އެމްޑީޕީގެ ޗެއާޕާސަންކަމަށް ވަޑައިގަތުމަށް ކުރައްވާ ކެމްޕެއިން ލޯންޗްކުރެއްވުމަށްޓަކައި އިކޮނޮމިކް މިނިސްޓަރު ފައްޔާޒް އިސްމާއީލް ވަޑައިގެންނެވުމުން ށ. މިލަންދޫގެ އެމްޑީޕީ މެމްބަރުން އޭނާއަށް ވަރަށް ހޫނު މަރުހަބާއެއް ކިޔައިފި އެވެ.
ފައްޔާޒާއި އޭނާގެ ޓީމް މީގެ ކުޑައިރުކޮޅެއް ކުރިން މިލަންދުއަށް ވަޑައިގެންނެވި އިރު މިރަށު ބަނދަރަށް އެމްޑީޕީގެ ވަރަށް ގިނަ އަދަދެއްގެ މީހުން ނުކުމެ ތިއްބެވެ. އޭނާއަށް މަރުހަބާ ދަންނަވަން އެެއްވި މީހުން ހަދައިލި ސަފު ބަނދަރުން ފެށިގެން އެއްގަމަށް ގާތްގަނޑަކަށް 1700 ފޫޓަށް ދަމާލާފައި އޮތެވެ.
އިކޮނޮމިކް މިނިސްޓަރު ފައްޔާޒް އިސްމާއީލަށް މިލަންދޫ މީހަކު މަރުހަބާ ކިޔަނީ. ފޮޓޯ: މައިމޫން މުހައްމަދު
މިލަންދޫ ބަނދަރުގައި މިރޭ ބާއްވާ ރަސްމިއްޔާތުގައި ފައްޔާޒްގެ ކެމްޕޭނުގެ އިތުރުން، އެމްޑީޕީގެ އަންހެނުންގެ ރޫހުގެ ރައީސްކަމަށް ކުރިމަތިލައްވާފައިވާ، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ކެމްޕޭން ލޯންޗްކުރުން ވެސް އޮންނާނެ އެވެ.
ކެމްޕޭން ލޯންޗްކުރާ ޖަލްސާއަށް ފައްޔާޒާއި ރޮޒައިނާގެ އިތުރުން ފިނޭންސް މިިނިސްޓަރު އިބްރާހީމް އަމީރާއި އެމްޑީޕީގެ ޕާލަމެންޓްރީ ގްރޫޕްގެ 30 މެމްބަރުން މިލަންދުއަށް ވަޑައިގެންނެވި އެވެ. ފައްޔާޒްގެ ކެމްޕޭން މެނޭޖަރު އިބްރާހީމް ރަޝީދު ވިދާޅުވި ގޮތުގައި އެމްޑީޕީގެ ގައުމީ މަޖިލީހުގެ 45 މެމްބަރުން ވެސް މި ކެމްޕޭންގައި ބައިވެރިވެވަޑައިގަންނަވަ އެވެ.
ކެމްޕެއިން ލޯންޗްކުރުމުގެ ރަސްމިއްޔާތު އިންތިޒާމްކުރެއްވުމުގައި އިސްކޮށް އުޅުއްވަނީ ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ އެވެ.
