މަސްތުވާތަކެތި އެތެރެކުރި މައްސަލައެއްގައި ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގެ ތެރެއިން، ޑްރަގު ހުރި ލަގެޖާ ހަވާލުވާން އައި ސައިކަލެއްގައި އައި ދެ މީހުންގެ ތެރެއިން އެކަކު ފިލައިފި އެވެ.
އަދަދު އަށް މައުލޫމާތު ލިބިފައިވާ ގޮތުގައި މިއީ ރާއްޖެއަށް ވައިގެ މަގުން އަށް ކިލޯގެ ހަޝިޝް އޮއިލް އެތެރެކުރި މައްސަލައެއްގައި ފުލުހުން ހިންގި ކޮންޓްރޯލް ޑެލިވަރީއެކެވެ. މި މައްސަލައާ ގުޅިގެން ހައްޔަރުކޮށްފައިވާ ފަސް މީހުންގެ ތެރޭގައި ހިމެނެނީ އިންޑިއާގެ ދެ މީހަކާއި ތިން ދިވެހިންނެވެ.
މީގެ ތެރެއިން އިންޑިއާ ދެ މީހުންނަކީ ޑްރަގު ހުރި ކަަމަށް ބުނާ ދާގީނާ ހިފައިގެން އައި އަންހެނަކާއި ފިރިހެނެކެވެ. ދިވެހިންގެ ތެރެއިން އެކަކަކީ މި ދާގީނާ ބަލާ އައި ކަމަށް ބުނާ ސައިކަލު ދުއްވަން ހުރި މީހާ އެވެ. ދެން ތިބި ދެ މީހުންނަކީ ތަކެއްޗާ ހަވާލުވާން އައި ކަމަށް ބުނާ މީހުންނާ ވާހަކަ ދެއްކުމުން މިކަމުގައި ބައިވެރިވުން އޮތް ކަމަށް ތުހުމަތުކޮށް ހައްޔަރުކުރި ދެ މީހުންނެވެ.
ކަސްޓަމްސްގެ އޮފިސަރުންނަށް މި ޑްރަގުތައް ފެނުނީ، އިންޑިއާ ދެ މީހުން ގެނައި ލަގެޖު އެސްކްރޭކުރިއިރު ޝައްކުކުރެވޭ ކަންތައްތަކެއް ހުރުމުން ބަލައިފާސްކުރުމުގެ ތެރެއިންނެވެ. އެ ޑްރަގުތައް ފޮރުވާފައި ހުރީ ލަގެޖުގައި "ފޯލްސް ބޮޓަމް" އެއް ހަދައިގެންނެވެ. މިއީ ޑްރަގު އެތެރެކުރާ މީހުން އާންމުކޮށް ބޭނުންކުރާ އުކުޅެކެވެ.
މި މީހުން ބަންދުކުރަން ކޯޓުން ނެރުނު އަމަރުގައި ބަޔާންކޮށްފައިވާ ގޮތުގައި، ސީނަށް ދިޔަ ފުލުހުން ގާތު މި ދެ މީހުން ވެސް ވަނީ މިއީ "ބާއީ" ކިޔާ މީހަކު ފައިސާ ދޭނެ ކަމަށް ބުނުމުން އެތެރެކުރި ތަކެތި ކަމަށް ބުނެފަ އެވެ. އެ ލަޖެގުން ފެނުނު އަށް ޕެކެޓުގެ ބަރުދަނުގައި 8.49 ކިލޯ ހުއްޓެވެ.
މި މައްސަލައިގެ ތުހުމަތުގައި ހައްޔަރުކުރި އެންމެން ވެސް ވަނީ ކުށަށް އިންކާރުކޮށްފަ އެވެ.
މި މައްސަލައިގައި ފިލި މީހާއާ ގުޅޭ މައުލޫމާތު ހޯދަން ފުލުހުންނަށް ގުޅުމުން ހަބަރު ޝާއިއުކުރުމާ ހަމައަށް ޖަވާބެއް ނުލިބޭތީ، އޭނާ ހައްޔަރުކުރި ކަމެއް ނުވަތަ ނުކުރާ ކަމެއް އަދި ނޭނގެ އެވެ.
ކަސްޓަމްސްއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް، ވެލާނާ އިންޓަނޭޝަނަލް އެއާޕޯޓުން އެތެރެކުރަން އުޅެނިކޮށް 28 ކިލޯގެ މަސްތުވާތަކެތި ވަނީ އަތުލައިގަނެވިފަ އެވެ. އެ އިދާރާއިން ހިސާބުކުރިއިރު މި ތަކެތީގެ މަގުމަތީ އަގު
