ނަވާރަ ސަތޭކަ ފަސްދޮޅަސް ތިން ވަނަ އަހަރަށް ފަހު އޮސްޓްރޭލިއާގެ ސިޑްނީގައި މިޔަރުގެ ހަމަލާއެއްގެ ސަބަބުން އިންސާނަކު މަރުވެއްޖެ އެވެ.
ފުލުހުން ބުނީ ލިޓްލް ބޭ ބީޗު ސަރަހައްދަށް އެމެޖެންސީ ހިދުމަތުން ގޮސް ބެލިއިރު، މޫދުން އިންސާނެއްގެ ހަށިގަނޑުގެ ބައިތައް ފެނުނު ކަމަށެވެ.
މަރުވި މީހާގެ ވަނަވަރު ހާމަކޮށްފައެއް ނުވެ އެވެ. އަދި އެކަމާ ގުޅޭ ތަހުގީގެއް ވަނީ ފަށާފަ އެވެ. ލިޓްލް ބޭ އާ ކައިރީގައިވާ އެހެން ގޮނޑުދޮށްތައް ވެސް ވެސް މިހާރު ވަނީ ބަންދުކޮށްފަ އެވެ.
މިޔަރުގެ ހަމަލާ އަމާޒުވި ވަގުތު ގިނަ ބަޔަކު މޫދުގައި އުޅުނެވެ. ސްކައި ނިއުސް އޮސްޓްރޭލިއާއިން ބުނީ ހަމަލާ ދިނީ ބުދަ ދުވަހުގެ ހަވީރު 04:30 ހާއިރު ކަމަށެވެ.
ސިޑްނީގެ ބީޗެއްގައި މިޔަރުގެ ހަމަލާއެއްގެ ސަބަބުން އެންމެ ފަހުން މީހަކު މަރުވީ 1963 ވަނަ އަހަރު އެވެ. އެ ހާދިސާ ހިނގީ ޝުގާލޯފް ބޭގަ އެވެ.
މިދިޔަ އަހަރު އޮސްޓްރޭލިއާގައި މިޔަރު ހަމަލާދީގެން ތިން މީހުން މަރުވި އެވެ. އޭގެ ތެރެއިން ދެ ހާދިސާ ހިނގީ ސިޑްނީ ހިމެނޭ ނިއު ސައުތު ވޭލްސް ހިސާބުގަ އެވެ.
