އިންޑިއާގެ މުސްލިމް އަންހެން ނޫސްވެރިޔަކަށް އޮންލައިންކޮށް ފުރައްސާރަ ކުރާ މައްސަލައިގައި އދ. ގެ ހައްގުތަކާ ބެހޭ ތަޖުރިބާކާރުން ކަންބޮޑުވުން ފާޅުކޮށް، ތަހުގީގު ކުރަން ކަމާ ބެހޭ ފަރާތްތަކަށް ގޮވާލައިފި އެވެ.
ރަނާ އައްޔޫބަކީ ބޮޑު ވަޒީރު ނަރެންދްރަ މޯދީ އާއި އެމަނިކުފާނުގެ ބަރަތިޔަ ޖަނަތަ ޕާޓީ (ބީޖޭޕީ) ގެ ހިންދީ ފިކުރަށް ވަރަށް ބޮޑަށް ފާޑުކިޔަމުންދާ ނަން މަޝްހޫރު ނޫސްވެރިއެކެވެ.
އޭނާއާ ދެކޮޅަށް އޮންލައިން ބޮޑު ކެމްޕެއިނެއް ހިންގަމުންދާ އިރު، މަރާލާނެ ކަމަށާއި ރޭޕް ކުރާނެ ކަމަށް ބުނެ ކޮންމެ ދުވަހަކު ވެސް ގިނަ އިންޒާރުތަކެއް ފޮނުވަމުންދެ އެވެ.
ރަނާ އައްޔޫބްގެ މައްސަލައިގައި ކަންބޮޑުވުން ފާޅުކުރި ތަޖުރިބާކާރުންނަކީ އދ. ގެ ފަރާތުން ހިޔާލު ހުށަހަޅާ ބައެއް ނޫނެވެ. ނަމަވެސް އެ މީހުންގެ ޒިންމާއަކީ ކަންބޮޑުވުންތައް އދ. އަށް ރިޕޯޓު ކުރުމެވެ.
ތަޖުރިބާކާރުން ނެރުނު ބަޔާނެއްގައި ބުނީ ރަނާ އައްޔޫބަށް އަމާޒުކޮށްފައި ވަނީ އިންޑިއާގެ މައިނޯރިޓީ މުސްލިމުންނަށް ދިމާވާ ކަންކަމާ ގުޅޭ ގޮތުން ރިޕޯޓު ކުރާތީ ކަމަށެވެ.
އޭގެ އިތުރުން ކޮވިޑާ ގުޅިގެން ސަރުކާރުން އަމަލު ކުރި ގޮތަށް ފާޑުކިޔުމާއި ދެކުނު ކަރްނާޓަކާ ސްޓޭޓުގެ ސްކޫލްތަކާއި ކޮލެޖުތަކުން ބުރުގާ މަނާކުރި މައްސަލައިގައި ރިޕޯޓު ކުރުމުން ވެސް އޭނާއަށް ދަނީ އަމާޒުވަމުންނެވެ.
އޭނާއަށް އަމާޒު ކުރާ ހަމަލާތަށް ކުށްވެރި ކުރުމާއި ތަހުގީގު ކުރުމުގައި އިންޑިއާ ސަރުކާރުން ފެއިލްވެފައިވާ ކަމަށް އެ ބަޔާނުގައިވެ އެވެ.
އޭނާގެ "ރިޕޯޓު ކުރުމާ ހެދި އިންޑިއާގެ ކަމާ ބެހޭ އިދާރާތަކުން ދަނީ ގާނޫނުގެ ތެރެއިން ވެސް ފުރައްސާރަ ކުރަމުން" ކަމަށް އދ. ގެ ތަޖުރިބާކާރުން ބުންޏެވެ. އެގޮތުން ބޭންކް އެކައުންޓާއި އެހެން މުދާ ހިފަހައްޓާފައިވާކަން ފާހަގަކުރި އެވެ.
އުމުރުން 37 އަހަރުގެ ރަނާ އައްޔޫބް ކެރިއަރު ފެށީ ތަހުގީގީ ނޫސްވެރިއެއްގެ ގޮތުގަ އެވެ. އޭނާ ވަނީ 2002 ވަނަ އަހަރު ގުޖަރާތު ސްޓޭޓުގައި މުސްލިމުންނާއި ހިންދޫންނާ ދެމެދު ހިނގި ބޮޑު ގަތުލުއާއްމު ހުއްޓުވުމުގައި އޭރު ގުޖަރާތުގެ ޗީފް މިނިސްޓަރަކަށް ހުންނެވި މޯދީ ފެއިލްވި ކަމަށް ބަޔާންކޮށް ފޮތެއް ލިޔެފަ އެވެ.
ހިންދޫން ނުކުމެ ގިނަ އަދަދެއްގެ މުސްލިމުން މެރި އެ ހަމަނުޖެހުމުގައި މޯދީގެ ބައިވެރިވުމެއް ނެތް ކަމަށް ތަހުގީގުން ކަނޑައަޅާފައިވެ އެވެ.
މިހާރު ރަނާ އައްޔޫބު ދަނީ އެމެރިކާގެ ދަ ވޮޝިންޓަން ޕޯސްޓް އަދި އެހެން ބައެއް ނޫސްތަކަށް ކޮމެންޓޭޓަރެއްގެ ގޮތުގައި އެކި މައްސަލަތަކާ ގުޅޭ ގޮތުން ލިޔަމުންނެވެ.
މި ހަފްތާގައި ވޮޝިންޓަން ޕޯސްޓުން ޝާއިއު ކުރި އެއް ސަފްހާގެ ލިޔުމެއްގައި ބުނީ ރަނާ އައްޔޫބަށް މަރުގެ އިންޒާރު ލިބެމުންދާ ކަމަށާއި އިންޑިއާގައި މިނިވަން ނޫސްވެރިކަމަށް "ހަމަލާދެމުންދާ" ކަމަށެވެ.
ޖެނީވާގައި ހުންނަ އދ. ގެ މިޝަނުން ކުރި ޓްވީޓެއްގައި ބުނީ އދ. ގެ ހައްގުތަކާ ބެހޭ ތަޖުރިބާކާރުންގެ ތުހުމަތުތައް އެއީ ދޮގެއް ކަމަށާއި އޭގެ ސަބަބުން އދ. ގެ އަގު ވެއްޓޭނެ ކަމަށެވެ.
ރަނާ އައްޔޫބުގެ އިތުރުން އެހެން ނޫސްވެރިންނަށް ވެސް މޯދީގެ ސަރުކާރުގައި ފިއްތުންތައް ކުރިމަތިވާތީ މީގެ ކުރިން ޝަކުވާކޮށްފައިވެ އެވެ.
ރިޕޯޓާޒް ވިތައުޓް ބޯޑާޒްއިން ނޫސްވެރިކަމުގެ މިނިވަންކަމުގެ އިންޑެކްސްގައި އިންޑިއާ ރޭންކު ކުރަނީ 142 ވަނައިގަ އެވެ.
