އުރީދޫ ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ދަ ގްރާންޑޭ ސްޕޯޓްސް ކްލަބް އަތުން 1-0 އިން ޔުނައިޓެޑް ވިކްޓްރީ (ޔޫވީ) އިން އުނދަގޫ މޮޅެއް ހޯދައިފި އެވެ.
ފުރަތަމަ މެޗުން ޔުނައިޓެޑް ވިކްޓްރީ ވަނީ ކްލަބް ވެލެންސިއާ އަތުން ބަލިވެފަ އެވެ. އެހެންކަމުން މިއަދު ދަ ގްރާންޑޭ އަތުން ޔުނައިޓެޑް ވިކްޓްރީ އަށް ލިބުނީ މި ފަހަރު ލީގުގައި އެ ޓީމުގެ ފުރަތަމަ މޮޅެވެ. ދަ ގްރާންޑޭ ފުރަތަމަ މެޗުން ކްލަބް ގްރީން ސްޓްރީޓްސްއާ އެއްވަރުވިއިރު، މިއަދު މި ވަނީ ލީގުގައި ފުރަތަމަ ބައްޔާ ކުރިމަތިލާން ޖެހިފަ އެވެ.
ގަލޮޅު ދަނޑުގައި ކުޅުނު މިއަދުގެ މެޗު ފަށައިގެން ދެ ވަނަ މިނިޓްގައި ޔުނައިޓެޑް ވިކްޓްރީގެ އަހުމަދު ބައްސާމް މުހައްމަދު ނައީމް (ބައްކު) އަށް ރަނގަޅު ފުރުސަތެއް ލިބުނެވެ. ދަ ގްރާންޑޭ ކީޕަރު ހަސަން މުއާޒް ހިފަން އެރި ބޯޅައެއް އަތުން ދޫވެ، އޭރިއާތެރެއިން ބައްކު އަށް ލިބުމުން އޭނާ ޖެހި ބޯޅަ ބޭރުވީ ގޯލުގެ ދަނޑީގައި ޖެހިފަ އެވެ. އޭގެ ފަސް މިނިޓް ފަހުން ޔުނައިޓެޑް ވިކްޓްރީގެ ބެލަރޫސް ފޯވާޑް އިވާން ވެރާސް ވޮލީ އަކުން ފޮނުވާލި ބޯޅަ ބޭރުވީ ގޯލުގެ ދަނޑީގައި ޖެހިފަ އެވެ.
ފުރަތަމަ ވިއްސަކަށް މިނިޓަށް ފަހު ދަ ގްރާންޑޭ މެޗުގެ ތެރެއަށް ވަދެ ރަނގަޅަށް ކުޅެން ފެށި އެވެ. ދަ ގްރާންޑޭގެ ލަންކާ ދެ ކުޅުންތެރިން ކަމަށްވާ ޗަމޯދު ދިލްޝާން އާއި މުހައްމަދު އާކިބަށް ލިބޭ ބޯޅަތަކުގައި އެޓޭކްކުރެވޭތޯ މަސައްކަތް ކުރަމުންދިޔައިރު، އާކިބް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އޭގެ ފަހުން ދަ ގްރާންޑޭގެ އަހުމަދު ވިޖުދާން (ވިޖުއްކޮ) އޭރިއާބޭރުން ފޮނުވާލި ދިޔައީ ހުރަސްދަނޑިމަތިންނެވެ.
ލަނޑު ޖެހުމަށް ފަހު ޔުނައިޓެޑް ވިކްޓްރީގެ ކުޅުންތެރިން އުފާފާޅުކުރަނީ.-- ފޮޓޯ: އަބްދުﷲ އިޔާން/ އަދަދު
އާކިބް ވަނީ މެޗުގެ 30 ވަނަ މިނިޓްގައި ޔުނައިޓެޑް ވިކްޓްރީގެ ކީޕަރު އަހުމަދު އަނަފް ޒަރިޔަންދު ކައިރިން ނައްޓާފައި ބޯޅަ ހިފައިގެން ގޮސް ގޯލު ކުރިމައްޗަށް ހުރަސްކުރަން މަސައްކަތްކޮށްފަ އެވެ. އެކަމަކު، އެ ބޯޅަ ޔުނައިޓެޑް ވިކްޓްރީ ޑިފެންޑަރުން ވަނީ ސަލާމަތްކޮށްފަ އެވެ.
ދެ ވަނަ ހާފްގެ ކުޅުން ފެށިގެން މިނިޓެއް ނުވަނިސް ޔުނައިޓެޑް ވިކްޓްރީގެ ކިރްގިސްތާން މިޑްފީލްޑަރު އަނަޓޯލީ ވްލަޝީޗޭފް (ޓޯނީ) ޖެހި ބޯޅަ ދަނޑިކައިރިން ބޭރުންނެވެ. އޭގެ 10 މިނިޓް ފަހުން ޓޯނީ އޭރިއާތެެރެއިން ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިގެން ޔުނައިޓެޑް ވިކްޓްރީ އަށް މެޗުގެ ހަމައެކަނި ގޯލު ޖަހައިދިނެވެ. ޓޯނީ އަށް އަނިޔާވެގެން ފަހުން އޭނާ ވަނީ ބަދަލުކޮށްފަ އެވެ.
މެޗުގެ 71 ވަނަ މިނިޓްގައި ޔުނައިޓެޑް ވިކްޓްރީގެ ކީޕަރު އަނަފް ކުރިއަށް އަރައި ޖެހި ބޯޅައެއް ހާފުގެ މެދުތެރެއިން ލިބުނީ ދަ ގްރާންޑޭގެ ޗަމޯދު އަށެވެ. ޗަމޯދު ފޮނުވާލި ބޯޅަ ކީޕަރު އަނަފް ބޯމަތިން ގޮސް ދިޔައީ ހުރަސްދަނޑިމަތިންނެވެ.
ޔުނައިޓެޑް ވިކްޓްރީ އަށް ލީޑުފުޅާކޮށްދޭން އެ ޓީމުގެ އަލީ ހަމްދާން (އައްޔަ) އޭރިއާބޭރުން ޖެހި ބޯޅަ ދިޔައީ އަރިމަތިން ބޭރުންނެވެ. އޭގެ ފަހުން ބައްކު ޖެހި ބޯޅައެއް ވެސް ވަނީ ހުރަސްދަނޑިމަތިން ގޮސްފަ އެެވެ. އޭގެ ފަހުން ވެސް ޔުނައިޓެޑް ވިކްޓްރީން ލަނޑެއް ޖެހޭތޯ މަސައްކަތް ކުރި ނަމަވެސް ކާމިޔާބެއްނުވި އެވެ.
ލީގުގެ ދެ ވަނަ ހަފްތާގެ ފަހު މެޗުގައި މިރޭ ގްރީން ސްޓްރީޓްސް ކުޅޭނީ ކްލަބް ވެލެންސިއާއާ އެވެ.
