ބުދަ ދުވަހު އޮސްޓްރޭލިއާގެ ސިޑްނީގައި މީހަކަށް ނުރައްކާތެރި ހަމަލާއެއް ދިން ބޮޑު ހުދު މިޔަރެއް ހިފުމުގެ މަސައްކަތް ކަމާ ބެހޭ އިދާރާތަކުން ފަށައިފި އެވެ.
ނަވާރަ ސަތޭކަ ފަސްދޮޅަސް ތިން ވަނަ އަހަރަށް ފަހު އޮސްޓްރޭލިއާގެ ސިޑްނީގައި މިޔަރުގެ ހަމަލާއެއްގެ ސަބަބުން އިންސާނަކު މަރުވީ ބުދަ ދުވަހު އެވެ.
ފުލުހުން ބުނީ ލިޓްލް ބޭ ބީޗު ސަރަހައްދަށް އެމެޖެންސީ ހިދުމަތުން ގޮސް ބެލިއިރު، މޫދުން އިންސާނެއްގެ ހަށިގަނޑުގެ ބައިތައް ފެނުނު ކަމަށެވެ.
ސިޑްނީގެ ގިނަ ގޮނޑުދޮށްތައް ބުރާސްފަތި ދުވަހު ވެސް ހުރީ ބަންދުކޮށްފަ އެވެ. އަދި އާއްމުން ފެތުމަށް މޫދަށް އެރުން ވަނީ ވަގުތީ ގޮތުން މަނާކޮށްފަ އެވެ.
މަރުވި ފިރިހެން މީހާއަށް ހަމަލާ ދިނީ މިޔަރުގެ ބާވަތްތަކުގެ ތެރެއިން ގްރޭޓް ވައިޓް ޝާކެކެވެ. މަރުވި މީހާއަކީ ކާކު ކަމެއް މިހާތަނަށް ހޯދިފައެއް ނުވެ އެވެ.
އޭނާއަށް މިޔަރު ހަމަލާ ދިނީ ގޮނޑުދޮށާ ކައިރި، މާ ފުން ނޫން ހިސާބެއްގައި ފަތަނިކޮށެވެ. މިޔަރު ހަމަލާ ސިޑްނީގައި ދިމާވަނީ ވަރަށް މަދުންނެވެ. އެއީ މޫދުގައި ނެޓު ފަދަ ތަކެތި އަޅާފައި ހުންނާތީ އެވެ.
ބުދަ ދުވަހުގެ ހަމަލާ ދިން މިޔަރު ހިފަން ކަމާ ބެހޭ އިދާރާތަކުން ވަނީ ޖެޓް ސްކީގައި ކަނޑުގެ 25 ކިލޯމީޓަރުގެ ސަރަހައްދެއް ބަލާފަ އެވެ. އޭގެ އިތުރުން ހެލިކޮޕްޓަރާއި ޑްރޯން ވެސް ދަނީ ބޭނުން ކުރަމުންނެވެ.
މިޔަރު އިންސާނުންނަށް ހަމަލާ ދިނުމަކީ ވަރަށް މަދުން ނޫނީ ދިމާނުވާ ކަމެކެވެ. އެފަދަ ހަމަލާތައް އާއްމުކޮށް ރިޕޯޓުކުރަނީ އޮސްޓްރޭލިއާގެ ހޫނު މޫސުން ކަމުގައިވާ ޑިސެމްބަރުން ފެބްރުއަރީ މަހަށެވެ. އެއީ އެ ދުވަސްވަރު ގިނަ މީހުން މޫދުގައި އުޅޭތީ އެވެ.
އޮސްޓްރޭލިއާގައި ކޮންމެ އަހަރަކު ވެސް 20 މިޔަރު ހަމަލާ ރިޕޯޓުކުރެ އެވެ. އެންމެ ގިނައިން ރިޕޯޓުކުރަނީ ނިއު ސައުތު ވޭލްސް އަދި ހުޅަނގު އޮސްޓްރޭލިއާއިންނެވެ. މި އަހަރުގެ މިހާތަނަށް ހަތަރު ހަމަލާ ރިޕޯޓުކޮށްފައިވެ އެވެ.
ވިހި އެކާވީސް ވަނަ އަހަރު މިޔަރުގެ ހަމަލާގައި ދެ މީހުން މަރުވި އިރު، 2020 ވަނަ އަހަރު ހަތް މީހުން މަރުވި އެވެ.
