ގްރެފްޓަން، އޮސްޓްރޭލިއާ (މާޗް 1) - އޮސްޓްރޭލިއާގެ އިރުމަތީ އައްސޭރިފަށުގައި ފެންބޮޑުވެ، 150،000 އަށް ވުރެ ގިނަ މީހުން ގެތައް ދޫކޮށް ރައްކާތެރި ހިސާބުތަކަށް ބަދަލުވާން ޖެހިއްޖެ އެވެ.
ކުއީންސްލޭންޑާއި ނިއު ސައުތު ވޭލްސްގެ ގިނަ ހިސާބުތަކެއްގައި ފެންބޮޑުވުމުގެ އިންޒާރު ނެރެފައިވާ އިރު، ހަފްތާއެއް ވަންދެން މެދުނުކެނޑި ވާރޭ ވެހުމުން ފެންބޮޑުވެ، ކޯރާއި ފެންގަނޑުތައް ބަންޑުންވި އެވެ.
މިހާތަނަށް ނުވަ މީހުން މަރުވެފައިވާ އިރު، ހާހަކަށް ވުރެ ގިނަ މީހުން ސަލާމަތްކޮށްފައިވެ އެވެ. މަރުވި މީހުންގެ އަދަދު އިތުރުވާނެ ކަމަށް ކަމާ ބެހޭ އިދާރާތަކުން ލަފާކުރެ އެވެ.
އޭއެފްޕީން ލަފާކުރާ ގޮތުގައި ފެންބޮޑުވުމުގެ ސީދާ އަސަރުކޮށްގެން 150،000 އަށް ވުރެ ގިނަ މީހުންނަށް ވަނީ ގެތައް ދޫކޮށް އެހެން ތަންތަނަށް ބަދަލުވާން މަޖުބޫރުވެފަ އެވެ.
އެފަދަ މީހުންނަށް ހާއްސަ ވަގުތީ ހިޔާތައް ގާއިމްކޮށްފައި ވަނީ ސްކޫލްތަކާޢި ރެކްރިއޭޝަން ސެންޓަރުތަކާއި އެހެން ބައެއް އާއްމު އިމާރާތްތަކުގަ އެވެ.
ބައެއް ހިސާބުތަކުގައި ގެތަކުގެ ފުރާޅާ ހަމައަށް ފެންބޮޑުވެފައިވާ އިރު، ގިނަ ބަޔަކު ފުރާނަ ސަލާމަތް ކުރަން އަރައި ތިބީ ވެސް ފުރާޅުމަތީގަ އެވެ. އެ މީހުން ސަލާމަތް ކުރުމުގެ މަސައްކަތް ކުރަނީ ބޯޓުތަކާއި ހެލިކޮޕްޓަރުތަކުންނެވެ.
އޮސްޓްރޭލިއާގެ ދެކުނުން ސިޑްނީއަށް އަދިވެސް ދަނީ ވަރަށް ބޯކޮށް ވާރޭ ވެހެމުންނެވެ. އެހެންކަމުން، ފެންބޮޑުވެދާނެ ކަމަށް ބަލައި ތައްޔާރުވުމަށް އިންޒާރު ނެރިފައިވެ އެވެ.
