އަބޫ ދާބީ، ޔޫއޭއީ (ފެބްރުއަރީ 14) - ސަރަހައްދީ ދެބަސްވުންތަކާ ހެދި އަސަރުކޮށްފައިވާ ތުރުކީ އާއި ޔޫއޭއީގެ ގުޅުން ރަނގަޅު ކުރަން ތުރުކީގެ ރައީސް ތައްޔިބް އުރުދުގާން ހޯމަ ދުވަހު ޔޫއޭއީއަށް ވަޑައިގެންފި އެވެ.
ޔޫއޭއީގެ ވެރިރަށް އަބޫ ދާބީއަށް ވަޑައިގެންނެވުމާ އެކު އުރުދުގާން އަށް މަރުހަބާ ވިދާޅުވީ ވަލީ އަހުދު އަމީރް ޝެއިހް މުހައްމަދު ބިން ޒައިދު އަލް ނަހްޔާން އެވެ.
ލީބިޔާގެ ދާހިލީ ހަނގުރާމަ އާއި ގަލްފުގެ ޑިޕްލޮމެޓިކް މައްސަލައެއްގައި ތުރުކީ އާއި ޔޫއޭއީން ތާއީދު ކުރީ ދެ ފަޅިއަކަށެވެ. އޭގެ އިތުރުން އިރުމަތީ މެޑިޓެރޭނިއަންގައި ގޭސް ހޯދުމުގެ މަސައްކަތާ ގުޅޭ ގޮތުން ވެސް ދެ ގައުމުގެ ވިސްނުން ދެ ގޮތެވެ.
ނަމަވެސް މިދިޔަ ނޮވެމްބަރު މަހު ޝެއިހް މުހައްމަދު ތުރުކީގެ އަންކާރާއަށް ކުރެއްވި ދަތުރަކަށް ފަހު ގުޅުން ވަނީ ރަނގަޅުވާން ފަށާފަ އެވެ. އެއީ 2012 ވަނަ އަހަރަށް ފަހު ޔޫއޭއީގެ އިސްވެރިޔަކު ތުރުކީއަށް ކުރެއްވި ފުރަތަމަ ދަތުރެވެ.
"އެ ދަތުރަކީ ދެ ގައުމުގެ ގުޅުމަށް އާ ޒަމާނެއް އައުމުގެ ފެށުން،" ޔޫއޭއީއަށް ފުރާވަޑައިގެންނެވުމުގެ ކުރިން އިސްތަންބޫލް އެއާޕޯޓުގައި ހުންނަވައި، ނޫސްވެރިންނަށް އުރުދުގާން ވިދާޅުވި އެވެ.
ތުރުކީގެ ރައީސްގެ މި ދަތުރަކީ ވެސް 2013 ވަނަ އަހަރަށް ފަހު އެ ގައުމަށް ކުރައްވާ ފުރަތަމަ ދަތުރެވެ. އުރުދުގާން ވިދާޅުވީ ދެ ގައުމުގެ ގުޅުން އަސްލު އޮންނަން ޖެހޭ ހަރުފަތަށް ގެންދިޔުމުގެ ކަންކަން ރާވާފައިވާ ކަމަށެވެ.
ޔޫއޭއީއަށް ކުރައްވާ ދަތުރުގައި އުރުދުގާން އަންގާރަ ދުވަހު ވަޑައިގަންނަވާނީ އެކްސްޕޯ 2020 ޑުބާއީ މައުރަޒަށެވެ. ދުނިޔޭގެ އެންމެ އުސް އިމާރާތް ބުރުޖް ހަލީފާ، ޔޫއޭއީ އާއި ތުރުކީގެ ދިދައިގެ ކުލަތަކުން މިހާރު ދިއްލާފައި ވަނީ އުރުދުގާންގެ ދަތުރާ ގުޅިގެންނެވެ.
