މަސްތުވާތަކެތީގެ މައްސަލަތަކުގައި ރާވައިގެން ގަސްދުގައި ގޯސްހަދާ މީހުން ދައުލަތުގެ އެތެރޭގައި ތިބިކަމަށް ބަންޑާރަ ނައިބު ރައްޔިތުންގެ މަޖިލީހުގެ ކޮމިޓީއެއްގައި ކުރެއްވި ތުހުމަތު ސާފުކޮށް ދެއްވުމަށް ހޯމް މިނިސްޓަރު އިމްރާން އަބްދުﷲ އަރިހުން އެދިއްޖެ އެވެ.
ކޯޓުތަކުގައި މައްސަލަތައް ލަސްވާ މައްސަލައާ ގުޅޭ ގޮތުން ކަމާ ބެހޭ އިދާރާތަކުގެ ވެރިންނާއެކު ރައްޔިތުންގެ މަޖިލީހުގެ ޖުޑިޝަރީ ކޮމިޓީން މިދިޔަ ބުދަ ދުވަހު ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ބަންޑާރަ ނައިބު އިބްރާހިމް ރިފްއަތު ވިދާޅުވީ، ގޯސްހަދާ ފަރާތްތައް ފުލުހުންގެ އިދާރާ އާއި ތަހުގީގީ އެހެން އިދާރާތަކުގައި ވެސް އެބަތިބި ކަމަށެވެ. އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމްވެގެން ކުރާ ކަމެއްގެ ގޮތުގަ އެވެ.
"ހާއްސަކޮށް މަސްތުވާތަކެތީގެ މައްސަލަތަކުގައި ހަމަ ރޭވިގެން އިންތިޒާމްވެގެން ވެސް އެބަ ތަހުގީގީ އިދާރާތަކުގެ މެދުގައި ނޫނީ ފުލުހުންގެ ތެރޭގައި ނޫނިއްޔާ ދައުލަތުގެ އެހެން ތަންތަނުގައި ވެސް އެބަ ތިބި ހަމަ ގޯސް ހަދާ މީހުން،" ރިފްއަތު ވިދާޅުވި އެވެ.
އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ނިޒާމު ރަނގަޅަށް އެނގިގެން، ނިޒާމުގެ ތެރޭގައި ހުރި ލޫޕްހޯލްތައް ހޯދައިގެން ކަމަށާއި އެކަން އެގޮތަށް ކުރަނީ ގަސްދުގައި "ނުނިޔަތެއް ބާއްވައިގެން" ކަމަށެވެ.
"މިހަގީގަތް ވެސް އަޅުގަނޑުމެން އެބަ ޖެހޭ ގަބޫލުކުރަން،" އޭނާ ވިދާޅުވި އެވެ.
ބަންޑާރަ ނައިބު އެ ދުވަހުގެ ކޮމިޓީގައި ކުރެއްވި ތުހުމަތުތައް ސާފުކޮށް ދެއްވުމަށް ހޯމް މިނިސްޓަރުގެ އަރިހުން އެދިވަޑައިގެންފައިވަނީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ.
މަޖިލިސް މެދުވެރިކޮށް ހޯމް މިނިސްޓަރާ ހަސަން ސުވާލުކުރައްވަނީ ބަންޑާރަ ނައިބު ތުހުމަތުކުރެއްވި ފަދަ ފުލުހުން ޕޮލިސް ސާވިސްގައި ތިބިކަން ފާހަގަކުރެވިފައިވޭތޯ ސާފުކުރުމަށެވެ.
އަދި އެފަދަ ބަޔަކު ފާހަގަކުރެވިފައިވާނަމަ އެބަޔަކާ މެދު އަޅާފައިވާ ފިޔަވަޅެއް ސާފުކޮށް ދެއްވުމަށްވެސް ހަސަން އެދިވަޑައިގެންފައި ވެއެވެ.
މީގެ އިތުރުން، ގަސްދުގައި ގޯސްހަދާ ފުލުހުން ނެތްނަމަ، އެކަން ބަންޑާރަ ނައިބާއެކު މަޝްވަރާ ކުރެއްވިތޯ، ތާރީހުތަކާ އެކު ސާފުކޮށް ދެއްވުމަށް އިއްޔެ ފޮނުވި ސުވާލުގައި ވަނީ ހިމަނައިފަ އެވެ.
