދުގައި ހިމެނި އެންމެ މުހިއްމު އެއް ބަޔަކީ ބިމުގެ ފެން ބޭނުންކުރުމާއި ފެންވަޔަރުކުރުމުގައި ބޭނުންކުރާ އާލާތްތައް ލޭބަލްކޮށް ރޭޓްކޮށް އިންސެންޓިވް ދޭނެ އޮނިގަނޑެއް ހަދަން ލާޒިމުކުރުމެވެ. މިއަދު ގެޒެޓްކުރި އިސްލާހުގައިވާ ގޮތުން، އެ އޮނިގަނޑު، ކުރިއަށް އޮތް އެއް އަހަރު ދުވަހުގެ ތެރޭގައި ހަދަން ޖެހޭނެ އެވެ.
އެ އިސްލާހުގައިވާ މުހިއްމު އަނެއް ކަމަކީ ކޮންމެ ރަށެއްގެ ވެސް އިހުތިސާސްގެ ތެރޭގައި ހުރި އެންމެހާ ވަސީލަތްތައް ދެމެހެއްޓިވި ގޮތުގައި މެނޭޖްކުރާނެ ޕްލޭނެއް ހެދުމެވެ. އެންވަރަމެންޓް ޕްރޮޓެކްޝަން އެޖެންސީ (އީޕީއޭ) ގެ އެހީތެރިކަމާ އެކު ހަދާ އެ ޕްލޭން، ކަމާ ބެހޭ އޮތޯރިޓީން ފާސްކޮށް ސަރުކާރުގެ ގެެޒެޓްގައި ޝާއިކުރަން ވެސް އެ އިސްލާހުން ލާޒިމްކުރެ އެވެ. ރަށްރަށުގެ އިހުތިސާސްގެ ތެރޭގައިވާ ތަންތަނުގެ ފެންފަށަލައަށް ކުރާ އަސަރުތައް ދެނެގަތުމަށް ކައުންސިލްތަކުން ކުރަން ޖެހޭނެ ކަންތައްތަކެއް ވެސް އެ އިސްލާހުން ގަވައިދަށް އިތުރުކުރި އެވެ.
ކައުންސިލްތަކުން އެއްކޮށް، މިނިސްޓްރީއަށް ރިޕޯޓްކުރަން ޖެހޭނެ މައުލޫމާތުތައް
- ކައުންސިލްތަކުގެ އިހުތިސާސް ހިނގާ ތަންތަނުގައި ސިނާއީ އަދި އެހެން މަސައްކަތްތަށް ވެސް ބޭނުންކުރާ ސަރަހައްދުގެ ބޮޑުމިނާއި އެ ސަރަހައްދުގައި ފެން ބޭނުންކުރާ ގޮތް. ބޭނުންކުރަނީ ވަޅުފެން ނުވަތަ ވާރޭފެންތޯއާއި ފެން ބޭނުންކުރާ ސަރަހައްދުގެ ބޮޑުމިން. ފެން ބޭނުންކުރަނީ ރަށުގައި ގާއިމްކޮށްފައިވާ ޕްލާންޓަކުން ކަން ނުވަތަ ނޫންކަން ވެސް ވެސް ހިމަނަން ޖެހޭ.
- އިހުތިސާސް ހިނގާ ސަރަހައްދުގައިވާ ވަޅުތަކުގެ އަދަދު
- ޕަމްޕް ހަރުކޮށްގެން ފެން ނަގަމުން އަންނަ ވަޅުތަކުގެ އަދަދު
- ވަޅެއްގައި ހަރުކޮށްފައިވާ ޕަމްމްޕްގެ ކެޕޭސިޓީ.
- ބިން ތޮރުފައިގެން ނަގާ ފެނުގެ މިންވަރު
- ފެން ފަށަލަ ޓެސްޓްކުރާ އާލާތް ބޭނުންކުރާ ތަނެއްގައި ނަމަ ފެނުގެ ކޮލިޓީ ރިޕޯޓް.
