އަބޫ ދާބީ، ޔޫއޭއީ (ފެބްރުއަރީ 25) - ދުބާއީ ޗެމްޕިއަންޝިޕްގެ ކުއާޓާ ފައިނަލުގައި ޗެކް ރިޕަބްލިކްގެ ޔިރީ ވެސެލީ އަތުން ބަލިވެ، ސާބިއާގެ ނޮވަކް ޖޮކޮވިޗަށް ދުނިޔޭގެ ރޭންކިންގެ އެއް ވަނަ ގެއްލޭނެކަން ކަށަވަރުވެއްޖެ އެވެ.
މިދިޔަ މަހު އޮސްޓްރޭލިއަން އޯޕަންގައި ކުޅެން ޖޮކޮވިޗް އޮސްޓްރޭލިއާ އަށް ދިއުމުން ދެ ފަހަރެއްގެ މަތިން ކޯޓުގައި ކުރިއަށްދިޔަ ކޮވިޑް-19ގެ ވެކްސިން މައްސަލައެއްގައި ޖޮކޮވިޗް އޮސްޓްރޭލިއާ އިން ޑީޕޯޓްކޮށްލީ އެ ގައުމުގެ އިމިގްރޭޝަނުންނެވެ. އޭގެ ފަހުން ރަސްމީ މެޗެއްގައި ނުކުޅެ ހުރެފައި ޖޮކޮވިޗް ފުރަތަމަ ކުޅޭ މުބާރާތަކީ ދުބާއީ ޗެމްޕިއަންޝިޕް އެވެ.
އެ މުބާރާތުގައި އިއްޔެ ކުޅުނު ކުއާޓާ ފައިނަލް މެޗުން ދުނިޔޭގެ 123 ވަނައިގައި އޮތް ވެސެލީ ވަނީ މޮޅަށް ކުޅެ ޖޮކޮވިޗް ބަލިކޮށްފަ އެވެ. މެޗުގެ ސެޓުތައް ދިޔައީ 6-4 7-6 (7-4) އިންނެވެ. މި ނަތީޖާއާ އެކު ހޯމަ ދުވަހު ނެރޭ ޓެނިހުގެ އާ ރޭންކިން ތާވަލުގައި ޖޮކޮވިޗްގެ ބަދަލުގައި އެއް ވަނައިގައި އޮންނާނީ ރަޝިއާގެ ޑަނީލް މެޑްވެޑޭވް އެވެ.
މެޗުން މޮޅުވުމުން ވެސެލީ އުފާފާޅުކުރަނީ.-- ފޮޓޯ: އޭއެފްޕީ
ވެސެލީ ބުނީ ޖޮކޮވިޗް ފަދަ ކުޅުންތެރިއަކު އަތުން މޮޅެއް ހޯދުމަކީ މުޅި ކެރިއަރުގައި ވެސް ހަނދާނުގައި ހުންނާނެ ބޮޑު ކަމެއް ކަމަށެވެ. ޖޮކޮވިޗާ ދެކޮޅަށް ކުޅެން ނުކުތީ މޮޅުވެދާނެ ކަމުގެ އެއްވެސް އުންމީދެއް ނެތި ކަމަށާއި ރަނގަޅު ފައިޓެއް ދިނުމުގެ އަޒުމުގައި ނުކުމެ، މެޗުން މޮޅެއް ލިބުމުން ވަރަށް އުފަލުން ހުރި ކަމަށް ވެސެލީ ވަނީ ބުނެފަ އެވެ.
މިދިޔަ 18 އަހަރު ތެރޭ ޓެނިހުގެ ފިރިހެން ރޭންކިންގެ އެއް ވަނައިގައި ޖޮކޮވިޗާއި، ރަފައެލް ނަޑާލް، ރޮޖާ ފެޑެރާ އަދި އެންޑީ މަރޭ ނޫނީ އެހެން ކުޅުންތެރިއަކަށް ޖާގަ ނުލިބެ އެވެ. އެހެންކަމުން މެޑްވެޑޭވް ރޭންކިން އެއް ވަނަ އަށް އެރުމަކީ އޭނާ އަށް ހާސިލްކުރެވޭ ތާރީހީ ކާމިޔާބެކެވެ.
ޖޮކޮވިޗަށް އެއް ވަނަ މި ގެއްލެނީ 361 ހަފްތާގައި މަގާމު ދަމަހައްޓާފަހުންނެވެ. ޖޮކޮވިޗަކީ އެންމެ ދިގު މުއްދަތަކަށް ރޭންކިން އެއް ވަނަ ދެމެހެއްޓުމުގެ ރެކޯޑް އޮތް ކުޅުންތެރިޔާ އެވެ.
