ގާނޫނު އަސާސީއަށް ގެންނަން ޖެހޭ ބަދަލުތަކެއް އެބަހުރި ކަމަށާއި އެކަމަށް އެހެން ޕާޓީތަކުގެ ހިޔާލު ވެސް ހޯދަންޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރަކު ދެއްކެވި ވާހަކައަށް ޖަވާބު ދެއްވަމުން އެކަމިކުފާނު ވިދާޅުވީ ގާނޫނު އަސާސީއަށް ގެންނަން ޖެހޭ އިސްލާހުތަކެއް އެބަހުރި ކަމަށެވެ. އެ ބަދަލުތައް ގެނައުމުގައި ހަމަ އެކަނި މެޖޯރިޓީ ޕާޓީ އެދޭ ގޮތަށް ކަންކަން ގެންދިއުމުގެ ބަދަލުގައި އެހެން ޕާޓީތަކުގެ ހިޔާލުވެސް ހޯދަން ޖެހޭ ކަމަށެވެ. އެމަނިކުފާނު ވިދާޅުވި ގޮތުގައި ބުއްދިވެރި ގޮތަކީ ހުރިހާ ޕާޓީތައް އެެއްބަސްވާ ގޮތަކަށް އެ މަސައްކަތް ކުރިއަށް ގެންދިއުން ކަމަށެވެ.
"އިރާދަކުރެއްވިއްޔާ އެ މަސައްކަތް ކުރިއަށް ދާއިރު، އެކަން [ގާނޫނު އަސާސީއަށް އިސްލާހު ގެނައުމުގެ ކަންތައް] ހިނގައިގެން ދާނީ އެގޮތަށް،" ގާނޫނު އަސާސީއަށް ބަދަލު ގެނައުން އަވަސްކުރަން އެމަނިކުފާނު އިސްނަންގަވަން، ތުލުސްދޫ ދާއިރާގެ އަމިއްލަ މެމްބަރު އިބްރާހީމް ނަޝީމު ގޮވައިލެއްވުމުން ނަޝީދު ވިދާޅުވި އެވެ.
ނަސީމްގެ ވާހަކަ ނިންމަވައިލެއްވުމާ އެކު ނަޝީދު ވިދާޅުވީ ގާނޫނު އަސާސީއަށް ގެންނަން އެ މަނިކުފާނު އެދިވަޑައިގަންނަވާ ބަދަލުތަކެއް ވެސް އެބަހުރި ކަމަށެވެ.
"އަޅުގަނޑު ހަނދާންވާ ގޮތުގައި ދިވެހި ރައްޔިތުންގެ ޑިމޮކްރެޓިކް ޕާޓީގެ ގައުމީ މަޖިލީހުން ވަނީ ގާނޫނު އަސާސީ އިސްލާހުކުރުމާ ގުޅޭ ގޮތުން އެބޭފުޅުން މަސައްކަތް ކުރިއަށް ގެންދާނެ ގޮތުގެ ތާވަލެއް އެކުލަވާލާފަައި. އެހެންވީމާ އެ ތާވަލަށް ވެސް ބަލައި އެހެން ޕާޓީތައް އެދޭ ގޮތަކީ ކޮބައިތޯ ވެސް ބެލުން ބުއްދިވެރި،" ނަޝީދު ވިދާޅުވި އެވެ.
މަޖިލީހުގެ ތަޅުމުގައި އެމްޑީޕީގެ ބައެއް އެހެން މެމްބަރުން ވެސް މިއަދު ވިދާޅުވީ ގާނޫނު އަސާސީ އިސްލާހުކުރުމަކީ ފަހަރަކު ވަކި ކަމަކަށް ގެންނަ ބަދަލުތަކަކަށް ހެދުމަށް ވުރެ ރަނގަޅީ ހުރިހާ ބަދަލުތަކެއް އެއް ފަހަތާ ގެނައުން ކަމަށެވެ.
ގާނޫނުއަސާސީއަށް ގެންނަން ނަޝީދު ބޭނުންވާ ބަދަލުތައް
1. މިނިވަން މުއައްސަސާތަކުގެ އަދަދާ އެކުލެވިގެން ވާގޮތަށް ގެންނާން ޖެހޭ އިސްލާހުތައް ކޮންގްރެސްއިން ފާސްކުރުން. (ހާއްސަ ގޮތެއްގައި ޖުޑިޝިއަލް ސާވިސަސް ކޮމިޝަން އެކުލެވިގެންވާ ގޮތަށް ގެނަން ޖެހޭ އިސްލާހުތައް.)
2. ސުޕްރީމް ކޯޓުގެ ފަނޑިޔާރުންގެ އަދަދު ގާނޫނުއަސާސީގައި ކަނޑައެމަށް ނިންމާ ނިންމުން.
3. ވާދަކުރާ ކެންޑިޑޭޓުންގެ ތެރެއިން އެންމެ ގިނަ ވޯޓް ލިބޭ ކެންޑިޑޭޓަކީ ޖުމްލަ ވޯޓްގެ 30% އަށް ވުރެން މަދު ނޫން އަދަދަކަށް ވޯޓް ހޯދާފައިވާ ކެންޑިޑޭޓެއްނަމަ، އެ ކެންޑިޑޭޓްއަކީ މޮޅުވި ކެންޑިޑޭޓްގެ ގޮތުގައި ގާނޫނުއަސާސީގައި ކަނޑައެޅުމަށް ކޮންގްރެސްއިން ނިންމުން.
(މިފަދަ ކަނޑައެޅުމެއްގައި، އެއްވެސް ކެންޑިޑޭޓްއަކަށް 30% ގެ މިންވަރަށް ވޯޓް ނުލިބިއްޖެނަމަ އެންމެ ގިނަ ވޯޓް ހޯދާ ދެ ކެންޑިޑޭޓުންގެ މެދުގައި ދެވަނަ ބުރަކަށް ވޯޓް ނަގާ އެންމެ ގިނަ ވޯޓް ހޯދި ކެންޑިޑޭޓް އެއީ މޮޅުވި ކެންޑިޑޭޓްގެ ގޮތުގައިވެސް ގާނޫނުއަސާސީގައި ކަންޑައެޅުން.)
4. ގާނޫންއަސާސީގައި ކަނޑައަޅާނެ ލާކާމަރުކަޒީ އިތުރު އުސޫލްތައް ކަނޑައެޅުން.
5. ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށާއި އަދި އެފެންނަ ނުފެންނަ ވޯޓް ނަގާނެ ތާރީހެއް، އަދި ނެގޭ ފެންނަ ނުފެންނަ ވޯޓުގެ ނަތީޖާ އާއި އެއްގޮތައް ގާނޫނުއަސާސީގެ ވެރިކަމުގެ ނިޒާމް ކަނޑައެޅުމަށް ކޮންގްރެސްއިން އެއްބަސްވުން.
