އެއްވެސް މެޗަކުން ބަލިނުވެ، ބައިކޮޅަށް ލަނޑެއް ވެސް ނުވަދެ، ކްލަބް އީގަލްސް އިން ދާދި ފަހުން ނިމުނު އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕް ކާމިޔާބުކުރުން އެ ކްލަބުން ފާހަގަކޮށްފި އެވެ.
ޔޫތު ޗެމްޕިއަންޝިޕްގެ އެންމެ ކާމިޔާބު ޓީމު ކަމަށްވާ އީގަލްސް އިން ވަނީ މިހާތަނަށް ޔޫތު ޗެމްޕިއަންޝިޕްގެ ނުވަ މުބާރާތް ކުޅުނުއިރު، ހަތް މުބާރާތުގެ ފައިނަލުގައި ކުޅެފަ އެވެ. ފަސް ފަހަރު ތަށި އުފުލާލި އީގަލްސް އިން އެންމެ ފުރަތަމަ ކާމިޔާބުކުރީ ހަތަރު ތަށްޓަކީ ވެސް 21 އަހަރުން ދަށަށް މުބާރާތް ބޭއްވިއިރު އެވެ. އެއީ 2014، 2016، 2017 އަދި 2019 ވަނަ އަހަރު އެވެ.
ޔޫތު މުބާރާތް 19 އަހަރުން ދަށަށް ބޭއްވި ހަމައެކަނި ފަހަރު 2018 ވަނަ އަހަރު އީގަލްސް ވަނީ ކްލަބް ގްރީން ސްޓްރީޓްސް އަތުން ފައިނަލުގައި ބަލިވެފަ އެވެ. އެކަމަކު، މި ފަހަރު 19 އަހަރުން ދަށަށް ހާއްސަކޮށްގެން ބޭއްވި ފަހަރު ވެސް އީގަލްސް އިން މި ވަނީ ތަށި އުފުލާލައިފަ އެވެ. އީގަލްސްގެ ކާމިޔާބީގެ އެންމެ ބޮޑު ހިއްސާއެއް މި ފަހަރު އޮތީ ކޯޗު އަހުމަދު ނިމާދު (ނިމާ) އެވެ.
ޔޫތު ޗެމްޕިއަންޝިޕްގައި އީގަލްސްގެ ކާމިޔާބީ ފާހަގަކުރަން އިއްޔެ ހަވީރު ޓާފް ދަނޑުގައި ބޭއްވި އިވެންޓްގައި އެ ކްލަބްގެ ސީނިއާ މެނޭޖްމަންޓުގެ އިސް ވެރިން ބައިވެރިވެވަޑައިގެންނެވި އެވެ.
އޭގެ ތެރޭގައި އީގަލްސްގެ ޗެއާޕާސަން، ފާތިމަތު ސައުދު (ތާތު) އާއި ކްލަބްގެ ވައިސް ޗެއާމަން މުފާވިޒް ހާޝިމް (މުފާ)ގެ އިތުުރުން އީގަލްސްގެ ކުރީގެ ޗެއާމަންކަން ކުރެއްވި މާލޭގެ ފުރަތަމަ މޭޔަރު އަދި ވިޔަފާރިވެރިޔާ ސަރަނގު އާދަމް މަނިކު ވެސް ބައިވެރިވެވަޑައިގެންނެވި އެވެ.
އިއްޔެގެ އިވެންޓްގައި އީގަލްސްގެ ސީނިއާ ޓީމާއި ޔޫތު ޓީމުގެ އިތުރުން ކްލަބްގެ އެކެޑަމީގެ ކުދިން ވެސް ވަނީ ބައިވެރިވެފަ އެވެ.
އަށްޑިހައިގެ ފަހު ކޮޅު މާފަންނުން ވުޖޫދުވި ކްލަބް އީގަލްސް 2010 އިން ފެށިގެން ފުރަތަމަ ޑިވިޝަނުގައި ކުޅެމުން އަންނައިރު، އެ ކްލަބްގެ ކާމިޔާބީގައި އެންމެ ހާއްސަ މުބާރާތަކީ ޔޫތު ޗެމްޕިއަންޝިޕް އެވެ. އެ މުބާރާތުގެ އެންމެ ކާމިޔާބު ކްލަބްގެ ޝަރަފް އޮތް އީގަލްސް އިން ވަނީ އެ މުބާރާތުގެ ތެރެއިން ކުޅުންތެރިން ޑިވެލޮޕްކޮށް، ސީނިއާ ޓީމަށް ކުޅުންތެރިން ޕްރޮމޯޓްކޮށް ވަރުގަދަ ސްކޮޑެއް އެކުލަވާލައިފަ އެވެ. އެ މަސައްކަތުގެ ތެރެއިން އީގަލްސް އަށް ލިބުނު ހާއްސަ ކާމިޔާބީ އަކީ 2016 ވަނަ އަހަރުގެ ޕްރެޒިޑެންޓްސް ކަޕް އެވެ.
އަންހެން ފުޓްބޯޅަ އެކެޑަމީއެއްގެ މަސައްކަތް ވެސް ދާދި ފަހުން ފެށި އީގަލްސް އިން ވަނީ މިދިޔަ ޑިސެމްބަރު މަހު ގައުމީ ބިލިއާޑް ޗެމްޕިއަންކަން ވެސް ހޯދައިފަ އެވެ.
