މިވަގުތު އިތުރު މަގާމަކަށް ޝައުގުވެރިކަން ނެތް ކަމަށް ވިދާޅުވެ, ވެރިކަން ކުރާ އެމްޑީޕީގެ ޗެއާޕާސަންގެ މަގާމަށް ކުރިމަތިނުލައްވާނެކަން ފޮރިން މިނިސްޓަރު އަބްދުالله ޝާހިދު ހާމަކުރައްވައިފި އެވެ.
ޝާހިދު މިހެން ވިދާޅުވީ, އެމްޑީޕީގެ ޗެއާޕާސަންގެ މަގާމަށް އޭނާ ކުރިމަތިލައްވަން ނިންމެވި ކަމުގެ އަޑުތައް ފެތުރިފައިވަނިކޮށެވެ. އަދި އެގޮތަށް ޝާހިދު ނިންމެވި ކަމަށް އެމްޑީޕީގެ ބައެއް ބޭފުޅުން މި ނޫހަށް ވެސް ވިދާޅުވެފައިވަނިކޮށެވެ.
ނަމަވެސް, މިއަދު އެމްޑީޕީގެ ގައުމީ މަޖިލީހުގެ ވަޓްސްއެޕް ގުރޫޕަށް ޝާހިދު ފޮނުއްވި މެސެޖްގައި ވިދާޅުވީ މިވަގުތު އިތުރު މަގާމަކަށް ޝައުގުވެރިކަން ނެތް ކަމަށެވެ.
މިހާރުގެ ޗެއާޕާސަން ހަސަން ލަތީފްގެ މަގާމުގެ ދައުރު އަންނަ ހޮނިހިރު ދުވަހު ހަމަވާއިރު އެ އިންތިހާބު ބާއްވާނެ ތާރީހެއް މިރޭ ގައުމީ މަޖިލީހުގެ ޖަލްސާގައި ފާސްކުރަން ވަނީ އެޖެންޑާކޮށްފަ އެވެ.
މަގާމަށް ކުރިމަތިނުލައްވާނެކަން ޝާހިދު ހާމަކުރެއްވިއިރު, އެސްޓީއޯގެ އެމްޑީ ހުސެއިން އަމްރު ވަނީ ކުރިމަތިލައްވާނެ ކަމަށް ވިދާޅުވެފަ އެވެ. އަމްރުއަކީ މިވަގުތު އެމްޑީޕީ ގައުމީ މަޖިލީހުގެ މަތި ދެކުނު ޕްރޮވިންސްގެ ރައީސް އެވެ.
"އެމްޑީޕީގެ ސިޔާސަތު ކޮމިޓީގެ ރައީސް އާއި ކެމްޕޭން ކޮމިޓީގެ މެމްބަރެއްގެ ހައިސިއްޔަތުން ގިނަ މަސައްކަތްތަކެއް އަޅުގަނޑަށް ވަނީ ކުރެވިފައި. ކުރިމަތި މިލަނީ ޕާޓީއަށް ގެންނަން ޖެހޭ ބަދަލުތައް ވަރަށް ރަނގަޅަށް އެނގޭތީ،" ޗެއާޕާސަން ކަމަށް ވާދަކުރައްވާނެކަން "އަދަދު" އަށް ކަށަވަރު ކޮށްދެއްވަމުން އަމްރު ވިދާޅުވި އެވެ.
އަމްރުގެ އިތުރުން އިކޮނޮމިކް މިނިސްޓަރު ފައްޔާޒު އިސްމާއިލް ވެސް މަގާމަށް ކުރިމަތިލައްވާނެކަން ވަނީ ޔަގީންވެފަ އެވެ. ފައްޔާޒަކީ މި ސަރުކާރުގައި އެންމެ ނުފޫޒުގަދަ މިނިސްޓަރުންގެ ތެރޭ ހިމެނިވަޑައިގަންނަވާ ބޭފުޅެކެވެ. އަދި, ފޮރިން މިނިސްޓަރު ޝާހިދާ ވެސް ވަރަށް ގާތުން މަސައްކަތް ކުރައްވާ ބޭފުޅެކެވެ.
