މާދަމާ އޮންނަ އިންތިހާބުތަކުގައި ވާދަކުރާ ވަކި ކެންޑިޑޭޓަކަށް ވޯޓުލާން އެއްވެސް މީހަކަށް މަޖުބޫރުކޮށް ނުފޫޒު ފޯރުވުމަށް މަގުފަހިވާ އެއްވެސް އަމަލެއް ނުހިންގުމަށް އިލެކްޝަން ކޮމިޝަން (އީސީ) އިން ގޮވާލައިފި އެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި، ތ. ވިލުފުށި އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވާދަކުރާ ކެންޑިޑޭޓުންގެ އިންތިހާބު މާދަމާ ހެނދުނު ފެށޭނެ އެވެ.
އެގޮތުން ގާނޫނާއި ގަވާއިދުތަކަށް ބޯލަބުމަށާއި، އެއްވެސް ސިފައެއްގައި ކެމްޕެއިން ހަރަކާތްތައް ކުރިއަށް ނުގެންދިއުމަށް އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބު ގޮވާލެއްވި އެވެ. އަދި ވީހާވެސް ކުރިން ވޯޓުލާން ދިއުމަށް އެދިވަޑައިގަތެވެ.
"މިއަދު އިރުއޮއްސި ހަޔަކުން ފެށިގެން ކެމްޕެއިން ކުރުމަކީ މަނާ ކަމެއް، އިންތިހާބަށް ނުފޫޒު ފޯރުވާ، ވަކި މީހަކަށް ވޯޓުލާން މަޖުބޫރު ނުކުރުމަށް އަޅުގަނޑުމެން އިލްތިމާސް ކުރަނީ."' ކެމްޕެއިނަށް ކަނޑައެޅިފައިވާ ވަގުތު ހަމަވުމާއި އެކު މި ނޫހާއި ވާހަކަ ދައްކަވަމުން ހަބީބު ވިދާޅުވި އެވެ.
ކޮމަންޑޫ ދާއިރާގެ ގޮނޑިއަށް ތިން ޕާޓީއިން ވާދަކުރީރު، އެ ކެމްޕެއިންއަކީ ރާއްޖޭގެ ތާރީހުގައި ލިޔެވިގެން ދިޔަ ފޯރިގަދަ ކެމްޕެއިން އެކެވެ.
ރައްޔިތުން މަޖިލީހުގެ އަގުލަބިއްޔަތު، 64 ގޮނޑިއާއި އެކު އެމްޑީޕީގެ އަތުގައި އޮތް ނަމަވެސް، އެ ޕާޓީ އިސްވެ އޮވެ ހިންގާ ކޯލިޝަން ސަރުކާރުންވެސް އެންމެ ތަންފުކެއްވެސް ދޫކޮށްފައެއް ނުވެ އެވެ. އެތައް މަޝްރޫއެއް އެ ދާއިރާއަށް އިއުލާނުކޮށް، ފައްޓަވާ، ދެ ފަހަރު މަތިން ރައިސުލްޖުމްހޫރިއްޔާއާ ރައްޔިތުން މަޖިލީހުގެ ރައީސްއާ ވެސް އެ ދާއިރާއަށް ވަޑައިގަތެވެ.
އަދި ކޯލިޝަން ސަރުކާރުގެ ތެރޭގައި ހިމެނޭ ޖުމްހޫރީ ޕާޓީގެ ލީޑަރު، ގާސިމް އިބްރާހިމް އާއި އަދާލަތުގެ ރައީސް އިމްރާން އަބްދުﷲ ވެސް އެމްޑީޕީ ކެންޑިޑޭޓުގެ ކެމްޕެއިންގައި ބައިވެރިވަޑައިގަތެވެ.
މީގެ އިތުރުން މުޅި ސަރުކާރުގެ އިސް މަގާމުތަކުގައި ތިއްބެވި ހުރިހާ މެމްބަރުން ކަހަލަ ގޮތަކަށް ކެމްޕެއިންއަށް ގޮސް އުޅުނު އިރު، އިދިކޮޅު ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީން އާއި، އެ ޕާޓީގެ ލީޑާޝިޕްގެ އިތުރުން އެމަނިކުފާނަށް ތާއީދުކުރާ ސަޕޯޓަރުންވެސް ކޮމަންޑޫ ދާއިރާއަށް ކެމްޕެއިނަށް ގޮސް އުޅުނު އެވެ.
އަދި އަލަށް އުފެއްދި އެމްއެންޕީގެ ކެންޑިޑޭޓަށް ތާއީދު ހޯދަން އެ ޕާޓީގެ އިސް ސަފުގައި މަސައްކަތް ކުރާ އެންމެންވެސް އެ ދާއިރާގައި ކެމްޕެއިން ޖަގަހަތައް ހުޅުވައިގެން ހަރަކާތްތެރިވި އެވެ.
ބައި އިލެކްޝަނަށް ތައްޔާރުވެފައި ވާއިރު އެ ދާއިރާގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓްގައިވާ ގޮތުން ބައި އިލެކްޝަންގައި ވޯޓް ދިނުމުގެ ހައްގު އެ ދާއިރާގެ ތިން ރަށް ކަމަށްވާ ކޮމަންޑޫ އާއި ފޯކައިދޫ އަދި މަރޮށީގެ 3،309 މީހަކަށް ލިބިގެންވެ އެވެ. އެއީ ފެބްރުއަރީ ފަސްވަނަ ދުވަހުގެ ނިޔަލަށް އުމުރުން 18 އަހަރު ފުރޭ އެ ދާއިރާއަށް ނިސްބަތްވާ މީހުންގެ އަދަދެވެ.
ކޮމަންޑޫ ދާއިރާއަށް ވާދަކުރާ ކެންޑިޑޭޓުން
ކެންޑިޑޭޓް ނަމްބަރު 1: އެމްޑީޕީގެ ޓިކެޓުގައި ވާދަކުރައްވާ ރާޝިދުއަކީ 10 އަހަރުވަންދެން ފޯކައިދޫ ކައުންސިލްގެ މެމްބަރު ކަމާއި ރައީސް ކަން ކުރެއްވި ބޭފުޅެކެވެ. އޭނާއަކީ މިހާރު އެ އިދާރާގެ ސެކެޓްރީ ޖެނެރަލް އެވެ.
ކެންޑިޑޭޓް ނަމްބަރު 2: ޕީޕީއެމްގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ މޫސާ ފަތުހީއަކީ ށ.އަތޮޅު ކައުންސިލްގެ ރައީސްކަން ކުރައްވާފައިވާ ބޭފުޅެކެވެ. އަދި ކުރިން ކޮމަންޑޫ ކުޑަ ކަތީބުކަންވެސް އޭނާ ކުރެއްވި އެވެ. މީގެ އިތުރުން އޭނާއަކީ ކުރީ ސަރުކާރުގައި ހޯމް މިނިސްޓަރުގެ ނައިބުކަންވެސް ކުރެއްވި ވަކީލެކެވެ.
ކެންޑިޑޭޓް ނަމްބަރު 3: އެމްއެންޕީގެ ފަރާތުން ވާދަކުރާ ހަންނާނަކީ ތައުލީމީ ދާއިރާގައި ގިނަ އަހަރުތަކެއްވަންދެން (1987- 2019އަށް) ހިދުމަތް ކުރައްވާފައިވާ ބޭފުޅެކެވެ. އަދި މިހާރު އެ އޭނާއަކީ ވިޔަފާރިވެރި އެކެވެ.
މި ބައި އިލެކްޝަން ބާއްވަނީ ކޮމަންޑޫ ދާއިރާގެ މެމްބަރުކަން ކުރައްވަމުން ގެންދެވި ހުސެއިން ވަހީދު، 53، ކެންސަރު ބަލީގައި އަވަހާރަވުމުނެވެ. ގިނަ ދުވަހު ކެންސަރަށް ފަރުވާ ކުރެއްވުމަށްފަހު އޭނާ އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިމަހުގެ 14 ވަނަ ދުވަހު އެވެ.
