މާލެ ސިޓީ ކައުންސިލުގެ ހުއްދަ ނެތި މާލޭގެ މަގުތައްމަތީގައި ބަހައްޓާ ޕެލެޓްތައް އަންނަ މަހުގެ ނުވަ ވަނަ ދުވަހުން ފެށިގެން ނަގަން ފަށާނެ ކަމަށް ސިޓީ ކައުންސިލުން ބުނެފި އެވެ.
އެ ކައުންސިލުން މިއަދު ނެރުނު އިއުލާނެއްގައި ބުނީ މާލޭގައި ގަރާޖު އަދި ގުދަން ފަދަ ތަންތަނުގެ ކުރިމަތީގައި ހުއްދައަކާ ނުލައި ބަހައްޓާފައިވާ ޕެލެޓްތައް އަންނަ މަހުގެ ނުވަ ވަނަ ދުވަހުން ފެށިގެން އެ ކައުންސިލުން ނަގަން ފަށާނެ ކަމަށެވެ.
ސިޓީ ކައުންސިލުން ނެރުނު އެ އިއުލާނުގައި ބުނީ ގަރާޖު، ގުދަން، ވޯކްޝޮޕް އަދި ފިހާރަ ފަދަ ތަންތަނުގެ ކުރިމަތީގައި ޕެލެޓް ބަހައްޓާފައިވާ ފަރާތްތަކަށް މިއަދުން ފެށިގެން އަންނަ މަހުގެ ނުވަ ވަނަ ދުވަހާއި ހަމަޔަށް "ވަކި ކަމަކަށް އިމާރާތް ބޭނުންކުރުމުގެ ހުއްދަ" އަކަށް އެދި ސިޓީ ކައުންސިލަށް ހުށަހެޅުމުން އެފަދަ ތަންތަނުގެ ކުރިމަތީގައި ޕާކު ކުރުން މަނާކަން އަންގައިދޭ ގޮތަށް ދެ ރޮނގު ސިޓީ ކައުންސިލުން ކުލަ ލައިދޭނެ ކަމަށެވެ.
އަދި މާލެ ސިޓިގައި މުދާ ލޯޑުކުރުމާއި އަންލޯޑު ކުރުމަށް ވެސް ޕެލެޓް ބަހައްޓައިގެން މަސައްކަތްކުރާ ފަރާތްތަކުން އެފަދަ ސަރަހައްދެއް ހާއްސަކޮށްދިނުމަށް ސިޓީ ކައުންސިލަށް ހުށަހެޅުމުން ކުލި ނަގާ އުސޫލުގެ ދަށުން އެފަދަ ސްލޮޓްތައް ހަމަޖައްސައިދޭނެ ކަމަށް ސިޓީ ކައުންސިލްގެ އެ އިއުލާނުގައި ބުނެ އެވެ.
ސިޓި ކައުންސލުން އެ އިއުލާން ނެރުނުއިރު، މާލޭގެ ގިނަ މަގުތަކުގައި ޕެލެޓް ބަހައްޓާތީވެ އެކަމާ ގުޅިގެން އާންމުން އަބަދުވެސް ޝަކުވާތައް ކުރެ އެވެ.
އެގޮތުން ސައިކަލް އަދި ކާރު ޕާކު ކުރާނެ ޖާގައިގެ ދަތިކަން އިންތިހާއަށް އޮތް މާލޭގައި އެންމެ މަގެއްގައި ވެސް އެތައް ފިހާރައެއް ނުވަތަ ވިޔަފާރިއެއް ކުރިމަތީގައި ދެމެދަށް ޖާގަ ކުޑަވާ ގޮތަށް ޕެލެޓް ބަހައްޓާ ކަމުގެ ޝަކުވާ ބޮޑެވެ.
އަދި އެގޮތަށް ބަހައްޓާ ޕެލެޓްތައް ފީވެ ހަލާކުވުމުގެ ސަބަބުން ބައެއް ފަހަރު އާންމުންނަށް އެކި ކަހަލަ އަނިޔާތައްވާ ކަމުގެ މައްސަލަތައް ވެސް ފެންމަތިވެ އެވެ.
މާލޭގެ މަގުމަތީގައި ޕެލެޓް ބެހެއްޓުމަކީ ގާނޫނާ ހިލާފް ކަމެކެވެ. ނަަމަވެސް، ޕާކު ކުރުމުގެ ސަބަބުން މަގުމަތިން އާންމުންނަށް ޕޭވްމަންޓަށް ވާސިލުވުމަށް ޖާގަ ނުހުންނާތީވެ، އަދި ގަރާޖާއި ފިހާރަ ފަދަ ތަންތަނަށް މުދާ އަދި ވެހިކަލް ވެއްދުމާއި އާންމުންނަށް ވަނުމަށް ދަތިވާކަމަށް ބުނެ ޕެލެޓް ބެހެއްތުމަކީ އާންމުވެފައިވާ ކަމެކެވެ.
ނަމަވެސް ބައެއް މީހުން އުޅަނދު ޕާކުކުރަން ޖާގަ ރިޒާވް ކުރުމަށް ވެސް ގަވާއިދާ ހިލާފަށް ހުއްދައެއް ނެތި ޕެލެޓް ބަހައްޓައިގެން ޖާގަ ހިފަހައްޓަ އެވެ.
