ހައިކޯޓުގެ އަމުރެއް ސަސްޕެންޑް ކުރުމަށްފަހު، ރާއްޖެއަށް ޑްރަގް އެތެރެކުރުމުގައި ބައިވެރިވި ކަމަށް ތުހުމަތު ކުރެވޭ މީހަކު އައްޑޫ ސިޓީ ހިތަދޫ މެޖިސްޓްރޭޓް ކޯޓުން ދޫކޮށްލައިފި އެވެ.
ބަންދުގައި ހުރި އެރަށު މަންދޫބުގެ، ރުޝާން އަހްމަދު ދީދީގެ ބަލި ހާލަތަށް ރިޔާއަތްކޮށް، އެ ކޯޓުގެ މެޖިސްޓްރޭޓް ރަފީއުދީން އަހްމަދު ނެރުނު ހުކުމުގައި ވަނީ ހައިކޯޓުން ނެރިފައިވާ އަމުރެއް 90 ދުވަހަށް ސަސްޕެންޑްކުރުމަށްފަހު، ޝަރުތުތަކަކާ އެކު އޭނާ ދޫކޮށްލާފަ އެވެ.
ނަމަވެސް ހައިކޯޓުގެ އަމުރެއް ބަދަލުކުރުމުގެ ބާރަކީ, ގާނޫނުތަކުން ދަށު ކޯޓުތަކަށް ދީފައި އޮތް ބާރެއް ނޫނެވެ. ހައިކޯޓުގެ އަމުރެއް ސަސްޕެންޑް ކުރުން، ނުވަތަ ބާތިލް ކުރުމުގެ ބާރު ލިބިގެން ވަނީ ހަމައެކަނި ސުޕްރީމް ކޯޓަށެވެ.
"...ރުޝާން އަހްމަދު ދީދީ ޝަރީއަތް ނިމެންދެން ބަންދުކުރުމަށް ދިވެހިރާއްޖޭގެ ހައިކޯޓުގެ ނަމްބަރު 2020/HC-A/216 ގަޒިއްޔާއިން ނިންމާފައިވާ ނިންމުން، މިއަދުން ފެށިގެން 90 (ނުވަދިހަ) ދުވަހަށް ސަސްޕެންޑްކޮށް، މި މުއްދަތަށް ބޭއްފަރުވާގެ ބޭނުމަށް އޭނާ ދޫކޯށްފައި ބެހެއްޓުމަށް އަންގާ އަމުރުކޮށްފީމެވެ." މެޖިސްޓްރޭޓް ރަފީއުއްދީން އަހުމަދު ނެރުއްވި އަމުރުގައިވެ އެވެ.
ގާނޫނާއި ހިލާފަށް ނެރުނު މި އަމުރާ ގުޅިގެން ޕްރޮސެކިއުޓާ ޖެނެރަލް ހުސައިން ޝަމީމް ވެސް ކަންބޮޑުވުން ފާޅުކުރެއްވި އެވެ. އޭނާ ވާނީ އެ މެޖިސްޓްރޭޓްގެ ޝަކުވާ ޖުޑީޝިއަލް ސާވިސް ކޮމިޝަން (ޖޭއެސްސީ) އަށް ހުށަހަޅުއްވާނެ ކަމަށް ވިދާޅުވެފަ އެވެ.
މެޖިސްޓްރޭޓް ރަފީއުއްދީން, ތުހުމަތުވާ މީހާ ބަންދުން ދޫކޮށްފައިވަނީ ތިން މަސް ދުވަަހުގައި ހެކިވެރިންނާ އެއްވެސް މުއާމަލާތެއް ނުކުރުމަށާއި، ރޭގަނޑު 12 އިން ފެށިގެން ހެނދުނު ހަޔަކަށް ގެއިން ނުނިކުތުމަށް ޝަރުތުކޮށެވެ.
