އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގެ ތަށި ހޯދުމަކީ މި ފަހަރުގެ މުބާރާތަށް ތައްޔާރުވިއިރު ވެސް ކްލަބް އީގަލްސްގެ ފޯކަސް ކަމަށާއި އެ ޓީމު އޮތީ ފައިނަލަށް ފުރިހަމައަށް ތައްޔާރުވެފައި ކަަމަށް ކޯޗު އަހުމަދު ނިމާދު (ނިމާ) ބުނެފި އެވެ.
ޔޫތު ޗެމްޕިއަންޝިޕްގެ އެންމެ ކާމިޔާބު ޓީމު ކަމަށްވާ އީގަލްސް އިން ވަނީ މިހާތަނަށް ޔޫތު ޗެމްޕިއަންޝިޕްގެ ނުވަ މުބާރާތް ކުޅުނުއިރު، ހަތް މުބާރާތުގެ ފައިނަލުގައި ކުޅެފަ އެވެ. ހަތަރު ފަހަރު ތަށި އުފުލާލި އީގަލްސް އިން މުޅިން ވެސް ކާމިޔާބުކުރީ 21 އަހަރުން ދަށަށް މުބާރާތް ބޭއްވިއިރު އެވެ. ޔޫތު މުބާރާތް 19 އަހަރުން ދަށަށް ބޭއްވި ހަމައެކަނި ފަހަރު 2018 ވަނަ އަހަރު އީގަލްސް ވަނީ ކްލަބް ގްރީން ސްޓްރީޓްސް އަތުން ފައިނަލުގައި ބަލިވެފަ އެވެ. އެހެންވެ، މި ފަހަރުގެ ފައިނަލުން މިއަދު އީގަލްސް އަށް މޮޅުވެ، މި އުމުރުފުރާގެ ތަށްޓެއް އުފުލާލުމަކީ ބޮޑު އަމާޒެކެވެ.
ޔޫތު ޗެމްޕިއަންޝިޕްގެ މި ފަހަރުގެ މުބާރާތުގެ ފައިނަލުން އީގަލްސް ޖާގަ ހޯދީ ސެމީގައި ޓީސީ ސްޕޯޓްސް ކުލަބު 1-0 އިން ބަލިކޮށްގެންނެވެ. ސަސް ފައިނަލުން ޖާގަ ހޯދީ ސެމީ ފައިނަލްގައި ޕެނަލްޓީ ޖަހައިގެން 3-2 އިން ޔުނައިޓެޑް ވިކްޓްރީ (ޔޫވީ) ބަލިކޮށްގެންނެވެ. އީގަލްސް އާއި ސަސް ވަނީ މުބާރާތުގެ ގްރޫޕް ސްޓޭޖުގައި ކުޅެފަ އެވެ. އެ މެޗުން ސަސް އަތުން 1-0 އިން އީގަލްސް މޮޅުވީ އެވެ.
ފައިނަލް މެޗަށް ޓީމުގެ ތައްޔާރީތަކާ ގުޅޭގޮތުން ނިމާ ބުނީ މުބާރާތަށް އީގަލްސް ތައްޔާރުވީ ތަށި ހޯދަން ކަމަށާއި އެކަން ހާސިލްކުރަން ކުރިއަށް އޮތް ފައިނަލުން މޮޅުވާން ބޭނުންވާ ކަމަށެވެ.
އެއްވެސް މެޗަކުން ބަލިނުވެ، ކޮޅަށް ގޯލެއް ވެސް ނުވަދެ، ފުރިހަމަ ރެކޯޑަކާ އެކު ފައިނަލަށް އާދެވުމަކީ ޓީމަށް ލިބުނު ބޮޑު ކޮންފިޑެންސެއް ކަމަށް ނިމާ ގަބޫލުކުރެ އެވެ. މިއަދުގެ މެޗުގައި ރަނގަޅު ނަތީޖާއެއް ނެރެ ތަށި ކާމިޔާބުކުރަން ޓީމް އޮތީ ފުރިހަމަ އަށް ތައްޔާރުވެފައި ކަމަށް ނިމާ ވަނީ ބުނެފަ އެވެ.
"އީގަލްސް އިން މުބާރާތަށް ތައްޔާރުވީ ވެސް ސީދާ ހަމަ ތައްޓަށް އަމާޒުކޮށްގެން. އެގޮތަށް ހުރިހާ ވިސްނުމެއް ހުރީވެސް. ކޮންމެ މެޗަކަށް ނިކުންނައިރު ވެސް އިތުބާރު އޮވޭ. ފައިނަލަށް ތައްޔާރުވެފައި ޓީމު އޮތީ،" ނިމާ ބުންޏެވެ.
އީގަލްސްގެ ކޯޗު ނިމާވަނީ ޔޫތު ޓީމުގެ ސްކޮޑުގައި ހިމެނޭ 30 ކުޅުންތެރިންގެ ތެރެއިން 27 ކުޅުންތެރިއަކަށް މިހާތަނަށް އެ ޓީމު މި މުބާރާތުގައި ކުޅުނު ފަސް މެޗުގައި ފުރުސަތު ދީފަ އެވެ. ފައިނަލަށް ނުކުންނައިރު، ޓީމުގެ ހާލަތާއި ގުޅޭގޮތުން ނިމާ ބުނީ ކޮވިޑް-19ގެ ހާލަތާއި އަނިޔާގެ އެކި މައްސަލަތަކު ކަންކަން ކުރިމަތިވެ، އެ ފަދަ ގޮންޖެހުންތަކުގެ ތެރެއިން ވެސް ޓީމުގެ ގިނަ ކުޅުންތެރިންތަކަކަށް ފުރުސަތު ދެވުމަކީ ލިބޭ ބޮޑު ހިތްހަމަޖެހުމެއް ކަމަށެވެ. އަދި އެންމެ ބޮޑު އުފަަަލަކީ ލިބޭ ފުރުސަތުގައި ތަފާތު ދައްކަން ކޮންމެ ކުޅުންތެރިއަކު ވެސް ކުރާ މަސައްކަތް ކަމަށް ނިމާ ބުނެފައިވެ އެވެ.
"ކޮންމެ ކުޅުންތެރިއަކުވެސް ވަރަށް މޮޅަށް ކުޅޭ. އެއީ ބޮޑު ހިތްހަމަޖެހުމެއް. ކުޅުންތެރިއަކަށް އަނިޔާވިޔަސް ދެން އަރާ ކުޅުންތެރިއަކު އެތަން ފޫބައްދާ،" ނިމާ ބުންޏެވެ.
ޔޫތު މުބާރާތުގެ ތެރެއިން ކުޅުންތެރިން ޑިވެލޮޕްކޮށްގެން އީގަލްސް އިން އަންނަނީ ސީނިއާ ޓީމަށް ވެސް ގިނަ ކުޅުންތެރިންތަކެއް ނަގަމުންނެވެ. އަބަދުވެސް ޔޫތު މުބާރާތަށް ހާއްސަ އަހައްމިއްޔަތުކަމެއް ދޭ ކްލަބެއްގެ ގޮތުގައި އޮތް އީގަލްސް އިން މި ފަހަރުގެ ޔޫތު މުބާރާތަށް ޓީމެއް އެކުލަވާލަން ވެސް ވަނީ ދުރާލާ ޓްރަޔަލްތަކެއް ބާއްވައިގެން ރަނގަޅު ކުޅުންތެރިންތަކެއް ހޯދައިފަ އެވެ.
ސަސް އާއި އީގަލްސް ކުޅޭ ޔޫތު ޗެމްޕިއަންޝިޕް ފައިނަލް މެޗު ފަށާނީ މިއަދު ހަވީރު ހަތަރެއް ޖަހާއިރު އެވެ.
