މޮސްކޯ، ރަޝިއާ (ފެބްރުއަރީ 4) - އެމެރިކާއިން އިސް ނަގައިގެން ކުރިއަށް ގެންދާ އަސްކަރީ ޖަމިއްޔާ، ނޭޓޯއަށް އާ މެމްބަރުން އައްޔަނު ކުރުމާ ދެކޮޅު ކަމަށް ބުނެ، ޔޫކްރެއިން މައްސަލައިގައި ޗައިނާއިން ރަޝިއާއަށް ތާއީދުކޮށްފި އެވެ.
ޗައިނާއިން އެގޮތަށް ބުނީ ރައީސް ޝީ ޖިންޕިން އާއި ރަޝިއާގެ ރައީސް ލެޑިމިއަ ޕުޓިންއާ ދެމެދު ޗައިނާގައި ބޭއްވި ބައްދަލުވުމަކަށް ފަހު އެވެ.
ދެ ގައުމުން ނެރުނު ސްޓްރެޓެޖީ ލިޔުމެއްގައި ވަނީ "ބައިނަލްއަގްވާމީ ސަލާމަތާއި ހަމަޖެހުމަށް ގެއްލުން ދިނުމުގައި އެމެރިކާއިން އަދާކުރާ ދައުރަށް" ފާޑުކިޔާފަ އެވެ.
"ނޭޓޯ އިތުރަށް ފުޅާ ކުރުމާ އަޅުގަނޑުމެން ދެކޮޅު އަދި ފިނި ހަނގުރާމައިގެ ޒަމާނުގައި ގެންގުޅުނު ވިސްނުން ދޫކޮށްލަން ނޯތު އެޓްލާންޓިކް އެލަޔަންސަށް ގޮވާލަން،" ލިޔުމުގައިވެ އެވެ.
އޭގެ އިތުރުން "އެހެން ގައުމުތަކުގެ އިސްތިގްލާލާއި ސަލާމަތާއި މަސްލަހަތަށް" އިހްތިރާމް ކުރުމަށް ވެސް ގޮވާލި އެވެ.
ޗައިނާއިން ރަޝިއާއަށް ތާއީދުކޮށްފައިވާ އިރު، ނޭޓޯގެ މެމްބަރެއްގެ ގޮތުގައި ޔޫކްރެއިން ނުހިމެނުމަށް ރަޝިއާއިން ވަނީ ހުޅަނގުގެ ގައުމުތަކަށް މީގެ ކުރިން ޑިމާންޑުކޮށްފަ އެވެ.
ހުޅަނގުގެ ގައުމުތަކުން ތުހުމަތު ކުރާ ގޮތުގައި ރަޝިއާގެ 100،000 ސިފައިން ޔޫކްރެއިނާ ގުޅޭ ބޯޑަރު ކައިރިއަށް ފޮނުވާފައި ވަނީ އެ ގައުމު ހިފުމުގެ ބޭނުމުގަ އެވެ.
ނަމަވެސް އެފަދަ ކަމެއް ކުރަން ނޫޅޭ ކަމަށް ރަޝިއާއިން އަންނަނީ ތަކުރާރުކޮށް ބުނަމުންނެވެ.
މައްސަލަ ހަމައަކަށް އަޅުވަން ޖަރުމަނުވިލާތާއި ރަޝިއާގެ ވެރިން މި ފެށޭ ހަފްތާގައި ރަޝިއާ އާއި ޔޫކްރެއިނަށް ދަތުރު ކުރަން ވަނީ ހަމަޖެހިފަ އެވެ.
