ޖަލު އޮފިސަރުންގެ ތެރެއިން ފްރޮންޓްލައިންގައި ހަރަކާތްތެރިވާ އޮފިސަރުންނަށް ބޮޑީ ވޯން ކެމެރާ ޓްރަޔަލްއެއްގެ ގޮތުގައި ބޭނުންކުރުމުގެ އެއްބަސްވުމުގައި މިއަދު ސޮއިކޮށްފި އެވެ.
ކަރެކްޝަންގެ ފަރާތުން އެ އެއްބަސްވުމުގައި ސޮއިކުރެއްވީ ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅެވެ. އަދި ޒެޓާ ޓެކްނޮލޮޖީސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު މުހައްމަދު އައިމަން އާދަމެވެ.
ކަރެކްޝަނުން ގެންނަ ކެމެރާތަކަކީ އެމެރިކާގެ އެކްސޮން ކުންފުނީގެ އުފެއްދުމެކެވެ. އެ އެއްބަސްވުމުގައި ސޮއި ކުރީ ތިން މަސް ދުވަސްތެރޭގައި ކެމެރާތައް ގެންނަންޖެހޭ ގޮތަށް ޝަރުތުކޮށްފަ އެވެ.
ކަރެކްޝަނުން ބުނީ އެ މުއްދަތުގައި 15 ބޮޑީ ވޯން ކެމެރާ އާއި ތިން ޓޭޒާ ފޯރުކޮށްދޭނެ ކަމަށެވެ. ރަނގަޅަށް ޓޭޒާ ބޭނުންކުރުމާއި އެ ބޭނުންކުރާނެ ހާލަތްތަކާ ބެހޭގޮތުން ތަމްރީނު ފެށުމުގެ އިންތިޒާމް ހަމަޖެހިފައިވާ ކަމަށް ކަރެެކްޝަނަލް އިން ބުންޏެވެ.
ޖަލު އޮފިސަރުންނަށް ބޮޑީ ވޯން ކެމެރާ ފޯރުކޮށްދިނުމަށް ޒެޓާ ޓެކްނޮލޮޖީސްއާއެކު އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން-- ފޮޓޯ: ކަރެކްޝަން
ކެމެރާ އަދި ޓޭޒާ ބޭނުން ކުރާނީ ޖަލުތަކުގެ ފްރަންޓްލައިންގައި މަސައްކަތްކުރާ ޕްރިޒަން އޮފިސަރުންނެވެ.
ކަރެކްޝަނުން ބޮޑީވޮން ކެމެރާ ބޭނުން ކުރަން ފަށަން ނިންމީ ޒަމާނީ ޓެކްނޮލޮޖީގެ ވަސީލަތްތައް ބޭނުންކުރުމުގެ ސަބަބުން ޕްރިޒަން އޮފިސަރުން މިހާރަށްވުރެ ޒިންމާދާރުވެ، ޖަވާބުދާރީވުން އިތުރު ވެގެންދާނެތީ ކަމަށް އެ އިދާރާއިން ބުންޏެ އެވެ.
އޭގެ އިތުރުން، ޖަލުގައި ބަންދުކޮށްފައި ތިބޭ ފަރާތްތަކާއި ޕްރިޒަން އޮފިސަރުންގެ ރައްކާތެރިކަން ކަށަވަރުކޮށްދިނުމަށް ކެމެރާތައް މުހިއްމު ދައުރެއް އަދާކުރާނެ ކަމަށް ވެސް ކަރެކްޝަނުން ބުނެ އެވެ.
ކަރެކްޝަނުން ކެމެރާ ބޭނުން ކުރަން ފަށަން ނިންމާފައިވާއިރު، މިދިޔަ އާދިއްތަ ދުވަހު ފުލުހުން ވަނީ ބޮޑީ ކެމެރާ ބޭނުން ކުރަން ފަށާފަ އެވެ. 200 ކެމެރާއާ އެކު ފެށި ނަމަވެސް އިތުރުން ވެސް 1200 ކެމެރާ ހޯދުމަށް މަސައްކަތް ފުލުހުން ދަނީ ކުރަމުންނެވެ.
