ލަންޑަން (ފެބްރުއަރީ 26) - ރަޝިއާ އިން ޔޫކްރޭނާ ދެކޮޅަށް ފަށައިފައިވާ ހަނގުރާމައިގެ ޕްރެޝަރުގައި ޖެހި ޗެލްސީގެ ވެރިޔާ ރަޝިއާގެ މަހުޖަނު، ރޯމަން އަބްރަމޮވިޗް އެ ކްލަބްގެ ހިންގުމުގެ ކަންކަން ކްލަބްގެ ފައުންޑޭޝަނާ ހަވާލުކޮށްފި އެވެ.
ޔޫކްރެއިނާއި ރަޝިއާ ހަނގުރާމައިގެ ސަބަބުން އިނގިރޭސިވިލާތުން ރަޝިއާ އަށް އަޅާފައިވާ ދަތިކުރުމުގެ ފިޔަވަޅުތައް ވަރުގަދަ ކުރުމުގެ މަސައްކަތް ފަށާފައިވާއިރު، އޭގެއިން އެންމެ މުހިންމު ކަމެއްގެ ގޮތުގައި ޗެލްސީގެ ވެރިޔާ، އަބްރަމޮވިޗް އަތުން އެ ކްލަބް ނަގަން ގިނަ ސިޔާސީ ފަރާތްތަކުން އަންނަނީ ގޮވާލަމުންނެވެ. އެއީ އަބްރަމޮވިޗަކީ ރަޝިއާގެ ރައީސް ލެޑިމިއަ ޕުޓިންގެ އަރިސް މީހަކަށް ވާތީ އެވެ.
އެ ކަންކަމަށް ސީދާ ޖަވާބެއް ދިނުމެއް ނެތި އަބްރަމޮވިޗްގެ ފަރާތުން މިރޭ ޗެލްސީން ނެރުނު ބަޔާނެއްގައި ބުނެފައިވަނީ ކްލަބް ހިންގުމުގެ ކަންކަން އަބްރަމޮވިޗް ވަނީ އެ ޓީމުގެ ފައުންޑޭޝަނާ ހަވާލުކޮށްފައި ކަމަށެވެ.
އަބްރަމޮވިޗް ބުނީ ޗެލްސީއާ ހަވާލުވެ، މިވީ ވިއްސަކަށް އަހަރު ތެރޭގައި ނިންމި ކޮންމެ ނިންމުމަކީ ވެސް ކްލަބްގެ ހައްގުގައި ވަރަށް ވިސްނުންތެރިކަމާ އެކު ކޮށްްފައިވާނެ ކަންކަން ކަމަށެވެ. އަދި މި ވަގުތު ކަންތައްތައް ހިނގަމުން އަންނަ ގޮތަށް ބަލާއިރު، ޗެލްސީގެ ކަންކަން ހިންގަން އެންމެ އެކަށޭނެ ބަޔަކީ އެ ކްލަބްގެ ފައުންޑޭޝަން މެމްބަރުން ކަމަށް އަބްރަމޮވިޗް ވަނީ ބުނެފަ އެވެ.
އަބްރަމޮވިޗް ޗެލްސީ ގަތީ 2003 ވަނަ އަހަރު އެވެ. އޭގެ ފަހުން އެކި ފަހަރު މަތިން އިނގިރޭސި އެކި މަހުޖަނުން ޗެލްސީ ގަންނަން އައި ނަމަވެސް އަބްރަމޮވިޗް ވަނީ އެ ހުށަހެޅުންތަކަށް ފުރަގަސްދީފަ އެވެ. މި ފަހަރު އަބްރަމޮވިޗް ކުއްލިއަކަށް ޗެލްސީ ހިންގުމުގެ ކަންކަމުން ކޮންޓްރޯލްް ދޫކޮށްލަން ނިންމީ ޔޫކްރެއިނާއި ރަޝިއާ މައްސަލައިގައި އެ ކްލަބަށް އެކި ކަހަލަ ފިއްތުންތައް ކުރިމަތިވެދާނެތީ އެވެ.
ޔޫކްރެއިނާއި ރަޝިއާގެ މައްސަަލަ ތެރޭގައި ޗެލްސީގެ ވެރިޔާ އަބްރަމޮވިޗަށް އަންނަ ޕްރެޝަރުތަކުގެ ނޭދެވޭ އަސަރުތަކެއް ޗެލްސީ އަށް ކޮށްފާނެ ކަމަށް އެ ޓީމުގެ ކޯޗު ތޯމަސް ޓުޗެލް ވެސް ވަނީ ބުނެފަ އެވެ.
ރަޝިޔާގެ ކުރީގެ ޖާސޫސަކަށް އިނގިރޭސި ވިލާތުގައި ވިހަ ދިން މައްސަލައިގައި އުފެދުނު ހިޔާލުތަފާތުވުންތަކުގެ ތެރެއިން 2018 ވަނަ އަހަރު އިނގިރޭސި ސަރުކާރުން ނިންމީ އަބްރަމޮވިޗް ހިމެނޭ ގޮތަށް ރަޝިއާގެ ގިނަ މަހުޖަނުންގެ އިންވެސްޓްމަންޓް ވިސާ އާ ނުކޮށްދޭށެވެ. އެހެންވެ، އަބްރަމޮވިޗް ވަނީ އިޒްރޭލުގެ ރަށްވެހިކަން ހޯދައިފަ އެވެ. އިޒްރޭލުގެ ޓެލް އަވީވްގައި ދިރިއުޅެމުން އަންނަ އަބްރަމޮވިޗަށް ޔަހޫދީންނަށް ދޭ ހާއްސަ ކްރައިޓީރިއާ އަކުން ޕޯޗުގީސް ރަށްވެހިކަން ވެސް ދީފައިވާއިރު، އަބްރަމޮވިޗް ތިން އަހަރު ތެރޭ ފުރަތަމަ ފަހަރަށް ޗެލްސީ މެޗަކަށް ލަންޑަނަށް ދިޔައީ މިދިޔަ ނޮވެމްބަރު މަހު އިޒްރޭލް ރަށްވެއްސެއްގެ ގޮތުގަ އެވެ.
ރަޝިއާ އާއި ޔޫކްރެއިން މައްސަލައިގައި އަބްރަމޮވިޗަށް އެއްވެސް ފަސޭހަމަގެއް ފެންނަން ނެތުމުން އަބްރަމޮވިޗް ވަނީ މި ވަގުތަށް ޗެލްސީގެ ކޮންޓްރޯލް ދޫކޮށްލައިފަ އެވެ.
