އެލައިޑު އިންޝުއަރެންސް ކުންފުނިން މިދިޔަ އަހަރު 250.7 މިލިއަން ރުފިޔާ ބަދަލުގެ ގޮތުގައި ދޫކޮށްފައިވާ ކަމަށް އެ ކުންފުނިން ބުނެފި އެވެ.
އެލައިޑުން ބުނި ގޮތުގައި ވޭތުވެދިޔަ ފަސް އަހަރަށް ބަލާއިރު ވެސް މިދިޔަ އަހަރަކީ އެލައިޑުގެ ކަސްޓަމަރުންނަން އެންމެ ބޮޑު އަދަދެއް ބަދަލުގެ ގޮތުގައި ދޫކުރެވުނު އަހަރެވެ.
"މިދިޔަ އަހަރު ދޫކުރި ބަދަލުގެ ތެރޭގައި ހިމެނޭނެ އެހެން އަހަރު ތަކުގައި ކްލޭމް ކޮށްފައި ހުރި ބަދަލުވެސް،" އެލައިޑުގެ ޖެނެރަލް މެނޭޖަރު އިބްރާހިމް ފިރުޝާން ވިދާޅުވި އެވެ.
އެލައިޑުން ބަދަލުގެ ގޮތުގައި 2020 ވަނަ އަހަރު ދޫކޮށްފައިވަނީ 107.6 މިލިއަން ރުފިޔާ އެވެ.
ރާއްޖޭގައި އެންމެ ފުޅާ ދާއިރާއެއްގައި އިންޝުއަރެންސްގެ ހިދުމަތްދޭ ކުންފުނިން ވިޔަފާރި ކުރާ ފަރާތްތަކާއި އާންމުންނާ ގުޅުންހުރި ވަރަށް ގިނަ ޕޮލިސީ ތަކެއް ތައާރަފު ކޮށްފައި ވެއެވެ. އޭގެ ތެރޭގައި އިސްލާމިކް އިންޝުއަރެންސް ޕޮލިސީތައް ވެސް ހިމެނެ އެވެ.
އެލައިޑުގެ ހިދުމަތް ހޯދާ ފަރާތްތަކަށް މޯބައިލް އެޕްލިކޭޝަން އެެއް ތައާރަފުކޮށްފައި ވާއިރު، 1600 ފޯނު ނަމްބަރުންނާއި އެ ކުންފުނީގެ ވެބްސައިޓުން ވެސް ގިނަ ހިދުމަތްތައް ލިބޭ ގޮތަށް ހަމަޖައްސާފައިވެ އެވެ.
