ވޮޝިންޓަން، އެމެރިކާ (ފެބްރުއަރީ 8) - އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕުގެ އަފްގާނިސްތާން ގޮފީގެ ވެރިޔާގެ "ލޮކޭޝަން ނުވަތަ އައިޑެންޓިފިކޭޝަން" އާ ގުޅޭ މައުލޫމާތު ފޯރުކޮށްދޭ ފަރާތަކަށް އެމެރިކާއިން 10 މިލިއަން ޑޮލަރު ހުށަހަޅައިފި އެވެ.
އޭގެ އިތުރުން އޯގަސްޓް 26 ވަނަ ދުވަހު އިސްލާމިކް ސްޓޭޓް ހޮރަސާން ނުވަތަ އައިއެސް-ކޭ އިން ކާބުލް އެއާޕޯޓަށް ދިން ޓެރަރިސްޓް ހަމަލާއާ ގުޅޭ މީހުން ހައްޔަރު ކުރަން ނުވަތަ ޝަރީއަތުގެ ކުރިމައްޗަށް ގެންނަން އެހީވާ ފަރާތްތަކަށް ވެސް އެ އަދަދު ހުށަހަޅާފައިވެ އެވެ.
އެމެރިކާއިން އަފްގާނިސްތާނުގެ ފަސްގަނޑު ދޫކޮށް ދިޔުމުގެ އޮޕަރޭޝަނުގެ ކަންކަން ކާބުލް އެއާޕޯޓުގައި ކުރިއަށް ދަނިކޮށް ދިން ހަމަލާގައި 100 އަށް ވުރެ ގިނަ މީހުން މަރުވި އިރު އޭގެ ތެރޭގައި އެމެރިކާ ސިފައިންގެ 13 މީހުން ހިމެނެ އެވެ.
އެމެރިކާއިން ސަރުކާރުން ބުނީ އައިއެސް-ކޭގެ ވެރިޔަކަށް ސަނާއުﷲ ގަފަރީ ނުވަތަ ޝަހާބް އަލް މުހާޖިރް އައްޔަނު ކުރީ އައިއެސްއިން ޖޫން 2020 ވަނަ އަހަރުގައި ކަމަށެވެ. އިރާގާއި ސީރިއާގައި އުފެދުނު އައިއެސްގެ އަފްގާން ގޮފީގެ ނަމަކީ އައިއެސް-ކޭ އެވެ.
"އަފްގާނިސްތާނުގައި ހިންގާ އައިއެސް-ކޭގެ ހުރިހާ އޮޕަރޭޝަނަކަށް ހުއްދަ ދިނުމުގެ ޒިންމާ ނަގަނީ ގަފަރީ. އަދި އޮޕަރޭޝަންތަކަށް ފަންޑު ހަމަޖެއްސުމުގެ ޒިންމާ ވެސް ނަގަނީ އޭނާ،" ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުންޏެވެ.
މިދިޔަ ނޮވެމްބަރު މަހުން ފެށިގެން ބައިނަލްއަގްވާމީ ޓެރަރިސްޓެއްގެ ގޮތުގައި އޭނާ ވަނީ ބްލެކްލިސްޓުކޮށްފަ އެވެ.
ގަފަރީއާ ގުޅޭ މާ ގިނަ މައުލޫމާތު ހާމަވެފައެއް ނުވެ އެވެ. ނަމަވެސް ބެލެވޭ ގޮތުގައި އޭނާއަކީ އަރަބި ގައުމަކުން އަފްގާނިސްތާނަށް ދިޔަ މީހެކެވެ.
ބައެއް ރިޕޯޓުތައް ބުނާ ގޮތުން އޭނާއަކީ ކުރިން އަލް ގައިދާގެ ކޮމާންޑަރެއް ނުވަތަ ތާލިބާނުންގެ ތެރޭގައި ހިމެނޭ އެންމެ އަނިޔާވެރި އަދި ބާރުގަދަ ފެކްޝަން، ހައްގާނީ ނެޓްވޯކްގެ ކުރީގެ މެމްބަރެކެވެ.
އަފްގާނިސްތާނާއި ޕާކިސްތާނުގައި ފަހަކަށް އައިސް ދީފައިވާ އެންމެ ބޮޑެތި ހަމަލާތަކުގެ ފަހަތުގައި ވަނީ އައިއެސް-ކޭ އެވެ. އެގޮތުން މިސްކިތްތަކާއި، ފައްޅިތަކާއި، އާއްމުން އެއްވާ މައިދާންތަކާއި، ހޮސްޕިޓަލްތަކަށް ވެސް ހަމަލާދީފައިވެ އެވެ.
މުސްލިމުންގެ ތެރެއިން ސުންނީ މަޒުހަބު ނޫން އެހެން މަޒުހަބުތަކުގެ މީހުންނަށް އައިއެސް-ކޭ ގެ ހަމަލާތައް ވަކިން އަމާޒުކުރެ އެވެ.
ތާލިބާނާއި އެމެރިކާ ފައުޖުތަކުގެ އޮޕަރޭޝަންތަކާ ހެދި އައިއެސް-ކޭ ބަލިކަށިވި ނަމަވެސް، މިދިޔަ އޯގަސްޓް މަހު ތާލިބާނުން ވެރިކަމަށް އައުމާ އެކު އައިއެސް-ކޭ އިން މަސައްކަތް ކުރަނީ ތާލިބާނުން ބަލިކަށިކޮށްލަން ބޮޑެތި ހަމަލާތަކެއް ދިނުމަށެވެ.
