އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގައި މިއަދު ހަވީރު ކުޅުނު މެޗުން ޓީސީ ސްޕޯޓްސް ކްލަބް 1-0 އިން ބަލިކޮށް، ކްލަބް އީގަލްސް މުބާރާތުގެ ފައިނަލުގެ ފުރަތަމަ ޖާގަ ހޯދައިފަ އެވެ.
އެފްއޭއެމް އިން 2011 ވަނަ އަހަރު ޔޫތު ޗެމްޕިއަންޝިޕް ބާއްވަން ފެށި ފަހުން ކުޅުނު ނުވަ މުބާރާތުގެ ތެރެއިން ހަތް ފަހަރު އީގަލްސް އިން ފައިނަލުގައި ކުޅޭނެ އެވެ. އީގަލްސް އިން ހަތަރު ފަހަރު މުބާރާތުގެ ތަށި ހޯދާފައިވާއިރު، ދެ ފަހަރު ވަނީ ފައިނަލުގައި ބަލިވެފަ އެވެ.
އީގަލްސް އިން އެންމެ ފަހުން 2019 ވަނަ އަހަރު 21 އަހަރުން ދަށަށް ޔޫތު ޗެމްޕިއަންޝިޕް ބޭއްވިއިރު، ފައިނަލުގައި ވަނީ ޓީސީ ބަލިކޮށްފަ އެވެ. ޔޫތު ޗެމްޕިއަންޝިޕް މީގެ ކުރިން 19 އަހަރުން ދަށަށް ބޭއްވީ އެންމެ ފަހަރަކު އެވެ. އެއީ 2018 ވަނަ އަހަރު އެވެ. އެ ފަަހަރު އީގަލްސް ބަލިކޮށް ތަށި ހޯދީ ކްލަބް ގްރީން ސްޓްރީޓްސް އެވެ.
އަންނަ އާދިއްތަ ދުވަހު ހަވީރު ފ.ނިލަންދޫ ޓާފް ދަނޑުގައި އީގަލްސްއާ ދެކޮޅަށް ޔޫތު ޗެމްޕިއަންޝިޕް ފައިނަލުގައި ކުޅޭ ޓީމެއް އެނގޭނީ މިރޭގެ ސެމީ ފައިނަލް މެޗަށް ފަހު އެވެ. މިރޭ ކުޅޭ ސެމީގައި ސުޕަ ޔުނައިޓެޑް ސްޕޯޓްސް (ސަސް) ކުޅޭނީ ޔުނައިޓެޑް ވިކްޓްރީ (ޔޫވީ)އާ އެވެ. އެ މެޗުން މޮޅުވާ ޓީމަކަށް ފައިނަލުގެ ފަހު ޖާގަ ލިބޭނެ އެވެ.
އީގަލްސް އިން މިއަދުގެ މެޗު ފަށައިގެން ފުރަތަމަ 25 މިނިޓް ތެރޭ ވަނީ އަނިޔާގެ ސަބަބުން ޓީމުގެ އެޓޭކްގެ މުހިންމު ދެ ކުޅުންތެރިން ބަދަލުކޮށްފަ އެވެ. އެ ގޮތުން ޒައިން ޒަފަރާއި މުހައްމަދު ރަޔާން މުއްސަދު މަންސޫރަށް އަނިޔާވެގެން ބަދަލުކުރި އެވެ. މެޗުގެ ކުރީކޮޅުގައި އީގަލްސްގެ އެޓޭކް ލީޑުކުރަމުން ދިޔަ މުހައްމަދު ސަމާހު މޫސާ ފަތުހީ އަށް ލިބުނު ފުރުސަތަކުގައި އޭނާ ފޮނުވާލި ބޯޅަ ދިޔައީ ގޯލާ މާ ނުރައްކާނުވެ އެވެ.
ޓީސީން ވަނީ ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ. އެ ގޮތުން ޓީސީގެ ކުރިއަށް ކުޅޭ އަހުމަދު ޒައުލް ނާޒިމާއި ޔޫސުފް ޝާއިފަށް ލިބުނު ފުރުސަތުތަކުގައި އީގަލްސްގެ ޑިފެންޑަރުންނާއި ގޯލްކީޕަރު ޝައިހާން އަލީ ފެނުނީ ވަރަށް ހުށިޔާރުކޮށެވެ. ކީޕަރު ޝައިހާން ވަނީ ޓީސީގެ އެޓޭކްތައް ހުއްޓުވުމުގައި ރަނގަޅު ކުޅުމެއް ދައްކައިފަ އެވެ.
އީގަލްސް އާއި ޓީސީ ކުޅުނު މެޗުގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ދެ ވަނަ ހާފްގައި ކުޅުން ފަށައި ދެ ޓީމުން ކުރިއަށް ޖެހިގެން ގިނަ އެޓޭކްތަކެއް ކުރަން މަސައްކަތްކުރި އެވެ. މެޗުގެ 65 ވަނަ މިނިޓްގައި ޓީސީގެ ގޯލްކީޕަރު ނައިޝަމް އަހުމަދު ކުރިއަށް އެރި ބޯޅައެއް ހޯދައި، އީގަލްސްގެ ސަމާހު ގޯލެއް ފޮނުވާލުމުގެ ކުރިން ޓީސީގެ ޑިފެންޑަރު އަހުމަދު މާއިޝް ރަޝީދު ވަނީ ކޯނަރަކަށް ބޭރުކޮށްލައިފަ އެވެ. އެ ކޯނަރުގައި އީގަލްސް އިން މެޗުގައި ފެނުނު ހަމައެކަނި ގޯލު ޖެހި އެވެ. މި ލަނޑު ޖެހީ ސަމާހު އެވެ. ސަމާހު ވެއްޓިގެންފައި ބޮލުން ޖެހި ބޯޅަ އަމާޒުވީ ގޯލުގެ ކަނަށެވެ.
ޓީސީން ވަނީ މެޗުގެ 72 ވަނަ މިނިޓްގައި ނަތީޖާ ހަމަހަމަ ކުރުމާ ގާތަށް ޖެހިލައިފަ އެވެ. ޓީސީގެ ކުރިއަށް ކުޅޭ ހަސަން އަޒޫމް އަލީ ޖެހި ބޯޅަ ކީޕަރު ޝައިހާން އަތުގައި ޖެހިފައި ނުކުތުމުން ދެ ވަނަ ފަހަރަށް ހޯދައި، ޓީސީން ކުރި އެޓޭކުގައި އެ ޓީމުގެ ފަހުމާން އަބްދުލް ހަމީދު ޖެހި ބޯޅަ ގޯލު ރޮނގުމަތީގައި ހުރި، އީގަލްސްގެ ޑިފެންޑަރު ހުމެއިދު ހުސައިން ވަނީ ސަލާމަތްކޮށްފަ އެވެ.
މެޗުގެ 82 ވަނަ މިނިޓްގައި ޓީސީގެ މުހައްމަދު ޒަޔާން އިސްމާއިލް ޖެހި ވޮލީއެއް ގޯލުގެ ހުރަސްދަނޑިމަތިން ދިޔައިރު، އޭގެ މިނިޓެއް ފަހުން ފަހުމާން ފޮނުވާލި ބޯޅަ ދިޔައީ ގޯލާ މާ ދުުރުންނެވެ. އޭގެ ފަހުން ޓީސީން ވަރަށް ބޮޑަށް ކުރިއަށް ޖެހިގެން ލަނޑެއް ޖެހޭތޯ ބަލަަމުންދިޔައިރު، މެޗުގެ އިތުރު ވަގުތުގައި ދެ ވަނަ ގޯލެއް ޖަހަން އީގަލްސް އަށް ރަނުގެ ފުރުސަތެއް ލިބުނެވެ. ޓީސީ އޭރިއާތެެރެއިން ހަސަން ސަހާފް ހުސްކޮށް އަރައި ފޮނުވާލި ބޯޅަ ދިޔައީ ހުރަސްދަނޑި މަތިންނެވެ.
