މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނޭ "1 ލައްކަ ގަސް" ޕްރޮގްރާމްގެ ދަށުން 500 ގަސް ސަލްޕައިކޮށްދޭނެ ފަރާތެއް ހޯދަން ހުޅުވާލައިފި އެވެ.
ސިޓީ ކައުންސިލުން ކުރި އިއުލާނެއްގައި ބުނީ އެ ޕްލޭންގައި ހިމެނޭ ޕްރޮގްރާމްގެ ދަށުން 180 ކަދުރު ރުއް އަދި 320 އެހެނިހެން މޭވާ އަޅާ ގަސް ހޯދަން ބީލަމަށް ހުޅުވާލެވިފައިވާ ކަމަށެވެ.
އެކަމަށް ޝައުގުވެރިވާ ފަރާތްތަކުން އަންނަ ބުދަ ދުވަހު މައުލޫމާތު ސާފުކޮށް، އަންނަ ހޯމަ ދުވަހުގެ ހެނދުނު 11:00ގެ ކުރިން ބީލަން ހުށަހެޅުމަށް ސިޓީ ކައުންސިލުން ވަނީ ހަމަޖައްސައިފަ އެވެ.
އަގު ހުށަހެޅުމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމަންޓް، އަދި ވިޔަފާރި ކުރުމުގެ ހުއްދަ ލިބިފައިވާ ފަރާތްތަކަށް ކަމަށް ވެސް ކައުންސިލުން ބުންޏެވެ.
މާލެ ފެހިކުރުމުގެ ނިންމުން ސިޓީ ކައުންސިލުން ނިންމާފައިވަނީ މިދިޔަ އަހަރުގެ ފަހުކޮޅެވެ.
އެ ޕްރޮގްރާމްގެ ދަށުން އެންމެ ފުރަތަމަ އިންދާ 150 ގަސް އިންދުމުގެ މަސައްކަތް މިދިޔަ ޑިސެމްބަރު މަހު ވަނީ މަޖީދީމަގު ހިމެނޭހެން މާލޭގެ ބައެއް ބޮޑެތި މަގުތަކުގައި ކުރިއަށް ގެންގޮސްފަ އެވެ.
އޭރު އިންދި އެ ގަސްތަކުގެ ތެރެއިން 65 ޕަސެންޓް ގަހަކީ އަނބުގަހެވެ. އަދި ބާކީ 33 ޕަސެންޓްގެ ތެރޭގައި ހިމެނެނީ ސައްކެޔޮގަހާއި ހިތިގަހާއި ދަނބުގަސް ފަދަ ގަސްތަކެވެ.
އެ ޕްރޮގްރާމުގެ ދަށުން މަގުތަކާއި ޕާކުތަކުގައި މުޅި އަހަރަށް ބަލާއިގެން އެކި ދުވަސްތަކުގެ މަތިން ގަސްތައް އިންދާނެ އެވެ. އަދި މިހާރު މާލޭގައި އިންދާފައި ހުރި ގަސްތަކުގެ ތެރެއިން ނުހެދި ނުވަތަ މަރުވެފައި ހުރި ގަސްތައް ނެގުމަށް ފަހު އެ ތަންތަނުގައި ވެސް އާ ގަސްތައް އިންދާނެ އެވެ.
މި ގަސްތައް ބެހެއްޓުމަށްޓަކައި ކާނިވާ ސަރަހައްދުގައި ހާއްސަ ނާސަރީއެއް ހެދުމުގެ މަސައްކަތް ވެސް ސިޓީ ކައުންސިލުން ދަނީ ކުރަމުންނެެވެ.
