އެމްޑީޕީގެ ގައުމީ މަޖިލީހުގެ މުހިންމު ޖަލްސާއެއް މިރެއަށް އެޖެންޑާކޮށްފައިވަނިކޮށް ރައީސް އިބްރާހިމް މުހައްމަދު ސޯލިހް ސިންގަޕޫރަށް ވަޑައިގެންފި އެވެ.
ރައީސް ސޯލިހާއި އަނބިކަނބަލުން ފަޒްނާ އަހުމަދު ނުރަސްމީ ދަތުރެއްގައި ސިންގަޕޫރަށް މިއަދު ފުރާވަޑައިގެންނެވިއިރު ދަތުރު ނިންމަވައި ރާއްޖެ ވަޑައިގަތުމަށް ހަމަޖެހިފައިވަނީ މި މަހުގެ 15 ދުވަހު އެވެ.
ފަސް ދުވަހުގެ ދަތުރެއްގައި އެމްޑީޕީގެ އެންމެ އިސް ލީޑަރު ސިންގަޕޫރަށް ވަޑައިގެންނެވިއިރު މިރޭ އެމްޑީޕީގެ ގައުމީ މަޖިލީހަކީ ސިޔާސީ ގޮތުން މުހިންމު ޖަލްސާއެއްކަން ފާހަގަކޮށްލެވެ އެވެ.
ގައުމީ މަޖިލީހުގެ މިރޭގެ ޖަލްސާގައި އެޖެންޑާގައި ހިމަނާފައިވަނީ ރިޔާސީ ޕްރައިމަރީ އާއި ޕާޓީގެ ޗެއާޕާސަންގެ އިންތިހާބާއި އެހެން ވެސް އެތެރޭގެ އިންތިހާބުތައް ބާއްވާނެ ތާރީހެއް ކަނޑައެޅުމަށެވެ.
އެ އެޖެންޑާއަށް އެމްޑީޕީގެ ރައީސް މުހައްމަދު ނަޝީދު ވަނީ އިސްލާހެއް ހުށަހަޅުއްވާފަ އެވެ. އެގޮތުން, ގާނޫނުއަސާސީއަށް ބަދަލުތަކެއް ގެންނަން އެކަމާ ގުޅޭ މަޝްވަރާކުރަން ހާއްސަ ކޮންގްރެސްއެއް ބޭއްވުމަށް ތާރީހެއް ކަނޑައެޅުމަށެވެ.
ވެރިކަން ކުރާ ނިޒާމް ބަރުލަމާނީއަށް ބަދަލުކުރުމާއެކު ބޮޑެތި އެހެން ބަދަލުތަކެއް ގެންނަން ވެސް ނަޝީދު ވަނީ ހުށަހަޅުއްވާފަ އެވެ.
ގާނޫނުއަސާސީއަށް ގެންނަން ނަޝީދު ބޭނުންވާ ބަދަލުތައް
1. މިނިވަން މުއައްސަސާތަކުގެ އަދަދާ އެކުލެވިގެން ވާގޮތަށް ގެންނާން ޖެހޭ އިސްލާހުތައް ކޮންގްރެސްއިން ފާސްކުރުން. (ހާއްސަ ގޮތެއްގައި ޖުޑިޝިއަލް ސާވިސަސް ކޮމިޝަން އެކުލެވިގެންވާ ގޮތަށް ގެނަން ޖެހޭ އިސްލާހުތައް.)
2. ސުޕްރީމް ކޯޓުގެ ފަނޑިޔާރުންގެ އަދަދު ގާނޫނުއަސާސީގައި ކަނޑައެމަށް ނިންމާ ނިންމުން.
3. ވާދަކުރާ ކެންޑިޑޭޓުންގެ ތެރެއިން އެންމެ ގިނަ ވޯޓް ލިބޭ ކެންޑިޑޭޓަކީ ޖުމްލަ ވޯޓްގެ 30% އަށް ވުރެން މަދު ނޫން އަދަދަކަށް ވޯޓް ހޯދާފައިވާ ކެންޑިޑޭޓެއްނަމަ، އެ ކެންޑިޑޭޓްއަކީ މޮޅުވި ކެންޑިޑޭޓްގެ ގޮތުގައި ގާނޫނުއަސާސީގައި ކަނޑައެޅުމަށް ކޮންގްރެސްއިން ނިންމުން.
(މިފަދަ ކަނޑައެޅުމެއްގައި، އެއްވެސް ކެންޑިޑޭޓްއަކަށް 30% ގެ މިންވަރަށް ވޯޓް ނުލިބިއްޖެނަމަ އެންމެ ގިނަ ވޯޓް ހޯދާ ދެ ކެންޑިޑޭޓުންގެ މެދުގައި ދެވަނަ ބުރަކަށް ވޯޓް ނަގާ އެންމެ ގިނަ ވޯޓް ހޯދި ކެންޑިޑޭޓް އެއީ މޮޅުވި ކެންޑިޑޭޓްގެ ގޮތުގައިވެސް ގާނޫނުއަސާސީގައި ކަންޑައެޅުން.)
4. ގާނޫންއަސާސީގައި ކަނޑައަޅާނެ ލާކާމަރުކަޒީ އިތުރު އުސޫލްތައް ކަނޑައެޅުން.
5. ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށާއި އަދި އެފެންނަ ނުފެންނަ ވޯޓް ނަގާނެ ތާރީހެއް، އަދި ނެގޭ ފެންނަ ނުފެންނަ ވޯޓުގެ ނަތީޖާ އާއި އެއްގޮތައް ގާނޫނުއަސާސީގެ ވެރިކަމުގެ ނިޒާމް ކަނޑައެޅުމަށް ކޮންގްރެސްއިން އެއްބަސްވުން.
