ތާލިބާނުން ވެރިކަމަށް އައުމުން އެމެރިކާއިން ހިފެހެއްޓި އަފްގާނިސްތާނުގެ ހަތް ބިލިއަން ޑޮލަރު ބޭނުންކޮށްގެން ސެޕްޓެމްބަރު 11 ހަމަލާގައި މަރުވި މީހުންގެ އާއިލާތަކަށް ފައިސާގެ ބަދަލު ދޭން އެމެރިކާ ސަރުކާރުން ވިސްނަން ފަށައިފި އެވެ.
މިދިޔަ އޯގަސްޓް މަހު އެމެރިކާއިން ހިފެހެއްޓި ފައިސާއިން ތާލިބާނަށް ސީދާ ފައިދާއެއް ނުވާނެ ގޮތަކަށް ބޭނުން ކުރަން އެމެރިކާއަށް ދަނީ ޕްރެޝަރު ބޮޑުވަމުންނެވެ.
އެމެރިކާ ސަރުކާރުން އެ ފައިސާ ހޭދަކުރަން ވިސްނާ ގޮތް ހާމަކުރުމާ އެކު ތާލިބާން ތަރުޖަމާނަކު ބުނީ އެއީ "ވައްކަން" ކަމަށާއި އަދި އެއީ "ދިރިއުޅުމުގައި ރީތި ސިފައެއް ނެތް ކަމުގެ ހެއްކެއް" ކަމަށެވެ.
އެމެރިކާއިން ހިފެހެއްޓި ހަތް ބިލިއަން ޑޮލަރުގެ އިތުރުން ޔޫރަޕުން ހިފަހައްޓާފައިވާ ދެ ބިލިއަން ޑޮލަރަކީ ފާއިތުވި 20 އަހަރު ބައިނަލްއަގްވާމީ އެހީގެ ގޮތުގައި އެކި ގައުމުތަކާއި ޖަމިއްޔާތަކުން އަފްގާނިސްތާނަށް ދީފައިވާ ފައިސާ އެވެ.
އެމެރިކާ ސަރުކާރުގެ އޮފިޝަލަކު ހުކުރު ދުވަހު ބުނީ އެ ފައިސާއިން 3.5 ބިލިއަން ޑޮލަރުގެ ޓްރަސްޓް ފަންޑެއް ގާއިމްކޮށް، ތާލިބާނަށް އެހީ ނުވެ، އަފްގާން ރައްޔިތުންނަށް ދިމާވެފައިވާ އިންސާނީ ކާރިސާއިން އެހީވެވޭނެ ގޮތް ބަލާނެ ކަމަށެވެ.
ބާކީ ފައިސާ ހަރަދު ކުރަން ވިސްނަނީ ސެޕްޓެމްބަރު 11، 2001 ވަނަ އަހަރު އަލް ގައިދާއިން އެމެރިކާގައި ދިން ހަމަލާތަކުގައި މަރުވި މީހުންގެ އާއިލާތަކަށް ފައިސާގެ ބަދަލުގެ ގޮތުގައި ކަމަށް އޭނާ ބުންޏެވެ. ނަމަވެސް ވަކި ގޮތެއް އަދި ނުނިންމަ އެވެ.
އެ ހަމަލާގައި މަރުވި މީހުން ނިސްބަތްވާ 150 އާއިލާއަކުން ވަނީ 2010 ވަނަ އަހަރު ތާލިބާނާއި އަލް ގައިދާއާ ދެކޮޅަށް ދައުވާ އުފުލާފަ އެވެ. އެ ހަމަލާ ދިނީ އަލް ގައިދާއިން ކަމަށްވާ އިރު، އަލް ގައިދާއަށް ހިމާޔަތް ދިނީ ތާލިބާނުން ކަމަށް އެމެރިކާއިން ބުނެ އެވެ.
