ކާބުލް، އަފްގާނިސްތާން (ފެބްރުއަރީ 13) - މީގެ ހަފްތާތަކެއް ކުރިން ވީނުވީއެއް ނޭނގި ގެއްލުނު އަފްގާނިސްތާނުގެ ހަތަރު އަންހެން އެކްޓިވިސްޓުން ތާލިބާނުން މިނިވަންކޮށްފި އެވެ.
މިދިޔަ އޯގަސްޓު މަހު ވެރިކަމަށް އައި ތާލިބާނުން ދަނީ އިދިކޮޅު އަޑު ކަނޑުވާލަން ބާރު ބޭނުން ކުރަމުންނެވެ. އެގޮތުން އެންމެ ބޮޑަށް އަމާޒު ކުރަނީ އަންހެނުންގެ އެއްވުންތަކަށެވެ.
ތަމާނާ ޒައިނަބް ޕަރްޔާނީ، ޕަރްވާނާ އިބްރާހިމްހޭލް، ޒަހްރާ މުހައްމަދީ އަދި މުރްސަލް އަޔަރް ގެއްލުނީ ތާލިބާނާ ދެކޮޅު އެއްވުމެއްގައި ބައިވެރިވި ފަހުންނެވެ.
ނަމަވެސް ތާލިބާން ސަރުކާރުން ތަކުރާރުކޮށް ބުނަމުން ދިޔައީ އެ މީހުން ހައްޔަރު ނުކުރާ ކަމަށެވެ. އެކަމަކު އަފްގާނިސްތާނަށް ހާއްސަ އދ. ގެ މިޝަން އިން ބުނީ ހަތަރު އެކްޓިވިސްޓުންނާއި އެ މީހުންނާ އެކު "ގެއްލުނު" އާއިލާގެ މެމްބަރުން ވެސް ތާލިބާން ސަރުކާރުން މިނިވަންކޮށްފައިވާ ކަމަށެވެ.
ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު މީގެ ކުރިން އޭއެފްޕީއަށް ބުނީ ފިތުނަ އުފައްދައި، ގާނޫނާ ހިލާފަށް އުޅޭ މީހުން ހައްޔަރު ކުރުމުގެ ހައްގު ކަމާ ބެހޭ ފަރާތްތަކަށް އޮންނާނެ ކަމަށެވެ. ތާލިބާނުން ވެރިކަމަށް އައުމަށް ފަހު ވަނީ ހުއްދަ ނުހޯދައި މުޒާހަރާ ކުރުން މަނާކޮށްފަ އެވެ.
މި މަހުގެ ކުރީކޮޅު ތާލިބާނުން ވަނީ އދ. ގެ ރެފިއުޖީ އޭޖެންސީއާ އެކު އަފްގާނިސްތާނުގައި މަސައްކަތް ކުރާ ދެ ނޫސްވެރިން ވެސް ހައްޔަރު ކުރުމަށް ފަހު މިނިވަންކޮށްފަ އެވެ.
ބީބީސީގެ ކުރީގެ ނޫސްވެރިޔާ އެންޑްރޫ ނޯތު އާއި އެހެން ގައުމެއްގެ ނޫސްވެރިޔަކު ވެސް "ވީނުވީއެއް ނޭނގި ގެއްލުމުން" އެކަމުގައި ތާލިބާނުންގެ އަތެއް ނުވާނެ ކަމަށް ބުންޏެވެ.
ނަމަވެސް ރެފިއުޖީ އެޖެންސީން ބުނީ މިދިޔަ ހުކުރު ދުވަހު އެ މީހުން ވެސް މިނިވަންކޮށްފައިވާ ކަމަށެވެ. ތާލިބާނުން ފަހުން ބުނީ ދެ ނޫސްވެރިން ހައްޔަރު ކުރީ ސައްހަ އައިޑީކާޑާއި ލިޔުންތައް ނެތުމުން ކަމަށެވެ.
