މިދިޔަ އަހަރު ރިސޯޓުތަކުގެ އާމްދަނީ ރެކޯޑް އަދަދަކަށް އުފުލި 57.7 ބިލިއަން ރުފިޔާ (3.7 ބިލިއަން ޑޮލަރު) ލިބިފައިވާ ކަމަށް މޯލްޑިވްސް އިންލެންޑް ރެވެނިޔު އޮތޯރިޓީ (މީރާ)ގެ ތަފާސްހިސާބުތަކުން ދައްކައިފި އެވެ.
މީރާ އިން އާންމުކޮށްފައިވާ 2016-2021 އަށް ރިސޯޓުތަކަށް ލިބުނު އާމްދަނީ އާއި ރިސޯޓުތަކުން ދައުލަތަށް ލިބުނު އާމްދަނީ ރިޕޯޓަށް ބަލާއިރު، މިދިޔަ އަހަރަކީ ތާރީހުގައި ވެސް ޓޫރިޒަމް ސެކްޓާއަށް އެންމެ ބޮޑު އާމްދަނީއެއް ލިބުނު އަހަރެވެ.
އޭގެ ކުރިން ރިސޯޓުތަކަށް އެންމެ ބޮޑު އާމްދަނީއެއް ލިބިފައިވަނީ ރާއްޖެއަށް އެންމެ ގިނަ ޓޫރިސްޓުން އައި 2019 ވަނަ އަހަރު އެވެ. އެ އަހަރު ލިބުނީ 51.7 ބިލިއަން ރުފިޔާ (3.3 ބިލިއަން ޑޮލަރު) އެވެ.
ރިސޯޓުތަކަށް ލިބުނު އާމްދަނީގެ އިތުރުން ޓޫރިޒަމް ސެކްޓާއިން ލިބުނު ޖީއެސްޓީ އާމްދަނީއަކީ ވެސް ރެކޯޑެކެވެ. މިދިޔަ އަހަރު ޓީޖީއެސްޓީގެ ގޮތުގައި 4.8 ބިލިއަން ރުފިޔާ (316.5 މިލިއަން ޑޮލަރު) ލިބުނެވެ. މިދިޔަ އަހަރު ދައުލަތަށް އެއް ރެވެނިޔު ކޯޑުން އެންމެ ބޮޑު އާމްދަނީއެއް ލިބުނީވެސް ޓީޖީއެސްޓީންނެވެ.
މީރާގެ ރިޕޯޓުގައި އަތޮޅުތައް ވަކިކޮށްފައި ހުރި ނަމަވެސް މަދުން ރިސޯޓުތައް ހުރި އަތޮޅުތައް ހުރީ އެއްކޮށްލާފަ އެވެ. މިއީ ޓެކްސްޕެޔަރުންގެ މަސްލަހަތު ހިމާޔަތްކުރަން ކުރި ކަމެއް ކަމަށް އެ އިދާރާއިން ބުންޏެވެ.
ވަކި އަތޮޅުތަކަށް ބަލާއިރު ސޭލްސް އެންމެ ރަނގަޅީ އެންމެ ގިނަ ރިސޯޓު އޮންނަ ކ. އަތޮޅެވެ. ދެން އެންމެ ބޮޑު އާމްދަނީއެއް ލިބުނީ ބ. އަތޮޅާއި ނ. އަތޮޅާއި ރ. އަތޮޅު ރިސޯޓުތަކަށެވެ.
ރިސޯޓުތައް ހުންނަ ނިސްބަތުން އެންމެ ބޮޑު އާމްދަނީއެއް ލިބުނީ ނ. އަތޮޅު ރިސޯޓުތަކަށެވެ. އެ އަތޮޅުގައި ރިސޯޓުތައް މަދު ނަމަވެސް އެއަށް ވުރެ ގިނައިން ރިސޯޓު ހުންނަ ރ. އަތޮޅާއި އއ. އަތޮޅާއި އދ. އަތޮޅަށް ވުރެ ބޮޑު އާމްދަނީއެއް ނ. އަތޮޅު ރިސޯޓުތަކަށް ލިބުނެވެ.
ނ. އަތޮޅަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ މަތީފަންތީގެ ރިސޯޓުތައް ކަމުގައިވާ ސޮނޭވާ ޖާނީ އާއި ޝެވަލްބްލަންކް ރަންދެއްޔާއި ވެލާ ޕްރައިވެޓް އައިލެންޑާއި ސަން ސިޔާމް އިރުފުށި ހުންނަ އަތޮޅެވެ.
ރާއްޖޭގައި ޓޫރިސްޓުން ހޭދަ ކުރި ކޮންމެ ރެއަކަށް ހަރަދު ކުރީ 436.16 ޑޮލަރު (6725.99ރ.) އެވެ.
މިއީ މީރާއިން މިހާ ތަފުސީލުކޮށް ރިސޯޓުތަކަށް ލިބުނު އާމްދަނީއާއި ރިސޯޓުތަކުން ލިބުނު ޓެކްސް އާމްދަނީ އާންމުކުރި ފުރަތަމަ ފަހަރެވެ.
