ރާއްޖެއާއި އިންޑިއާއާ ދެމެދު ވެފައިވާ ވިސާގެ ކަންކަން ފަހިކުރުމުގެ އެއްބަސްވުމުގެ ދަށުން ވިޔަފާރީގެ ބޭނުންތަކަށް އަންނަ އިންޑިއާ ރައްޔިތުންނަށް ވިސާއާ ނުލާ 90 ދުވަހާ ހަމައަށް ރާއްޖޭގައި ތިބެވޭ ގޮތަށް ހަދައިފި އެވެ.
މިއީ ރާއްޖެއާ އިންޑިއާ ދެމެދު ޑިސެމްބަރު 17، 2018 ގައި ވެފައިވާ ވިސާ ފަހިކުރުމުގެ އެގްރީމަންޓުގެ ދަށުން މި ހިނގާ ފެބްރުއަރީ 1، ގައި އަމަލު ކުރަން ފެށި އުސޫލެކެވެ.
ސަރުކާރު ހަބަރުތައް ގެނެސްދޭ ވެބްސައިޓު ގަވް.އެމްވީގައި އެކަމާ ގުޅިގެން ފޮރިން މިނިސްޓްރީން ބުނީ އެ އެއްބަސްވުމުގެ ދަށުން އެކި ފަހަރު މަތިން އެތެރެވޭ ތިން މަސް ދުވަހުގެ ނަން-ރެޒިޑެންޓް ބިޒްނަސް ވިސާއެއް ކޮންމެ ހަ މަހަކުން އިންޑިއާ ކޮންމެ ރައްޔިތަކަށް ވެސް ލިބޭނެ ކަމަށެވެ.
އެ ތިން މަސް ދުވަސް ހަމަވުމުން އެ މުއްދަތު ހަ މަސް ދުވަހަށް އިތުރު ކުރަން ފުރުސަތު ވެސް ލިބެ އެވެ. އެ ހަ މަސް ދުވަހަކީ ފުރަތަމަ ތިން މަސް ދުވަހުގެ ބޭރުން ގުނާ ދުވަސްތަކެއް ކަމުން ނުވަ މަސް ދުވަހާ ހަމައަށް މި ވިސާ ބޭނުންކޮށްގެން ރާއްޖޭގައި މަޑުކުރެވޭނެ އެވެ.
އަހަރެއްގެ ތެރޭގައި ނުވަ މަސް ދުވަހަށް ވުރެ އިތުރަށް މަޑުކުރާ ނަމަ އެމްޕްލޯޔިމަންޓް އެޕްރޫވަލްއެއް ހޯދަން ޖެހެ އެވެ.
ފޮރިން މިނިސްޓްރީން އިތުރަށް ބުނީ ތިން މަސް ދުވަހުގެ މުއްދަތު ހަމަވުމުގެ ކުރިން ބިޒްނަސް ވިސާ އިތުރުކުރަން އިކޮނޮމިކް މިނިސްޓްރީގެ ބިޒްނަސް ޕޯޓަލުން ހުށަހަޅަން ޖެހެ އެވެ. އަދި މުއްދަތު ހަމަވުމުގެ ކުރިން ބިޒްނަސް ވިސާ އާކުރަން މަޖުބޫރެވެ.
ރާއްޖެއާ އިންޑިއާ ދެމެދު ވެފައިވާ ވިސާ އެއްބަސްވުމަކީ "ރެސިޕްރޯކަލް" އެއްބަސްވުމުގެއް ކަމުން، އިންޑިއާއަށް ދަތުރުކުރާ ހުރިހާ ދިވެހިންނަށް ވެސް މިކަންކަން އެ ގައުމުން ވަނީ ފަހިކޮށްދީފަ އެވެ.
މިހާރު ވެސް އެ އުސޫލުގެ ތެރެއިން ދިވެހިންނަށް އިންޑިއާއަށް އެތެރެވެވޭނެ ކަމަށާއި ވިސާ މުއްދަތު އިތުރުކުރަން ހުށަހެޅޭނެ ކަމަށް ވެސް ފޮރިން މިނިސްޓްރީން ބުންޏެވެ.
