އަބޫ ދާބީ، ޔޫއޭއީ (ފެބްރުއަރީ 10) - ރޮމެލޫ ލުކާކޫގެ ގޯލުން 1-0 އިން އޭޝިއާގެ ޗެމްޕިއަން ސައުދީ އަރަބިއްޔާގެ އަލް ހިލާލް ބަލިކޮށް، ޔޫރަޕްގެ ޗެމްޕިއަން ޗެލްސީން ކްލަބް ވޯލްޑް ކަޕްގެ ފައިނަލުން ފުރުސަތު ހޯދައިފި އެވެ.
މިއީ ޗެލްސީން އެންމެ ފަހުން ކުޅުނު ފަސް މެޗުގައި އުމުރުން 28 އަަހަރުގެ ލުކާކޫ ޖެހި ފުރަތަމަ ގޯލެވެ.
ހޮނިހިރު ދުވަހުގެރޭ ކުޅޭ މި ފަހަރުގެ ކްލަބް ވޯލްޑް ކަޕްގެ ފައިނަލުގައި ޗެލްސީ ނުކުންނާނީ ބްރެޒިލްގެ ޕަލްމެއިރާސްއާ ދެކޮޅަށެވެ. ޕަލްމެއިރާސް އިން ފައިނަލުގެ ޖާގަ ހޯދީ އެފްރިކާގެ ޗެމްޕިއަން އަލް އަހްލީ އަތުން ސެމީ ފައިނަލުގައި 2-0 އިން މޮޅުވެގެންނެވެ.
ޔޫއޭއީގެ މުހައްމަދު ބިން ޒައިދު ސްޓޭޑިއަމްގައި މިރޭ ކުޅުނު މެޗު ފަށައިގެން ޗެލްސީގެ ހަކީމް ޒިޔެޗް އޭރިއާބޭރުން ފޮނުވާލި ބޯޅަ ދިޔައީ ހުރަސްދަނޑި މަތިންނެވެ. އޭގެ ފަހުން މެޗުގެ 18 ވަނަ މިނިޓްގައި އޭރިއާތެެރެއިން ލުކާކޫ އަށް ލިބުނު ބޯޅަ އޭނާ ފަޔަށް ރަނގަޅަށް އަރާ ގޮތެއްނުވި އެވެ.
އެކަމަކު، މެޗުގެ 32 ވަނަ މިނިޓްގައި ލުކާކޫ ވަނީ ލިބުނު ފުރުސަތުގެ ބޭނުންހިފައި ގޯލު ޖަހައިފަ އެވެ. ޗެލްސީގެ ކައި ހަވާޓްޒް އަރިމަތިން ނެގި ހުރަހެއް ދިފާއުކުރަން އަލް ހިލާލް ކުޅުންތެރިން ކުރި މަސައްކަތުގައި ކުޑަ އޭރިއާތެރެއިން ލުކާކޫ އަށް ލިބުނު ބޯޅަ އޭނާ ވަނީ ގޯލަށް ފޮނުވާލައިފަ އެވެ. ދެ ވަނަ ހާފްގެ ކުޅުން ފަށައިގެން ތިން މިނިޓް ތެރޭ ހަވާޓްޒް ޗެލްސީގެ ލީޑުފުޅާކުރަން އޭރިއާތެރެއަށް ބޯޅަ ހިފައިގެން ވަދެ، ޖެހި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ފަހުން ޒިޔެޗް ޖެހި ބޯޅައެއް އަލް ހިލާލްގެ ކީޕަރު އަލް މަޔޫފް ވަނީ މަތަކޮށްފަ އެވެ.
އަލް ހިލާލުން ނަތީޖާ ހަމަހަމަ ކުރަން ރަނގަޅު ދެ ހަމަލާއެއް ފޮނުވާލި އެވެ. އެ ގޮތުން އަލް ހިލާލްގެ ފޯވާޑް، ކުރިން ޕޯޓޯ އަށް ކުޅުނު މޫސާ މަރޭގާ އޭރިއާތެެރެއިން ޖެހި ބޯޅަ އާއި އޭރިއާބޭރުން މުހައްމަދު ކާނޯ ޖެހި ބޯޅަ ޗެލްސީގެ ކީޕަރު ކެޕާ އަރިއްޒަބަލާގާ ވަނީ މަތަކޮށްފަ އެވެ.
މިދިޔަ އަހަރުގެ ޖެނުއަރީ މަހު ޗެލްސީގެ ކޯޗުކަމާ ހަވާލުވި ޖަރުމަނުގެ ކޯޗު ތޯމަސް ޓުޗެލް ހަވާލުވިތާ މިވީ 379 ދުވަސް ތެރޭ އޭނާ ޗެލްސީ ގޮވައިގެން ނުކުތް ހުރިހާ މުބާރާތެއްގެ ފައިނަލުގައި ވަނީ ކުޅެފަ އެވެ. މިިދިޔަ ސީޒަނުގެ އެފްއޭ ކަޕާއި ޗެމްޕިއަންސް ލީގުގެ ފައިނަލް ކުޅުނުއިރު، މި ފަހަރުގެ ސީޒަން ފެށުމުގެ ކުރިން ޔުއެފާ ސުޕަ ކަޕް ފައިނަލް ކުޅުނެވެ. އަދި މި ސީޒަނުގައި މި ވަނީ އިނގިރޭސި ލީގު ކަޕާއި ކްލަބް ވޯލްޑް ކަޕް ފައިނަލުން ފުރުސަތު ހޯދައިފަ އެވެ.
އެކަމަކު، މިރޭގެ މެޗުގައި ޓުޗެލް އަށް ޗެލްސީ ބެންޗުން ފުރުސަތެއް ނެތެވެ. އެއީ ކޮވިޑް-19 އަށް ޕޮޒިޓިވްވެފައިވާތީ ކަރަންޓީނުގައި ހުންނަން ޖެހިފައިވާތީ އެވެ. ޗެލްސީ ޓީމަށް ބެންޗުން އިރުޝާދުދިނީ އެސިސްޓަންޓް ކޯޗު ޒްސްކޮޓް ލޯ އެވެ.
ޗެލްސީ އަށް ބައިނަލްއަގުވާމީ ބޮޑު މުބާރާތެއްގެ ތެރެއިން ތަށި ނުހޯދި އޮތީ ކްލަބް ވޯލްޑް ކަޕްގެ އެވެ. ޗެލްސީން 2012 ވަަނަ އަހަރުގެ ކްލަބް ވޯލްޑް ކަޕްގެ ފައިނަލުގައި ކުޅުނު ނަމަވެސް ވަނީ ބްރެޒިލްގެ ކޮރިންތިއަންސް އަތުން 1-0 އިން ބަލިވެފަ އެވެ. މި ފަހަރުގެ ފައިނަލުގައި ވެސް ޗެލްސީ ކުޅެން ޖެހިފައި އޮތީ ބްރެޒިލްގެ ކްލަބަކާ އެވެ.
