ލަންޑަން (27 ފެބްރުއަރީ) - ރަޝިއާ އިން ޔޫކްރޭނާ ދެކޮޅަށް ފަށާފައިވާ ހަނގުރާމައާ ގުޅިގެން، ޗެލްސީ ވެރިޔާ ރަޝިއާގެ ބިލިޔަނަރު ރޯމަން އަބްރަމޮވިޗް އަށް އަމާޒުވަމުންދާ ޕްރެޝަރުގެ އަސަރު ޗެލްސީގެ ޓީމަށް ވެސް ފޯރާފައިވާ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
ޗެލްސީގެ ވެރިޔާ އަބްރަމޮވިޗް އަކީ ރަޝިއާގެ ރައީސް ވްލަޑިމިއާ ޕޫޓިންއާ ގާތް ގުޅުމެއް އޮންނަ، އޭނާގެ އަރިސް މީހެކެވެ. ރަޝިއާގެ އަސްކަރިއްޔާ އިން ޔޫކްރޭނަށް ދެމުންދާ ހަމަލާތަކާ ދެކޮޅަށް ޔޫރަޕްގެ ބޮޑެތި ގައުމުތަކުން ބަސްބުނަމުންދާއިރު، އިނގިރޭސިވިލާތުން ވެސް ވަނީ ރަޝިއާއާ ދެކޮޅަށް ދަތިކުރުމުގެ ބައެއް ފިޔަވަޅުތައް އަޅައިފަ އެވެ. އަދި އަބްރަމޮވިޗާ ދެކޮޅަށް ވެސް ފިޔަވަޅުތައް އެޅުމަށް، އިނގިރޭސިވިލާތުގެ ސިޔާސީ ފަރާތްތަކުން ވަނީ ގޮވާލައިފަ އެވެ.
ޕްރެޝަރު ބޮޑުވެ، އަބްރަމޮވިޗް ވަނީ އެ ކްލަބް ހިންގުމުގެ ކަންކަން ކްލަބްގެ ފައުންޑޭޝަނާ ހަވާލުކޮށްފި އެވެ.
އިނގިރޭސި ލީގު ކަޕްގެ ފައިނަލްގައި މިރޭ ލިވަޕޫލާ ދެކޮޅަށް ޗެލްސީ ނުކުންނައިރު، ޓުޗެލް ބުނީ ޔޫކްރޭން - ރަޝިއާގެ މައްސަލައާ ގުޅިގެން ކްލަބުގެ ވެރިޔާ އަށް ކުރިމަތިވެފައިވާ ޕްރެޝަރާ ގުޅިގެން، ޓީމަށް ވެސް އޭގެ އަސަރުކޮށްފައިވާ ކަމަށެވެ.
"މިއީ މައްސަލައަކަށް ނަަހަދާ، ދޫކޮށްލެވޭ ވަރުގެ ކަމެއް ނޫން. ފައިނަލަކަށް ނުކުންނައިރު، ޓީމުގެ ތެރޭގައި އޮންނަންޖެހޭ ކަހަލަ މާހައުލެއް ނޫން އޮތީ. ކުޅުންތެރިންނާއި އޮފިޝަލުންގެ ސިކުނޑީގައި، އިތުރު ނުވަތަނަވަސްކަމެއް އެބައުޅޭ،" ޓުޗެލް ބުންޏެވެ.
"މި ފަދަ ކަމެއް ހިނގާފާނެ ކަމަށް، އެއްވެސް މީހަކު ހިޔެއް ނުކުރޭ."
ލީގު ކަޕްގައި ޗެލްސީ މިހާތަނަށް ކުޅުނު މެޗުތަކުގައި، އެ ޓީމުގެ ގޯލު ބެލެހެއްޓީ ސްޕެއިންގެ ގޯލްކީޕަރު ކެޕާ އަރިޒަބަލާގާ އެވެ. ޓުޗެލް ބުނީ ފައިނަލްގައި ވެސް ކެޕާ އަށް ފުރަތަމަ 11 ގެ ޖާގައެއް ހައްގު ކަމަށެވެ. އެކަމަކު މިރޭގެ މެޗުގައި ކުޅޭނެ ކީޕަރެއް ޓުޗެލް ޔަގީންކަމާ އެކު ނުބުނެ އެވެ.
"ޓީމަށް އެންމެ ރަނގަޅު ގޮތަކަށް އަހަރެން ގޮތް ނިންމަންޖެހޭނީ،" ޓުޗެލް ބުންޏެވެ.
އަނެއްކޮޅުން އަނިޔާއިން ރަނގަޅުވެ، ޗެލްސީގެ ފަރިތަކުރުންތަކުގައި ބައިވެރިވަމުން އަންނަ ފުލްބެކް ރީސް ޖޭމްސް އަށް ވެސް މިރޭ ޓީމުގެ ފުރަތަމަ އެގާރައިން ފުރުސަތު ދޭން ޓުޗެލް އަންނަނީ ވިސްނަމުންނެވެ.
ވެމްބްލީ ސްޓޭޑިއަމްގައި މިރޭ ކުޅޭ ލީގު ކަޕް ފައިނަލް މެޗު ފަށާނީ ރާއްޖެ ގަޑިން 21:30 ގަ އެވެ.
